FA’ATUINA I SAMOA LE NOFOAGA AUTU MO TA’ALOGA A LE PASEFIKA
Tusia: Asenati Taugasolo Semu
Ua aloaia le filifilia o Samoa e fa’atu ai le Ofisa Autu ma avea fo’i ma nofoaga tutotonu fa’apitoa mo taaloga a le Pasefika (Pacific-Aus Sports Hub).
O lea fa’amoemoe na fa’ailoa aloaia i le vaiaso ua mavae, i le sauniga na saunoa ai le Afioga i le Palemia, Tuila’epa Dr Sa’ilele Malielegaoi.
O se tasi lenei o atina’e ua talia e le Malo o Ausetalia e fa’atuina i Samoa, o se fa’amoemoe na fa’ailoa e Tuila’epa, ua atili tu mati’e ai le tulaga o ta’aloga mo le Pasefika aemaise tamafanau a Samoa.
Saunoa le Palemia, e maualuga le fa’atāua a le Malo e ‘ave i ta’aloga ona e le gata i le itu tau soifua maloloina mo tagata lautele ae fa’apea i le atina’e o talavou ma le mafai ona auai fa’atasi o tagata uma.
Na fa’ailoa fo’i e Tuila’epa le sao o Samoa i le tulaga o ta’aloga fa’avaomalo ma le tulaga gafatia o le ta’imua ai i le Pasefika, e pei ona talimalo ai mo Ta’aloga a le Pasefika i le 2019, e ui e pu’upu’u le taimi na tapena ai.
“E maua ai avanoa mo tagata Samoa e tauva ai i ta’aloga fa’avaomalo, fa’apea fo’i ona tatou mitamita ai i le tulaga maualuga o le tauva ai o Samoa ma isi atunuu tetele i tulaga tau ta’aloga,” saunoa ai le Palemia.
“O se auala fo’i e saili manuia ai tatou fanau mo le lumana’i, pe afai e le taulau o le fa’amoemoe i tulaga tau a’oa’oga.”
Na talosaga fo’i e le Palemia le lagolago o lenei nofoaga autu mo ta’aloga i le si’itia atili o le atina’e o ta’aloga i Samoa ma le Pasefika, ae le gata i lea, o le a avea lenei nofoaga autu e saga fa’atupulaia ai pea so’otaga lelei i le va o Ausetalia ma lenei itulagi o le Pasefika.
