O SOU MANATU!
Ua silasila Samoa i le tu’uga fautasi o le fa’amanatuina o le 70 tausaga o le Malisi i le vaiaso ua mavae. I lea fa’agatama na molimauina ai le tulaga maoa’e o le taumafaiga a le Fautasi o Toa sa aloina e tama’ita’i, lea na tulaga lua i lea tu’uga ma ua taunu’u ai upu a le atunuu, e au le inailau a tama’ita’i.
O le a sou finagalo, e talafeagai ma tatau ona fa’amalosia le auai o se au a tama’ita’i i se isi tu’uga fautasi i le lumana’i?
Vanila Natapu
44 tausaga o Apolima – Tai
E au le inailau a tinā. O lenei tu’uga fautasi ua tatou molimauina ai le fautasi na alo e tama’ita’i. E mafai lava e tama’ita’i ona tauva i tu’uga fautasi. E i ai lo’u talitouga, a lelei ma fa’amaoni i toleniga, e leai se mea o le a fa’aletonu ai fua se fautasi a tama’ita’i pe a tauva.
O lea tatou te aga’i i le lumana’i, afai fo’i e i ai se fuafuaga a le Malo ma i latou o lo’o gafa ma ta’aloga, e fa’aauau ai lea tu’uga fautasi tinā ma tama’ita’i, ou te iloa o le a taunu’u i se taunu’uga lelei. E leai lava se ta’aloga e lē mafai ona fa’atino e tama’ita’i. O lea ua i ai le au lakapi a Samoa i le vaega o tama’ita’i, au si’isi’i u’amea mamafa, au fusu, au voli, ma isi lava ta’aloga, o lo’o i ai lava au a tama’ita’i.
Peita’i, o le fa’agatama lea i le tai, ou te talitonu o lea fa’atoa tauva lava lea o se au a tama’ita’i i le tauvaga lea, ma e manaia fo’i ae fa’aauau ai pea ona fai. Atonu e o’o atu i nisi tausaga oi luma, fai se tu’uga fautasi, a’o la ua lava tapena fautasi a tama’ita’i e tausiniō i lea tu’uga. E i ai fo’i lo’u talitonuga manaia ae fai se tu’uga fautasi pe ta’i lua i le tausaga mo le na’o tama’ita’i.
O SOU MANATU!
Ua silasila Samoa i le tu’uga fautasi o le fa’amanatuina o le 70 tausaga o le Malisi i le vaiaso ua mavae. I lea fa’agatama na molimauina ai le tulaga maoa’e o le taumafaiga a le Fautasi o Toa sa aloina e tama’ita’i, lea na tulaga lua i lea tu’uga ma ua taunu’u ai upu a le atunuu, e au le inailau a tama’ita’i.
O le a sou finagalo, e talafeagai ma tatau ona fa’amalosia le auai o se au a tama’ita’i i se isi tu’uga fautasi i le lumana’i?
Nuumaalii Fialelei Petelo
51 tausaga o Luatuānuu
Matuā 100% le fuafuaga lena mo le lumana’i. O tu’uga fautasi, e agava’a uma ai tagata, e aofia ai ma tama’ita’i. O lea tatou te savavali aga’i i luma, auā i aso ua tuana’i, sa na’o ali’i na tausiniō i lea fa’agatama peita’i, e aga’i i luma le olaga, ua i ai fo’i suiga, ae le’o se suiga leaga, o suiga lelei. Auā o lea ua maimoa Samoa i le tu’uga fautasi sa faia ma molimauina ai, e mafai fo’i ona tauva tama’ita’i i lenei ta’aloga.
E i ai lo’u taofi, atonu e alu alu aso avea le tu’uga fautasi ma ta’aloga fa’avaomalo, ona laki uma atu ai lea o isi alo ma fanau a le atunu’u, mo ta’aloga fa’avaomalo. Ae tatou va’ava’ai pea, manaia ae fa’ataunu’u se isi aso fa’amanatu o se isi Fa’alapotopotoga, ona fa’atino lea o se isi tu’uga e tatala ai le avanoa mo au a alii ma tama’ita’i. Atonu e alu alu ia tu’uga, mua se va’a a tama’ita’i i va’a a ali’i, pe afai tatou te toa’aga e fai ma saga fai, ona tatou faia laia o le tala a le isi toeaina, tatou tago i ai e fai, e fai fai a lelei.
O SOU MANATU!
Ua silasila Samoa i le tu’uga fautasi o le fa’amanatuina o le 70 tausaga o le Malisi i le vaiaso ua mavae. I lea fa’agatama na molimauina ai le tulaga maoa’e o le taumafaiga a le Fautasi o Toa sa aloina e tama’ita’i, lea na tulaga lua i lea tu’uga ma ua taunu’u ai upu a le atunuu, e au le inailau a tama’ita’i.
