SESĒ MA TAUFA’ALEAGA LAFOGA A FAUMUINA WAYNE
Tusia: Tusiga Taofiga
Ua fa’ailoa e le Palemia, e sesē, pepelo ma taufa’aleaga lafoga a Faumuina Wayne Fong e fa’apea, sa avatu le avea’i a le Ofisa ma fa’ailoa atu, a lē fa’ato’ese le Afio’aga o Vaigaga, Ekalesia ma le Komiti o Aoga i le Palemia, e lē fausia se Faleaoga fou mo le Aoga Tulaga Lua.
“O le matuā fa’avalevalea o lena mataupu ua aumai e Wayne, e lē fa’apena ona fa’atino fuafuaga a le Malo, e fa’ata’oto lava fuafuaga a le Malo latou i le faiga o Faleaoga, e lē tau mo’omia ai fua na uiga, o le matuā sesē o lea fa’aāliga,” o le saunoaga lea a le Ta’ita’i o le Malo.
“O le tali sa’o i lea mataupu, e sesē i luga i le masina le manatu o Faumuina, pei o se fa’asilasilaga e lilifa i le itu taufa’aleaga ma fa’a’oloataua, pei e foliga mai o le faiga lea o le Malo lenei, a le fa’atoese le Afio’aga, o le matuā fa’avasivasi o ia manatu fa’apea.”
“E lē fa’apena le faigamalo lenei, e lē sailia ni mamalu ae fai a le mea e tatau ona fai.”
Saunoa Faumuina i le Talanoa Media, ua uma ona fono le latou nu’u ma le Ekalesia, ma e lē faia se fa’atoesega, auā e leai se agasala a le nu’u po’o le Faipule fo’i o le Itumalo i le va feagai ai ma le Malo.
Na manino fo’i i lona manatu, afai ae le faia e le Malo lea Faleaoga, o le a aga’i loa lona nu’u e fa’atino lava le toe fausia o se Faleaoga fou mo le Aoga Tulaga Lua a lona nu’u i Vaigaga.
Saunoa Faumuina, ua uma ona fa’amaonia e le Faletupe a le Lalolagi le seleni e fa’amatu’u mai mo le fausia o se Faleaoga fou i lona nu’u, peita’i o lo’o taofiofi lava e le Malo, ae le’o ni ana tupe.
Na tali le Ta’ita’i o le Malo, Tuila’epa Dr Sa’ilele Malielegaoi, ma ia toe saga fa’amanino atili le aotelega o le mataupu lenei, e pine fa’amau ai le pepelo, sesē ma le taufa’aleaga o ia fa’asalalauga.
“Ua uma ona ou fa’asilasila atu le Faleaoga lea ei Vaigaga, ma le tulaga maoa’e lea e tula’i mai i le Faleaoga, ona o le maoa’e tele o le fuafuaga lea na tu’uina atu i le Kapeneta, e $600 afe lea na totogi e tusi ai na’o le ata o le Faleaoga, ae $1 miliona ma le $200 afe e fai ai le Faleaoga atoa.
“O le tele o Faleaoga Tulaga Lua ia e fausia nei, ei le va o le $300 afe i le $500 afe le tau atoa o le galuega, ae ua ‘ese lea Faleaoga i Vaigaga, e le’i amatalia le galuega, ae ua goto le $600 afe i le na’o le tusiga o le ata, a’o le $600 afe lea e mafai ona fai ai Faleaoga e tolu pe lua, Faleaoga lelei lava toe mautu.”
O le Faleaoga lea na ou alu tatala i Safotulafai, Savaii na’o le $280 afe a’o le tupe na avatu e le Malo Iapani.”
“A outou vaai i le Faleaoga lea ei Safotulafai fa’atasi ai ma le Hall, o le matuā mata’utia le matagofie ma lelei.”
“O le fa’aeteetega lena o le Malo, na ala ai ona toe fetu’una’i ana tonu fai, o le a le tuua loa i Fa’alapotopotoga mai fafo, ae o le a fa’atino loa e le Malo fuafuaga, ma toe fetu’una’i ona fa’atino lea i se tau, e lē o’o inā tau sili ona taugatā, ae o le a fai e le Malo le ata o le Faleaoga e pei fo’i ona fai ai ata o isi Faleaoga.”
“E i ai fo’i le fa’aeteetega a le Malo i le vaai mai a le atunuu, o le a le mea o le a fausia fa’apitoa ai le Faleaoga a Vaigaga i se tau sili ona taugatā, e ono faitio ai le Malo, e foliga mai ua si’i isi ae fa’asavali isi.”
E le’i manino lelei i le saunoaga a Faumuina, po’o ai tonu le Ofisa o le Malo na avatu ai le avea’i mo le faia o se fa’ato’esega a lea Nu’u aga’i le Malo.
E le’i fa’amatala manino mai fo’i e Faumuina po’o a tonu upu o le avea’i, pe se avea’i tu’u fofoga po’o se avea’i tusitusia, a’o le a tonu fo’i le mafua’aga tonu o lea fa’ato’esega.
Fa’ailoa e Faumuina, ua afua ona taofia le fausia o le Faleaoga o lona nu’u, ona ua ia te’ena le finagalo o le Malo, mo le fausia o le uafu tele i le gataifale o Vaiusu.
O le ala lena na fa’ailoa ai e le Palemia, Tuila’epa le fa’aleaga tagata ma le taufa’asesē o nei lafoga na saunoa i ai Faumuina Wayne Fong.
