SILASILA LE MALO I LANA FESOASOANI MO FAIAOGA
Tusia: Tusiga Taofiga
E $18 miliona ua si’itia ai le fesoasoani a le Malo mo Aoga a Ekalesia ma Aoga Tuma’oti i tausaga ta’itasi.
Na amata fa’avae lenei fesoasoani a le Faigamalo a le HRPP ina ua tula’i mai le ta’ita’iga o le Malo, i le tausaga e 1983 i le na’o le $50,000 peita’i e o’o mai i le taimi nei ua si’itia maualuga i le $18 miliona.
E ui i lea fa’amuamua a le Malo mo Aoga a Ekalesia ma Aoga Tuma’oti, peita’i na fa’ailoa e le Palemia, Tuila’epa Dr Sa’ilele Malielegaoi, o lo’o tagi atu pea nei aoga, i se fesoasoani a le Malo mo le totogi o Faiaoga, auā o lo’o fa’alagolago pea Ekalesia ma Aoga Tuma’oti i seleni mai pili aoga a le fanau.
Fa’ailoa e Tuila’epa i le 10 tausaga ua mavae, na iloa tino ai e le sa avea ma Minisita o Aoga i lena taimi ia Magele Mauiliu Magele, ma le Pule Sili o le Matagaluega o Aoga, le fa’afitauli tele o lo’o tula’i mai i faiaoga o aoga a le Malo.
O lea fa’afitauli na vaaia ai le paū maualalo o togi a le fanau o lo’o tau’aveina mataupu fa’asaienisi ma le matematika, peita’i na sa’ili ma iloa ai, na i ai se fuafuaga sa fa’ata’oto e nisi o Minisita ua mavae mai Malo o le Pasefika, na o latou tau pule fa’atasi, ina ia tu’u maualuga maka o fanau e su’e i ia mataupu, a’o lona fa’afitauli, a sikolasipi i Niu Sila, o iina fa’atoā aliali tino ai le fa’aletonu o i ai tomai o nei fanau patino i mataupu nei e lua, le fa’asaienisi ma le matematika.
O mafua’aga lena na mapuna a’e ai ma se fesoasoani tele a le Malo na ta’imua ai Magele, ina ia totogi e le Malo, le toe fa’ao’oga fua o faiaoga e 60 i le tausaga, patino i mataupu nei, e sa’ili ai o latou fa’ailoga maualuluga, ina ia mautinoa le tineia o lea fa’afitauli ogaoga ua tula’i mai.
E le gata i lea a’o le mafai lea ona vavae ‘ese fanau o lo’o vaivai i mataupu nei, ae aga’i e tau’ave mataupu o lo’o lelei atoatoa ai e i ai le matāta ‘ese’ese e aofia ai le Fa’akamuta, Palama, Fai Eletise ma isi.
Na vaaia e le Malo, le toe sologa lelei o le fa’ata’otoga o polokalame mo a’oa’oga a le fanau, talafeagai tonu ma le manaoga o fanau o lo’o i ai, i o latou malosi’aga ma vaivaiga.
Fa’ailoa e le Palemia, i le taimi nei, o lo’o mafuli lava le fa’amamafa a le Malo mo Aoga a le Malo lava ia, e ui o lo’o fa’amatu’u atu fesoasoani mo Aoga a Ekalesia ma Aoga Tuma’oti peita’i e le’o lava.
O le mafua’aga lea ua a’e ai se manatu i le Kapeneta, e tatau ona o’o atu i le ogātotonu o le Paea’iga fou o foufou mai, ua mafai ona a’apa le Malo, e fesoaosani i totogi o Faiaoga a Ekalesia ma Aoga Tuma’oti aemaise fo’i o avanoa sikolasipi mo faiaoga e fa’aauau ai le ola a’oa’oina, ia lava tapena ai le ato ponapona auā le a’oa’oina o fanau a le atunuu mo nei ma taeao.
