(OFISA OLE SO’OUPU) I lana Fonotaga Faapitoa o le Aso Faraile 27 Novema 2020, na talanoaina ai e le Kapeneta le Pepa ma faamaonia ai e faapea:
i. Le otootoga o faatinoga o galuega a le Komiti o Faalavelave Faafuasei (NEOC) mo ē ua aafia (cases) i le COVID 19 i Samoa nei;
ii. Le fa’aauau pea ona mulimulitaia o aiaiga o vavao (Orders for State of Emergency) mo le tali atu i le COVID 19 o lo o i ai nei;
iii. Le ave o le faamuamua (priority) mo tagata Samoa, ma ē nonofo i Samoa o lo o poloka i Niu Sila, ma fanau sikolasipi a Samoa ua maea a latou faailoga i Ausetalia e malaga mai i faigamalaga ua fuafua mo le Aso 4 ma le Aso 7 o Tesema 2020;
iv. Le faamalosia o le faia o tautinoga tusitusia (declaration) a pasese uma o le a malaga mai i Samoa nei, pe na aafia muamua pe leai i le siama o le COVID 19. E afua atu lenei aiaiga i le malaga ua fuafua mo le Aso 4 o Tesema 2020;
v. Le faatinoina o faasalaga mo i latou e faia ni tautinoga sesē i le Vaega (iv) o i luga.
O lenei faaiuga na faia i lona tulaga faanatinati e tusa ai ma le Vaega 38(1)© o le Faavae o le Malo Tutoatasi o Samoa.
