AOGA FOU SAGATO PAULO I TAFA’IGATA
Tusia: Tusiga Taofiga
O le aoga fou lenei a le Malo, ua fa’atuina i le nofoaga tonu sa i ai le Falepuipui tuai i Tafa’igata ma ua fa’aigoaina o le Sagato Paulo (St Paul’s Academy).
O lona uiga, o se nofoaga sa fai ma togisala o e ua solia le tulafono fa’atusaina ia Saulo mai le Tusi Paia o se Tupu sāua ae ua fa’afouina ma avea o se nofoaga e a’oa’oina ai le poto ma le atamai mo le lumana’i o fanau mo a taeao, fa’atusaina lea ia Saulo o se tagata leaga ua liua e avea ma tagata fa’afouina ma fa’aigoa ai ia Paulo.
Na fa’avaeina lenei aoga mai le Kuata 3 i lenei tausaga fa’alea’oa’oga 2020 ma ua fa’amauina e 358 fanau a le atunuu ua mafai ona a’oa’oina ai mai lava i le aoga fa’ata’ita’i seia o’o i le vasega 8.
E lima nu’u o lo’o ao’oga ai a latou fanau i lea aoga, e aofia ai le Afio’aga o Tafa’igata, Nu’u Fou, Falelauniu, Si’usega ma se vaega o Vaitele.
Saunoa le Pule Lua o lea Aoga, ia Tevaga Lemalu Pio Tevaga e fa’apea, o le fa’afetai i le Malo, ona o le toe fa’afouina atoa o lea nofoaga, ma ua vaaia ai o se nofoaga fou, ua to’omaga i ai fanau o lo’o sa’ili manuia auā so latou lumana’i mo a taeao.
O lenei Faleaoga, o lo’o i ai ana sikulati, o i latou e leoleoina le fanua atoa, ina ne’i satia pe osofaia fo’i e se tasi, e aofia ai ma mea pu’e ata (cameras) o lo’o fa’apipi’i i le lotoā e saga puipui malu ai le saogālemu o fanau ma faiaoga.
E le gata fo’i i lea, ae na fa’ailoa e Tevaga, o se ulua’i aoga lenei i Samoa, ua tofu lava le potu aoga latou ma le Televise e fa’asalalau ai polokalame fa’apitoa mo a’oa’oga a le fanau i aso ta’itasi.
E ui i nisi o manatu ua fa’asalalauina e fa’apea, e le’o sefe lea nofoaga mo aoga a le fanau, e le’o talafeagai fo’i ia fale e a’oa’o ai tamaiti peita’i na molimau le Pule Lua o le Aoga a Sagato Paulo, o le sagisagi fiafia atu o fanau i le aoga i aso uma, ma le si’itia maualuga o le aofa’i o fanau ua maua avanoa e ao’oga ai i lenei aoga, aemaise o le fa’aauau pea ona sa’ili avanoa atu nisi o fanau aoga e ui ua tapunia le avanoa, o le pine fa’amau lea, e leai se leaga ma se a’afiaga o lea nofoaga i mea sa tutupu muamua ai, feso’ota’i i mafaufau o fanau mai lo latou soifua a’oa’oina o lo’o i ai nei.
Fa’ailoa e Tevaga o lo’o malu fo’i le latou aoga ona o le puipuiga a le Komiti o Aoga fa’apea mātua i le fesoasoani atu.
O le mafua’aga lea e lē fa’aitiitia ai le agaga fa’afetai i le Malo, ona o le fa’atotogaina atoa o meāaoga ma meāfale mo le aoga, auā le a’oa’oina o fanau.
O le isi itu tāua o le fa’atuina o lenei aoga, ua latalata ai i nai nu’u o lo’o mamao ma le taulaga, auā le momoliina o fanau ma le toe pikiina atu i taimi amata ma taimi e tuua ai le aoga i vaiaso ta’itasi.
