FA’AMANINO E LAUTIMUIA LE MATAUPU I SEILA SAMOA
Tusia: Tusiga Taofiga
O le tusi ua fesiligia e nisi e fa’apea sa tu’uina mai e se ta’ita’i auva’a ia Rocco Maresca i Naples, na fa’ailoa manino e le Pule Sili o le Auaunaga o Va’a a Samoa (SSS) ia Lautimuia Afoa Uelese Vaai,, o se vaega lea o a latou fe’utana’iga i le amataga, a’o taumafai ai e toe fa’afo’i mai nisi o tatou tamafanau ua mae’a Konekarate i luga o va’a la’upasese ma va’a la’u oloa.
Fa’ailoa e Lautimuia, o lea ali’i ta’ita’i auva’a, o lo’o galue i luga o le va’a la’u oloa, ma e na’o le to’a 64 fanau Samoa o lo’o galulue ai i lea Kamupani.
O le manatu o lea ali’i ia tatala loa tatou malae va’alele mo femalaga’iga e aunoa ma ni tapu, ae se’i tu’uina mai fanau ua mae’a Konekate.
Peita’i e le’o māma i le silasila a le Malo, auā o lo’o malu puipuia lava fanau i nofoaga o lo’o nonofo ai, e le’o mapu fo’i feso’ota’iga a le SSS ma Pulega o ia Kamupani, i le tausiga o i latou nei, ina ne’i fa’atatope ona malaga mai, ae ono a’afia ai se tasi i le Koviti – 19 i atunuu o le a afea.
Saunoa le Pule Sili, e lua ituaiga kamupani o lo’o galulue ai tatou tamafanau, o le kamupani va’a la’upasese ma le kamupani va’a la’u oloa.
E 259 fanau o lo’o galulue i luga o va’a la’upasese ae na’o le 64 o lo’o galulue i va’a la’uoloa, lea o lo’o galue ai fo’i ma le ta’ita’i va’a e ona le imeli.
Peita’i ua i ai nisi o i latou nei, ua fuafua o le a toe taliu mai Samoa i faigamalaga fa’apitoa tu’usa’o o totoe o lenei tausaga.
O ia faigamalaga o le a malaga mai ai le to’a 27 o seila ua fa’amaonia avanoa e omai ai i le malaga a le Air NZ i le Aso 13 Novema 2020 mai Aukilani i Apia, ae 150 seila o lo’o tapena i le taimi nei mo le fa’amoemoe e omai i le va’alele a le Air NZ malaga tu’usa’o mai LA Amerika i Samoa nei Aso 27 Novema 2020. Oi latou uma nei sa galulue i luga o va’a la’upasese.
Peita’i e to’a 6 i latou o lo’o galulue i luga o va’a la’u oloa o le a malaga mai i le malaga o le Aso 27 Novema 2020.
Fa’ailoa e Lautimuia, o i latou o le a toe taliu mai Samoa, o nisi ua mae’a konekarate, o isi e le’i mae’a konekarate peita’i ua talosaga mai, ua toe fia fo’i mai i aiga, a’o nisi ua mae’a konekarate, ae ua talosaga mo nisi avanoa faigaluega e galulue ai.
“O lo’o saogālemu uma lava seila Samoa o lo’o i luga o va’a i le taimi nei, o lo’o i ai fo’i foma’i i luga o va’a o lo’o latou faia siaki mo seila, o lo’o lelei fo’i tulaga tau taumafa, atoa ai ma vaega o lo’o nonofo ai, o lo’o lelei le vaaiga o alo ma fanau ma o lo’o saogālemu fo’i i luga o va’a uma o lo’o galulue ai.
Fa’ailoa fo’i e le Ofisa Sili o Pulega, o lo’o matuā malu puipuia ma saogālemu le nonofo ai o tatou fanau i luga o va’a auā e le’o malōlo feso’ota’iga i taimi uma a le Pulega o Auaunaga o Va’a a Samoa – Samoa Shipping Services ma Fa’auluuluga o nei Kamupani.
O lo’o fa’agasolo fo’i i le taimi nei, le auina atu o a tatou fanau ua fa’amanuiaina i avanoa e 80 sa talosaga mai ai nei kamupani va’a i malaga fa’apitoa a va’alele.
O lo’o i ai fo’i le fa’amoemoe a le Pulega o Auaunaga o Va’a a Samoa, o le a fa’aauau pea fe’utana’iga mo le auina uma mai o seila Samoa ua mae’a konekarate i faigamalaga togipau fa’apitoa o totoe o lenei tausaga.
