(26 NOVEMA 2020)
Ua ma’ea momoli lapalapa o malo i le faapolo ma le faasagi e ta’ui ai lo tatou va ma lo tatou Tapaau i le lagi, e fia momoli ai le faafetai i le taitai o le sauniga mo le tapenaga matagofie ma le ma’ea’ea, ia faamanuia pea le Atua mo le galuega folafola ma ia tele ni agaga faaolaina aua le agai atu i le Kerisimasi.
Ua aliitia Palisi Alamagoto o tua o Sinave ma Ulumotootua e afio ai le Alo o Sina, le Faletolu ma le Vaigalepa, tainane o Samoa o potopoto.
Ua afifio foi paia o le Malo i afioga i Minisita o le Kapeneta, o Minisita Lagolago ma Faipule o le Palemene.
Susu Faauluuluga o Matagaluega ma Faalapotopotoga Tumaoti a le Malo. Tainane le loaloa o le auvalaaulia.
O paia ma mamalu na ua agatonu ai lo tatou taeao fesilasilafai.
O le auala lenei e 1,747 mita lona umi. O le Kamupani a le R & R Construction na fausia lenei auala i le tau atoa e $1,540,422.13 ina ua manumalo i tauofoga faalauaitele masani a le Mālō sa faatinoina.
O galuega fa’aauau faifaipea lenei a le Malo o loo faagasolo pea ina ia mautinoa le lelei pea o auala tetele ma auala galue mo afioaga taitasi, o le ala foi lena ua lautasia ai lenei vaega o le auala i le faasoa a le Malo, ona o le toatele o le mamalu o le atunuu o loo alala ma aumau ai.
E le po se silafia o loo feagai le lalolagi ma le faamai o le Koviti peitai e le o mafai ai lava ona tuua galuega ua uma ona fuafua e le Malo ina ia faigofie femalagaina i auala tetele aua le soifua manuia o ona tagata, ma o le a vave ai foi ona siitia atinae tau tamaoaiga e le gata i le laueleele faapea le gataifale, ae maise pe a faafuaseia ona pōia i tatou e le faamai o sasao nei i le lalolagi ao lea ua lelei ma lamolemole le auala mo le faigofie i le agai atu i le falemai.
O le a aoga tele foi lenei auala e sulufai mai ai nuu tu matafaga pe a oo ina lofia e le Tsunami.
O lea ua ma’ea le galuega pei ona outou talosaga mai ai, ae ao foi ona lafo sa outou ma’a aua le saga teuteu ma faaleleia i taimi uma ina ia umi ona lelei lenei auala.
E momoli atu le faafetai ma le faamalo i le Kamupani a le R & R Construction mo le faatinoina o lenei galuega tele i fua faainisinia ma aiaiga sa fuafuaina mo le fausiaina.
Momoli foi le faafetai i le Minisita o Galuega ma Atina’e Tetele, Komiti Faatonu ma le Pulega o Fealauaiga i le Laueleele mo le vaaia ma mata-i-tu lelei o galuega a’o fausia i ona vaega uma i aiaiga ma fua faainisinia, faapea foi i Matagaluega a le Malo ma faalapotopotoga uma i lo latou foi sao tāua i lenei galuega tele.
Faamoemoe pea i le mana o le Alii e tali mai ia tatou talosaga mo fuafuaga uma.
Ia auomanū lenei aso i le alofa o le Atua pulepule tetele.
Soifua.
