FESILIGIA E LE PALEMIA LE TOMAI O FAUO’O
Tusia: Tusiga Taofiga
Ua fa’ailoa e Fauo’o Fatu Tielu o le sa avea ma Pule Sili o le Polenisia i tausaga ua mavae, sa tatau ona ‘ave le fa’amuamua a le Malo i femalaga’iga i le va o Samoa ma Tutuila ae ta’atia malaga fa’avaomalo mo isi atunuu tetele e fua i tupe maua, o se manatu na fa’ailoa e le Palemia, e pu’upu’u ma va apiapi lona mafaufau.
Mo le silafia o Fauo’o sa le’i mana’o e talia le talosaga a se tasi o Kamupani Va’alele le Samoa Air a’o Pule Sili i le Polenisia, ina ia tu lau’ele’ele ai i Fagali’i mo ana faigamalaga, i lona talitonuga e fa’aletonu ai tupe maua a le Polenisia a le Malo.
Ae na talia lava e le Palemia ma le Kapeneta le talosaga o iina na afua ai ona tu’uina atu lana tusi fa’amavae mai lona tofi Pule Sili.
Saunoa le Ta’ita’i o le Malo, Tuila’epa Dr Sa’ilele Malielegaoi, sa leai sona manatu e toe lagā e Fauo’o nei mataupu, auā e tatau ona iloa e Fatu e lē mafai ona le o’o mai ia te ia ana fa’amatalaga.
Peita’i saunoa Tuila’epa e fa’apea;
“O lea ua o’o mai ia te a’u ana fa’amatalaga sa fai, o le fa’alavelave a lea o nei mea o tulī, e lele loa le tulī ma valaau i tagata, o a’u lea o le tulī o lea ua ou lele, o le leaga ia o le amio a lea manu.
“O le matuā tele pu’upu’u ma le va apiapi o le mea lena e mafaufau i ai, na’o le pau a le mea lea e tele ai lana fa’autautaga o va’alele laiti ia, i le lele atu iinei aga’i Tutuila ma toe fo’i mai.
“A’o le mea lea e vaai i ai tagata fai mafaufau, o lea e fia vaai i le lalolagi, ma tatou tagata e fia malaga i fafo, i le lalolagi tele i fafo ae la’ititi a si mea lena e tau i ai lona mafaufau ma e na’o mea laiti lava e mafai ona o’o i ai lona mafaufau, e lē iloa fa’alautele lona mafaufau i le mea e tatau ona fai.
“Ou te matau atu sa fa’apea na polōfiti le Polenisia i lona taimi, e tatau ona polōfiti tama’i va’alele ia e tolu, leaga o ia lea e fealua’i to’atasi i le va o iinei ma Tutuila o lea e hold iga le monopoly, tusa a la pe moe pe incompetent auā e leai se tauvaga.
“E fa’apena fo’i i le tatou va’a lea e alu i Savai’i, ona e le’o i ai se tauvaga o faia ai, e lē mafai ona e iloa ai le tomai o lo’o i lea tagata.
“Ina ua tula’i mai le Samoa Air, ua tatala fo’i femalaga’iga ma ua ua fia malaga atu fo’i i Fagali’i e lē fia malaga mai Faleolo, i le mafua’aga, so’o se fai pisinisi e fai le faiai, na te iloa ai e telē atu le tupe e maua pe a lele atu i Fagali’i aga’i Tutuila ma toe fo’i mai Fagali’i, nai lo le toe alu atu i Faleolo aga’i Tutuila ma toe fo’i mai aga’i sa’o i Faleolo, e telē le tupe e alu ai i le penisini.
“O la e fa’aāoga le faiai o le palagi lea, e talosaga mai ai e fia maua so latou avanoa e lele mai ai i Fagali’i a’o Fagali’i na’o le Polenisia la e lele mai ai, o la e tele tupe a le Polenisia, e lē mafai la ona tauva si va’a lea ma le Polenisia, aemaise ai o le Polenisia o le va’a a le Malo, a’o le Samoa Air o le Va’a a tagata i tua o lea e tau fa’aolaola, a’o le itu lea e mana’o i ai le Malo ia ola le Polenisia ola le va’a lea, auā e le lelei ai pea le Polenisia i taimi uma, a’o le mea tāua ia lava va’a e lelei ai o tatou tagata i Tutuila ma felelei mai ai tatou tagata mai Tutuila iinei.
“Ua e vaai la i le ‘ese’ese o le mafaufau pu’upu’ū ma le mafaufau e umī, na’o le pau a le mea la e tilotilo ia i ai, o la e tilotilo i le tupe māma, ae le’o tilotilo i le vaaiga lautele, i auala e o ai o tatou tagata i Tutuila ma toe taliu mai ai, aemaise o se va’a tele e malaga ai o tatou tagata mai iinei aga’i Fiti, Ausetalia ma Niu Sila.
“Ua e vaai la i le pu’upu’ū o le mea lea na o’o i ai, o le mafua’aga lena na ou talanoa atu ai, afai sa e faigaluega i le Malo, ma e alu ‘ese atu ma le Malo, gugū, ‘aua e te talanoa, auā o lou talanoa so’o i mataupu nei, e atili ai le telē o le fa’aletonu ia te oe.
