FESOASOANI A LE MALO MO LE AUFAI FA’ATO’AGA
Tusia: Taunuuga Toatasi
O lo’o ta’imua pea le Malo i le unaia ma le sailia o fesoasoani talafeagai mo le aufai fa’ato’aga i le atunuu, aemaise o le fa’amalosiau mo le atunuu lautele ina ia galuea’ina o tatou lau’ele’ele.
O le ala lea o le fa’aauau ai pea ona fa’asafua atu e le Malo tauala atu i le Matagaluega o Fa’ato’aga, tiapula i Sui o le Malo mo le tufatufaina i le aufai fa’ato’aga i nu’u ta’itasi, o se tasi lea o vaega o fesoasoani a le Malo mo le a’afia ai o le tamaoaiga o le lalolagi ona o le fa’ama’i le Koviti – 19.
Ua mae’a ona fa’agasolo le vaega muamua o fesoasoani a le Malo, e ala i le fa’asafua o tiapula mo le aufai fa’atoaga, ina ia u’unaia pea le totōina o le talo, e tua i ai le atunu’u aemaise o aiga.
I le feiloa’iga a le Savali ma le Minisita, Lopao’o Natanielu Mua na ia fa’aālia ai e fa’apea, e silia ma le 600,000 le aofa’i o tiapula sa mafai ona fa’asafua i le polokalame o le fesoasoani (stimulus package) a le Malo i lona vaega muamua (phase one).
“E i ai le talo fou lea ua i ai, o le talo vave, e fa’aigoa e isi o le talo fa (4) masina.”
Ua fuafua le Matagaluega e amata le vaega lona lua o fesoasoani a le Malo, ae o lo’o fa’agasolo pea le tufatufaina o tiapula.
“O le taimi lenei o Sasina la ua o’o i ai le fa’asologa o tiapula.”
“O le Itu Asau e 10 afio’aga o lo’o i ai, e aofia ai Asau, Auala, Vaisala, Fagasa, Sataua, Papa, Falealupo, Tufutafoe ma Falelima.
O le fautuaga a le Matagaluega e pei ona saunoa Lopao’o, e amata mai le polokalame i le Itu Asau, ona e fuafua i le tulaga o le tau.
“O le fa’avae o le fautuaga a le Matagaluega, ona o le itu pitosili lea ona vevela o le atunu’u i vaitaimi o mugalā.
O le vaitaimi lenei aga’i i le masina fou, o taimi lelei ia i le totō o le talo i le Itu Asau, a misi le masina lenei ma le masina fou, ae fuafua e tufa i le tausaga fou, e ma’imau le taimi, e ma’imau ai tiapula, o le fa’aopoopo lea a Lopao’o.
“O le talo e 6 – 8 masina ua lelei, a’o le Itu Asau e o’o atu lava i le 10 masina fa’atoa lelei, ona o le tulaga i le tau.”
O le mafua’aga lea e pei ona saunoa Lopao’o, e o’o loa ia Aperila aga’i ia Setema o tausaga ta’itasi, ona tapu loa lea ona toe mumū se afi i le Itu Asau, ona e faigofe ona a’afia i mu.
O lo’o fa’agasolo fo’i le tu’uina atu o tiapula mai le itu Fa’asaleleaga aga’i i le Itu o Tane, ona o taumafaiga a le Matagaluega ina ia vave ona fa’asopolia le atunu’u atoa i le fesoasoani lea a le Malo.
O lo’o aga’i pea asiasiga a le Matagaluega, auā le mata’ituina o vaega uma o le atunu’u o lo’o mo’omia ai tiapula, ina ia ‘aua ne’i misi.
E pei ona silafia, o le galuega fa’atino a le Matagaluega, o lo’o va’ava’alua ma Sui o le Malo i totonu o nu’u ma afio’aga, ina ia mautinoa, o lo’o lelei ma atoatoa le fa’asoasoaina o tiapula o lo’o maua.
E lē fa’apea e uma ona tufatufa tiapula ona ta’atia ai lea, e i ai sui o le Matagaluega o Fa’atoaga latou te toe asia nu’u ma afio’aga aemaise i latou na tufatufa atu i ai tiapula, o le fa’aopoopo lea a Lopao’o.
O le talo fusi, talo salani ma le talo vave, lea o lo’o tufatufa atu e le Matagaluega mo le aufai fa’ato’aga ma nisi o le mamalu o le atunuu.
