MO LE MALUPUIPUIA O TINA MA LE FANAU TEINE- FAUTASI O TOA
Tusia: Asenati Taugasolo Semu
O le taofia o le sauaina o tamaitai ma fanau teine, o le fafagu lea ma le taulogologo a le Malo o lo o faailoina pea.
O lea tulaga na saunoa ai le Afioga i le Palemia, Tuilaepa Sailele Malielegaoi i le sauniga faapitoa e aloia ai le sauni atu o le Fautasi o Toa e aloina e tama’itai mo le tuuga faitasi a le Malisi e faia i le Aso Faraile nei.
O lea tuuga e lima fautasi e tauva ai, ma e aloina e alii isi fautasi e fa, ae o le Fautasi o Toa, lea o lo o i lalo o le taitaiga a le tama’ita’i faiaoga lauiloa o Vaimasenu’u Zita Martel.
I le saunoaga a le Palemia, na ia momoli ai le faamalo mo le tapenaga o lenei faamoemoe, ma ia faamanatu ai le sao o Samoa i le faalauiloaina o lenei mataupu faapea le lagolagoina o le faamoemoe o lo o loma nei.
“O le aso lenei e faa’autu i le lu’i a tamaitai alo fautasi, a o se avanoa lelei ua faaaoga e toe fagufagu mai ai pea le feau mo Samoa atoa ina ia taofia nei le sauaina o tamaitai ma fanau teine,” saunoa ai le Palemia.
“O se lu’itau foi mo taitai o Malo, taitai o nuu, ma taitai o Ekalesia. Ma o le ki ma le tatala e foia ai le mala lenei, o le mea moni lava, e le o lava le faamamafa e tatau ai i le faamalamalamaina lelei i le atoatoa i matua o le uiga loloto o le meaalofa sili a le Atua i le tagata.”
Na saunoa Tuilaepa e le o lava tagata e momoliina le feau taulogologo lenei ma e tatau ona galulue faatasi tagata uma.
“O le mea moni e le o taitai ona lava tagata ua lava tapena i le tatou atunuu e faia le galuega faa-Samaria agalelei i Samoa nei e molimoli ai le feau i le lototele ma faafeagai ai ma faigata masani o le talanoa i le gagana tu’usa’o e malamalama gofie ai le tane ma le fafine io la tiute faale-ulugalii ia faatino le finagalo o le Atua e pei ona faapaia ai i le sauniga o le sakalameta o le faaipoipoga.”
Na saunoa foi Tuilaepa i le tele o faafitauli i totonu o aiga faapea le va o le tama ma le tina, ma ua oo ai i tulaga o le faia o sauaga i totonu o aiga.
Ae o le faamoemoe o le Fautasi o Toa, na faaailoa ai le agaga o le lagolago a le Palemia ma tuuina atu lana lu’i mo le auvaa.
“Mo outou o tamaitai alova’a, ma la tou lu’i ua tuuina atu nei i le tuuga fautasi o lo o foufou ma alii alova’a a le Malisi, ia o outou māmā na.
“E le taumatea lo tou lava tapena i lalo o le taitaiga a le uluai kapeteni siamupini tamaitai i Samoa o Zita Martel.”
Na faailo ai foi le loa o tausaga o faiaoga Vaimasenu’u i tuuga fautasi, e pei ona manumalo ai Don Bosco i tuuga i Samoa nei ma Amerika Samoa.
“I faagatama o le tai… na manumalo ai i ipu o tuuga fautasi e le gata i Samoa nei ae faapea foi ma Amerika Samoa, i le fautasi tautaua o le Segavao na alo e tama aoga o le Don Bosco, a o le fautasi foi a le matou aulotu i Siusega, ma e le i oo lava i se tulaga mataga. O lea la ou te ofo i a’i latou o le a aloina lenei vaa ae le mua.”
Na saunoa foi le sui o Malo Aufaatasi i Samoa, Jorn Sorensen ma faailoa le lagolago mo lenei faamoemoe.
Na ia saunoa faamanuia foi mo le Fautasi o Toa aemaise o le lagolago a le Malo Aufaatasi mo le tineina o le sauaina o tamaitai ma fanau teine e le gata i Samoa ae o le lalolagi atoa.