“A’o le Su’e Tusi le tagata, e tatau ona atamai, a’o le fa’alautele la e ia o nei mea, e iloa ai le vaapiapi tele o le mea na saofa’i ai, ina ua taumafai loa le palagi e fia fa’aola lona va’a, talosaga mai loa i le Malo, o le Malo la, e lē tatau ona faimea fa’apito, e tatau ona lautele lana vaai, o lea o le a i ai le isi va’alele e fai le tauvaga ma le tatou va’alele, o i fa’atoa ala ai le mafaufau o le Pule.
“O lea o le a maua ai le avanoa i tagata lautele a fa’aletonu le Polenisia, a’o lea e i ai le isi va’alele e felelei ai. I le vaaiga la a a’u ma le Kapeneta, e tatau ona tele va’a, auā o le manuia lautele, o le tele o va’a e felelei ai o tatou tagata, ma fai ai le tauvaga ma vave ai le auaunaga ma tau tu’uitiiti ifo ai i lalo tau o pasese.
“Manatua la, avatu loa la’u fa’atonuga, o le a talia le va’a lea a le Samoa Air e malaga atu i Fagali’i e tutusa ai le tauvaga, ae lele mai lana tusi matagā ma fa’apea mai, e lē tatau ona faia lea mea valea, ma e leai se kamupani a le Malo e mana’o e gau ma ia fa’aleleia mea uma.
“Manatua la o le Malo e lautele lana vaai e fa’aolaola uma pisinisi, ae musu e fai, ona ou otegiaina loa lea i la’u tusi na ‘ave i ai, vaai oe, tatala le va’alele ma fai tauvaga, ma o lea o le a ou fa’apea atu, e o’o mai i le taimi lenei, ou te le’o iloa po’o atoatoa lou lelei, leaga na’o oe lea e lele le va’alele, ae a alu atu loa le Samoa Air ma lua felelei fa’atasi mai Fagali’i i Tutuila ma toe taunu’u mai Fagali’i, o inā ou te iloa ai lou lelei, this will bring out the best in you, a’o le mea lea e te i ai o lea e te i le lalolagi mo tausaga e fia, ae le’o iloa tonu po’o a au mea o fai ona e le’o i ai se tauvaga o faia.
“E mafai a la ona e nofo ai iina ma e incompetent ai pea, ae maua a tupe, tusa pe aga’i i luga tupe, ae le mafai ona sa’ili tonu lou tomai ma le ituaiga agava’a o lo’o ia te oe, leaga e leai se isi va’a o lua tauva.
“Ae lele mai le isi ana tusi, e sili ai la ona tapuni le va’a, ona ou tusi loa lea i ai, vaai oe atali’i, e lē mafai ona iloa sou lelei, pe a le faia le mea lea ou te faiatu ai, ae afai e te palaai, e leai sou ake, ona e faia lea o le mea e tatau ona fai, ou te le’i ta’uina i ai le mea e tatau ona ia faia.
“Ae ua nofo lava ia ma fa’auiga, le mea e tatau ona fai, ona aumai ai lea o lana tusi fa’amavae, o ia a la na fa’amavae mai.
“Alualu pe le Samoa Air, sau loa le Talofa Air, o’u fesili atu i le Pule o le Talofa Air, o ai lena e Pule i lau Kamupani, ae faimai o Fatu, ona ou fai loa lea i ai, e lelei tele Fatu, e lelei i le fa’amaumauina o fuainumera, a’o se isi a mea e matuā le lelei.
“Manatua la i taimi na alu ‘ese ai le ali’i lea, sa tumau pea ona maua polōfiti a le Polenisia i le Pule fo’i sa i ai, ona o lo’o fulisia lava i faigamalaga a tagata femalagaa’i i le va o motu e lua, le auaunaga a le Polenisia.
“Ua te’i le Pule Fou o le Polenisia i le o’o atu o le talosaga a Fatu, manatua la o lo’o lele mai lava le Talofa Airways i Faleolo aga’i Tutuila, fa’amolemole fia maua se avanoa e lele mai ai le matou va’alele mai Fagali’i i Tutuila ma toe fo’i mai, ina ia fa’aleleia ai matou tupe maua.
“E tilotilo atu Seiuli Tupuivao Alvin Tuala o lo’o i ai le tusi a Fauo’o Fatu sa ave i le Pule a le Samoa Airways e te’ena ai le latou talosaga, ona ia toe taina atoa lea o upu o le tusi lea e Tielu, sui le Aso ma le Nofoaga e ‘ave i ai, sui ma le saini a’o upu lava e tasi.
“Avatu loa tilotilo ane Fatu, fali’i ai loa lea, ae na ou faia lava le i’uga ma felelei tasi mai ai i Fagali’i.
“Manatua ai lea o upu a le tatou Ali’i Fa’aola, o lo’ manino mai i lana Afioga Paia, fai i isi pei ona e mana’o fo’i e fai mai e isi ia te oe, o lea la fa’atoa iloa ai ii e Fatu e sa’o la’u fa’ai’uga na fai i le taimi muamua lea sa to’atama’i ai.
