E FUA LELEI LE FAASOAINA O SUESUEGA (TESTS) MO LE KOVITI-19
Tusia: Asenati Taugasolo Semu
E maualuga le faataua a le Malo tauala i le Matagaluega o le Soifua Maloloina i le faia o suesuega (tests) mo le faama’i o le KOVITI-19.
E fua le faia o suesuega (tests), i le tele o meafaigaluega mo suesuega (test kits) o lo o i ai, ma e fuafua i le faitau aofa’i o tagata, ma le tapena ai o le Matagaluega ne’i o’o mai le faama’i i laufanua o Samoa.
Na faamalamalama e le Faatonu Sili Aoao o le Soifua Maloloina, Leausa Dr. Take Naseri i se faatalanoaga ma le Savali tulaga o le faasoa tatauina o nei meafaigaluega (test kits).
“E fua lava i le ave o le faamuamua i le mautinoa e puipui malu le soifua o le atunuu mai le faama’i,” na saunoa ai Leausa.
O le tulaga o tagata malaga mai, ma va’a la’uoloa e afea Samoa, na saunoa Leausa, o lo o faatulaga lelei puipuiga mo ia vaega uma.
“O va’a uma foi ia e omai, e leai se mea e fai ai fua tests a auva’a ae na ona omai lava tuu uta toe foi. E le omai i uta.
“Ae a faapea foi e test (suesue) ae positive (maua i le faama’i), o le ā le tatou mea e fai i ai? O le a tatou taofia ai la iinei tagata ia ua maua i le ma’i? Tusa la o le a tatou aumaia le faama’i?”
O lo o i ai meafaigaluega mo suesuega (test kits), ae na saunoa Leausa, na o tulaga o le puipuiga o lo o faaaogaina ai.
“O lo o faapolopolo lava test kits o lo o i ai mo tulaga o le puipuiga. Ae tatau lava ona tuu ese se vaega feololo (test kits) aua a tupu mai ni pefea a o lea tatou te tapa i ai, aua e tupu loa le ma’i, e test le tagata ma’i ma e faapea foi ona test ma le aufaigaluega i vaiaso uma. Aua e le na o le tagata ma’i e test.”
O tulaga taua ia o lo o naunau Leausa ia malamalama lelei ai le atunuu.
“E le faigofie le faasoaga o tests kits leaga o atunuu uma lava o lo o su’e tests kits ae faafetai o lea e ia nai a tatou tests kits e mafai ona faasoasoa.”
E 4,000 tests kits o lo o i ai i le taimi nei e pei ona saunoa Leausa, ae a fua i le faitau aofa’i o le atunuu i le taimi nei, ua silia ma le 200,000, ma o se itu taua lea o lo o fua foi i ai la latou vaai i le faasoaina o le faia o suesuega (tests).
“Aua o le taimi e maua ai se tagata i totonu o le atunuu i le ma’i, e pei o le emo o le mata le alu o le faiga o tests (suesuega.
“O lea lava e i ai a tatou test kits ae e faapolopolo lava ne’i te’i ua i ai se tagata o tatou e ma’i (KOVITI-19).”
E ta’ilua vaiaso ma aumai test kits e 60 mai le Faalapotopotoga o le Soifua Maloloina o le Lalolagi (WHO) e pei ona saunoa Leausa, ae na aumai e le WHO le 720 test kits talu ai nei, lea ua atoa ai le 4,000 o a tatou test kits i le taimi nei.
E faia uma suesuega faapitoa po o tests a tagata malaga mai vaalele i faigamalaga faapitoa (repatriation flights).
“O vaa foi ia na omai, e test uma lava tagata ia na omai ai ae le i taape atu i aiga, ia mautinoa e leai se isi e alu masalosalo i tua, ma ia soifua maloloina.