O le a sou finagalo, e talafeagai ma tatau ona fa’amalosia le auai o se au a tama’ita’i i se isi tu’uga fautasi i le lumana’i?
Lesāisaea Tasesa Loli
48 tausaga o Vaitele- Fou / Papa Sataua
O le mataina lenā o se tu’uga pe afai e tausiniō ai le itupa o tama’ita’i, ae se’i silasila Samoa i le tulaga ua i ai le malosi o tama’ita’i i nei vaitau. O aso ia sa patino lava va’a e aga’i ai tama’ita’i e alo ai, a’o aso nei, ua tatou molimauina, ua fa’ata’ita’i tama’ita’i i le aloina o le fautasi, ma atonu e i ai lava le aso, e suipi ai se fautasi a tama’ita’i i se tu’uga.
Ua atagia mai i lenei tu’uga, le aiā tutusa o alii ma tama’ita’i i ta’aloga. Auā o le tu’uga fautasi lava ia, o ali’i e fa’atinoina, peita’i o lea ua tauva ai ma tama’ita’i, e i ai le talitonuga, ua tatau fo’i ona fa’aopoopo ma tama’ita’i i totonu o lea fa’agatama. Ua atagia mai ai fo’i i le tu’uga i le vaiaso na se’i mavae, e lē mama’i le alo a tama’ita’i sa fa’afoea le fautasi lea na ta’ita’i mai e Vaimasanu’u. O le ta’ita’i fo’i, o se tagata ua lauiloa i lea fa’agatama, e pei ona ia ta’ita’ia ai le au a le Segavao lea sa tele ina manumalo i tu’uga fautasi i tausaga ua mavae. O le tagata ua leva i le tauvaga, ma o lo’o atagia ai fo’i le tulaga o ta’ita’iga lelei, o le maopopo ma le fealofani o tama’ita’i o le atunu’u. Ae mo le aga’i i le lumana’i, tatou tu’u atu pea i le Malo, afai lava o a ni aso fa’amanatu a le atunu’u e finagalo le Malo e fai ai se tu’uga fautasi, ona tatala lea o le avanoa mo au a ali’i ma tama’ita’i, ou te iloa o le a to’atele ni au a tama’ita’i o le a tausiniō.
O SOU MANATU!
Ua silasila Samoa i le tu’uga fautasi o le fa’amanatuina o le 70 tausaga o le Malisi i le vaiaso ua mavae. I lea fa’agatama na molimauina ai le tulaga maoa’e o le taumafaiga a le Fautasi o Toa sa aloina e tama’ita’i, lea na tulaga lua i lea tu’uga ma ua taunu’u ai upu a le atunuu, e au le inailau a tama’ita’i.
O le a sou finagalo, e talafeagai ma tatau ona fa’amalosia le auai o se au a tama’ita’i i se isi tu’uga fautasi i le lumana’i?
Motoi Tino Mapusua
57 tausaga o Sauano Fagaloa
Fa’afetai ua lagā le mataupu lenei, o se mataupu e fa’atupu manatu ia tatou uma. Auā e i ai lo’u taofi, o le olaga lenei e aga’i i luma. Atonu e o’o atu i se isi tausaga ua fai ni tu’uga e na’o tama’ita’i lava e tauva ai. I la’u matamata atu i le tu’uga fautasi lea sa fa’atautaia i le vaiaso na se’i mavae, se tailo fo’i i le alo a le itupa o ali’i pe maua le saoasaoa o alo a tama’ita’i i le fautasi o lo’o kapeteni ai le Afioga ia Vaimasanu’u Zita Martel. ‘Ese le matagofie o tu’uga nei, ae fa’afoe ei latou ua masani.
Mo le aga’i i le lumana’i, ua tatau ona auai fo’i tama’ita’i i tu’uga fautasi. A tagataga’i fo’i i ai, e leai se galuega e fa’atino e ali’i e lē mafai ona fa’atino e tama’ita’i. Lea fo’i ua o’o lava i tu’uga fautasi, ua o’o lava i ai. Ae tatou talosia ia, ae fa’aauau ai pea lea fa’amoemoe, ina ia fa’amasani ai pea tama’ita’i e alo le va’a. E au le inailau a tama’ita’i, o lona uiga, e mafai fo’i e tama’ita’i ona alo va’a, ma so’o se ta’aloga lava, o lo’o i ai lava au a tama’ita’i o lo’o tauva ai.
O SOU MANATU!
