Matagaluega o le Soifua Maloloina; Aso 19 Novema 2020
O ananafi sa fa’atino ai uma suesuega test a le aumalaga o lo’o faanofo puipuia nei talu ona taunuu mai ile Aso 13 Nov 2020.
Mai nei suesuega (test) o toatasi ole pasese e toa 274 na malaga mai ma faamaonia ua aafia I auga ole COVID 19.
Peitai o le taeao nei (6:00am) Aso 19 Novema 2020 na toe faatino ai se isi test o lea alii ma ua maua mai ai ua leai ni auga po’o se aafiaga (false negative) ile COVID19.
O lo’o foliga malosi ile taimi nei ma e le o iai ni auga o le faamai.
O lea ali’i – vaa (sailor) na malaga mai le va’alele e toe fa’afo’i mai ai tagatanu’u o Samoa ile Aso Faraile. O loo taofia nei i le potu e vaavaaia ai gasegase faapenei ile Falemai tele TTM i Motootua.
O lo’o mata’itu nei i le Vaega Fa’apitoa e tausi esea ai i latou ua a’afia le falema’i tele i Moto’otua, ma ua mae’a ona logoina lona aiga ile tulaga ua iai. O loo malu puipuia le nofoaga o loo taofia ai ile Falemai.
1. O lenei ali’i na siaki uma pepa fa’amaonia o le faimalaga mai fa’atasi ai ma lana siaki o le KOVITI-19 ma e le’o fa’amaonia ai i lana lipoti ni auga faapea foi ma lana test (suega) sa fai malaga mai ai ina ua taunu’u mai i Samoa i le va’alele (malaga lona 15), Aso Faraile 13 Novema 2020. O lana test foi sa ile malae vaalele ile taimi na taunuu mai ai i Faleolo, e lei maua ai se KOVITI 19.
2. Ua tapena Samoa ile taimi nei faapea ma le falema’i ma le aufaigaluega atoa. E tatalo atu ai le mamalu o le atunu’u o lo’o tapenapena talu ona fa’ailoa mai lenei fa’ama’i ia Mati 2020, ina ia fa’aauau ma fa’atino puipuiga e pei ona fautuaina ai mai le amataga.
3. O le aufaigaluega uma na galulue i le fa’ataliina ma le kiliaina o le va’alele i le Aso Faraile 13 Novema, 2020 mo le pasese e tusa ma le 274 le aofa’i na faimalaga mai, na mulimulitaia uma aiaiga o puipuiga fa’asoifua maloloina.
4. O tagata uma na faimalaga mai, na fai uma a latou talifofoga i totonu o le va’alele ma sa tufaina uma ai fa’amatalaga mo puipuiga a’o fa’anofoesea ai mo le 14 aso.
5. O lo’o fa’atino su’esu’ega ma puipuiga uma fa’asoifua maloloina ina ia mautinoa le taofiofi o le ono pipisi o le fa’ama’i.
6. O le aufaigaluega galulue na fa’atinoina siaki ma o lo’o nafa ma le mata’ituina o nofoaga o lo’o fa’anofo esea ai tagatanu’u uma na faimalaga mai o lo’o mulimulitaia uma aiaiga ma puipuiga fa’asoifua maloloina.
7. O lo’o fa’atino puipuiga malu uma fa’asoifua maloloina ma le fa’aeteete e le aufaigaluega uma o lo’o gafa ma ia nofoaga faapea le ono feso’ota’i ma isi tagata lautele.
8. O lo’o fa’aauau lava le tele o galuega masani i le falema’i i Moto’otua (TTM) vagana le vaega o Fale Fai Nifo ua tapunia le tumau le latou ofisa ae ua faatino le Vaaiga o gasegase tigaina ile Outpatient Clinic. E fautuaina le mamalu ole atunuu ia taofia le soona omai ile Falemai vagana o se mafuaaga tatau.
9. E fautuaina le mamalu o le atunu’u ina ia fa’atino ma tausisi i puipuiga na fa’ailoa atu muamua. Silasila I le upegatafailagi
– www.health.gov.ws OR
– http://www.who.int/…/coronavirus-diseases-covid-19www.who.i…
mo faamatalaga faamaonia I puipuiga mai le Koviti-19.
10. O auala e pipisi ai le fa’ama’i pe a latalata i le tagata ua a’afia pe a tale, po’o faua, po’o fatutale o le tagata ua a’afia; pe a tago i foliga, pe a uma ona tago i so’o se meafaitino, po’o laualuga o nofoaga o lo’o pipi’i ai nei siama.
11. E toe faamanatu atu ina ia fai lau tali fofoga i so’o se taimi, ma ‘alo ese mai nofoaga faitele, ia mautinoa ia 2 mita lou mamao mai le isi tagata, nofo i le fale pe a ma’i aemaise pe a fulu, pe vili le laina vili fua (800 6440) mo fautuaga, pupuni lou fofoga pe a mafatua pe tale, aua ne’i e pa’i i ou foliga, ma ia fufulu mama lima i se fasimoli ma le vai mama i taimi uma po’o le vailaau fufulu lima.
12. O le a fa’ailoa atu ile mamalu o le atunu’u le tulaga o le fa’ama’i e tusa ai ma su’esu’ega ma fa’amataga maumautu lata mai mo le silafia.
Leausa T Dr. Take Naseri
FAATONU SILI AOAO
MATAGALUEGA SOIFUA MALOLOINA
