FA’ASE’ETUĀGALU TUITAMA MAI UPUFAI O LE MALO SAMOA
Tusia: Tusiga Taofiga
O le nofoa’iga fa’ai’u lenei a le Minisita o le Matagaluega o Tinā ma Tama’ita’i, Atina’e o Nu’u ma Agafeso’ota’i o le Faipule fo’i o le Itumalo o A’ana Alofi Numera 1 Sasa’e ia Tuitama Leao Dr Talalelei Tuitama mai upufai o le Malo Tuto’atasi o Samoa (Palemene).
I le mae’a ai ona resitalaina suafa o Sui Tauva mo le Palota Tele i le tausaga fou 2021, ua manino ai le mautu o le fa’ai’uga ma le filifiliga a Tuitama, ua fa’ase’etuāgalu ai e le toe tausinio i le tofi Faipule o lona Itumalo i le Palota tele i le tausaga fou.
Fa’ailoa e Tuitama, o lana filifiliga sa tapena mai lava i le amataga o le paea’iga lenei, i lona talitonuga, ua lava fo’i lana tautua fa’atauva’a mo lo tatou Malo Tuto’atasi e ala i le tofi Faipule.
Na ia fesiligia fo’i se manatu o lana fanau ma lona aiga, e tusa ai ma lana filifiliga ua ia manatu i ai, peita’i o le tali, ia malolo ma mafuta fiafia loa ma lona aiga fa’apea lana fanau, ona ua matua fo’i lona soifua.
Na ia silasila fo’i i tausaga ua ia ausia i le taimi nei, 76 tausaga o lona uiga afai ae toe filifilia e lona Itumalo, na te tau’aveina le tofi Faipule mo le isi lima tausaga, e mae’a atu le paea’iga fou ua 82 tausaga o lona soifua.
Na si’i gasegase fo’i mo le tolu masina i le tausaga ua mavae i Niu Sila, o iina na atili mausalī ai lona mafaufau, o le a malolo mai le fa’agatama o le polokiki.
Mo le silafia, na mua’i nofoia e Tuitama le tofi Faipule o lona Itumalo Fa’aalalafaga i le tausaga e 2001 mai le Itumalo o Fagaloa i lona suafa Leao.
I lena taimi na malosi ai le lagolago a lo latou Ta’ita’i ia Ulāfaigā Talamaivao i le itu Fa’a – Ātua, e pei fo’i ona Palemia ai le Tui – Ātua ia Tupua Tamasese Efi ma o le mafua’aga lena na lagolago malosi ai e lona Itumalo le Vaega Fa’aupufai a le S.N.D.P. i na ona po.
Peita’i ina ua toe filifilia mai o ia i le tofi Faipule o lona Itumalo mai le 2006 – 2011 na ia talosaga i le Ta’ita’i o le Fa’afaletui a le H.R.P.P. e fia avea o ia ma Sui o lea Vaega Fa’aupufai, i lona talitonuga o lo’o pulea lelei ana ta’ita’iga ma maopoopo ana tulafono e lima ta’ita’iina ai ona Sui Auai.
I lena nofoa’iga, na filifilia ai o ia e le Minisita o le Matagaluega o le Soifua Maloloina ia Gatoloaifa’ana Amataga Alesana – Gidlow e avea ma Minisita Lagolago o lea Matagaluega.
I le paea’iga na soso’o ai mai le 2011 – 2016 na suia ai le Itumalo e tauva mai ai i le Itumalo o A’ana Alofi Numera 1 Sasa’e e fa’aāoga ai lona suafa Tuitama i Faleasi’u.
O lea lava paea’iga na tusi aao ai le Palemia, Tuila’epa Dr Sa’ilele Malielegaoi e avea Tuitama ma Minisita o le Matagaluega o le Soifua Maloloina.
Na toe fa’aauau lona tofi Minisita mo le isi lima tausaga i le nofoa’iga o lo’o fa’aauau pea mai le 2016 – 2021, seia toe tofia e le Palemia na te tau’aveina le tofi Minisita mo le Matagaluega o Tinā ma Tama’ita’i, Atina’e o Nu’u ma Agafeso’ota’i i le masina o Mati o le tausaga 2019 seia mae’a aloaia i le tausaga fou 2021.
Fa’ailoa e Tuitama ua to’aiva nai ona alo ae le aofia ai fanau a lana fanau.
E tusa ai ma lana filifiliga ua ia se’e ‘ese mai ai i le tulaga o le polokiki, na momoli ai lana fa’afetai fa’apitoa i lo tatou Matai Sili, le Atua Silisili’ese ona o le amanaia o ia ma fa’atumatila lona tagata fa’atauva’a e ala i nei tofiga fa’alemalo.
Na ia fa’afetaia fo’i le amanaia o ia e le Afioga i le Palemia, Tuila’epa Dr Sa’ilele Malielegaoi, ma le talitonuina o ia ma lona fa’atauva’a, e tau’ave ai le tofiga Minisita o le Kapeneta mo lenei 10 tausaga.
Fa’ailoa e Tuitama, o lana filifiliga e malolo, sa fausia mai lona loto atoa, ae le’o se isi tulaga i tua atu.
Na ia fa’afetaia fo’i ona Itumalo e lua, ia Fagaloa ma A’ana Alofi Numera 1 Sasa’e e tusa ai ma le fa’aeaea sa tu’uina atu ia te ia, na te tau’aveina ai le tofi Faipule o lo latou Itumalo mo le 20 tausaga.