Ua silasila Samoa i le tu’uga fautasi o le fa’amanatuina o le 70 tausaga o le Malisi i le vaiaso ua mavae. I lea fa’agatama na molimauina ai le tulaga maoa’e o le taumafaiga a le Fautasi o Toa sa aloina e tama’ita’i, lea na tulaga lua i lea tu’uga ma ua taunu’u ai upu a le atunuu, e au le inailau a tama’ita’i.
O le a sou finagalo, e talafeagai ma tatau ona fa’amalosia le auai o se au a tama’ita’i i se isi tu’uga fautasi i le lumana’i?
Fuarosa Seve
60 tausaga o Sa’anapu
Afai o le tatou talitonuga e au le inailau a tama’ita’i, aisea e lē mafai ai e tama’ita’i ona tauva i tu’uga fautasi? O lea na silasila Samoa i le tu’uga i le vaiaso na se’i mavae, o inā e fa’ailoa atu ai, e le na’o ali’i e mafai ona tauva i tu’uga fautasi, e mafai fo’i ona tauva ai tama’ita’i. E fa’alagi fo’i tama’ita’i o pae ma auli i totonu o aiga, nuu ma ekalesia.
E i ai lo’u talitonuga, so’o se tauvaga lava, e mafai ona tauva ai tama’ita’i. E leai ma se mea e lē mafai ona fa’atino. E mafai e le tinā ona fa’atino galuega a le tamā. O lea fo’i ua molimauina le i ai o tama’ita’i i totonu o upufai a le Malo. Ua i ai tama’ita’i ua avea ma Pule i totonu o Matagaluega ma Fa’alapotopotoga a le Malo. O lona uiga, o tinā e mafai ona fa’atino so’o se mea e atia’e ai aiga, atia’e ai nu’u ma atia’e ai ekalesia. A tatou fesili, o ai e tu malosi i totonu o aiga, o le tali, o tinā. Auā o tamā o le ulu o le aiga, a’o le tinā, e fa’amoemoe i ai le aiga i mea uma, e o’o lava i le tamā. O le mea tāua, o le mafai lea ona tauva tama’ita’i i tu’uga ia, auā atonu sa i ai nisi o manatu e lē mafai ona tauva tama’ita’i, ona o le umi o le tu’uga. Peita’i, o lea ua fa’aāli e nei tama’ita’i le sesē o ia mafaufauga, e viia ai le Alii i mea uma. Auā e le’o sou malosi, e le’o so’u malosi, a’o le malosi na foa’i mai e le Atua, ina ia mafai ai ona fa’atino la outou fa’amoemoe. Ae ou te talitonu lava a’u, ua tatau ona auai tama’ita’i i tu’uga fautasi i le lumana’i.
O SOU MANATU!
Ua silasila Samoa i le tu’uga fautasi o le fa’amanatuina o le 70 tausaga o le Malisi i le vaiaso ua mavae. I lea fa’agatama na molimauina ai le tulaga maoa’e o le taumafaiga a le Fautasi o Toa sa aloina e tama’ita’i, lea na tulaga lua i lea tu’uga ma ua taunu’u ai upu a le atunuu, e au le inailau a tama’ita’i.
O le a sou finagalo, e talafeagai ma tatau ona fa’amalosia le auai o se au a tama’ita’i i se isi tu’uga fautasi i le lumana’i?
Peneueta Uili
63 tausaga o Malifa
E i ai le manatu o le ta’aloga o tu’uga fautasi, e patino lava i tama tane. Peita’i, e vaai atu, ua mafai fo’i e tama’ita’i ona tauva e pei ona molimauina i le tu’uga fautasi e fa’amanatu ai le 70 tausaga o le Malisi. A’o se popolega ia te a’u, o le tulaga i le malosi, auā o le talitonuga, e ‘ese lava le malosi o le tama tane, ‘ese le malosi o le tama’ita’i. O le isi itu, o le mamao o le mea e amata mai ai le tu’uga, ne’i tutupu ni fa’afitauli i fautasi e tau’ave e tama’ita’i, ona a’afia lea o lo latou soifua.
Peita’i afai o le ata lea o fautasi a tama’ita’i sa tauva i lea fa’agatama, o se tala lelei tele, a’o se ata va’aia fo’i lea o le amanaia e le tatou Malo o le sao tāua o tinā ma tama’ita’i i Samoa, lea ua omai fa’atasi ai ali’i ma tama’ita’i e tauva i lenei tu’uga. Atonu o lea fo’i fa’amoemoe, o le a fai ma lu’itau i isi tama’ita’i i le atunuu e sauna ma tapena ai mo se isi fo’i auva’a e tauva, pe afai nisi aso fa’amanatu e pei o le Malisi. E i ai lava le talitonuga, tusa pe faigatā tu’uga nei, ae a i ai le loto ma le fa’amoemoe i le Atua, e taunu’u mea uma ma le manuia.