“O le vaalele lea na sau mai Ausetalia o le vaa muamua lea na faalua ona tests tagata. Na test i le aso lona tolu na taunuu mai ai, ma toe test i le aso mulimuli ae le i taape i tua i aiga. O le popolega, ona o Ausetalia lea sa tetele ai le faama’i.
“O le vaalele foi lea na sau i le Aso Faraile na te’a nei, na faia tests (suesuega) ona o lea na omai mai Europa isi, ina ia aua lava nei sao mai le faama’i.
“Sa faapea foi la le vaalele na malaga mai i luma atu, na faia tests ona e iai tagata na malaga mai Peretania ma Italia.”
“Na leai se tasi na maua ua aafia i le faama’i, ona ave lea o tagata ia faanosoesea, ma na oo i le taimi na taape ai i aiga, toe faia foi isi tests mo le mautinoa o lo o saogalemu.”
Na faamamafa e Leausa le taua o le faasoa lelei o nei test kits po o meafaigaluega mo suesuega o le KOVITI-19, aua e fai foi tests a le aufaigaluega i le faaiuga o le masina po o latou ia e faia le auaunaga e pei o aufaigaluega a le malae vaalele, uafu, ofisa o femalagaiga, soifua maloloina, nofoaga o faanofoesea ai tagata, avetaavale ma le kamupani vaalele a le Samoa Airways.
“E lē tele la ni tatou tests kits pe a fua i ai, na o le 4000. Na o se faamalamalamaga mo nai o tatou tagata lautele, o lea e faasoasoa tatau a tatou tests kits.
“E oo i nai o tatou tagata ia na toe foi mai fafo e pei o le au faigaluega faavaitaimi, na fai uma tests (suesuega) a o lei foi atu i tua i aiga. Aua a oo atu i tua ae o atu ma le ma’i, o le mea faigata lena.
“A sau nei le vaa lea e faatali nei mai Amerika ae maua ai se tagata ma’i e toatasi pe lua, o le a mananao uma lava tagata e test ma toe test, e oo i tagata faigaluega e fai test. E tele le mea, ma e le taitai lava le 4000 test kits ia. Ma o le mea lena e tatau ona malamalama i ai i latou ia e faasalalauina faamatalaga ma tuufesili i tulaga ia, e lē faigofie le faasoaga o test kits.”
Na saunoa foi Leausa i nisi o atugaluga ua fesiligia ai le faia o tests po o suesuega faapitoa mo tagata uma e ulufale ma afea Samoa.
“I isi atunuu i fafo e ta’i masina e faigaluega ai le fomai po o le nurse (tausi soifua) ma fai a latou tests, aua e talitonu i le latou puipuiga.
“O lea foi e faaaoga a tatou ofu faapitoa mo le puipuiga (PPE) e tagata faigaluega uma o lo o faia le auaunaga i malae vaalele ma uafu (frontliners). E malu puipuia ia ofu faapitoa, totini lima ma tali fofoga.”
E malupuipuia lelei lava e ofu faapitoa e pei ona saunoa Leausa, ma e le manaomia ai le faia o ni latou tests po o suesuega faapitoa.
“E le o māmā ma e mamao foi le vaai i tulaga o le puipuiga ma le faasoaina o test kits. Aua e maimau pe ana faapea e gaosia iinei i Samoa nei test kits, semanu lava e leai se tau fuafua.
“O lea e fai fuafua ma tau faasoa aua o lea e le i oo mai le faama’i ma e leai se tagata o ma’i i totonu o le atunuu i le KOVITI-19, aua a oo mai le faama’i ae ua leai se test kit, ona toe faapea lea, malie ua leai se test kit e test ai oe a o lea ua oo i le taimi e tatau ona faaalu ai tests.
“O le tulaga lea na lē faia ai ni test (suesuega) a le auva’a o le va’a lauoloa, ma o se fuafuaga na silasila mamao iai, ma e i ai foi le manatu, e matua sa’o lava le tulaga o lea fuafuaga.”
Na saunoa Leausa, o tama na faatinoina le auaunaga i luga o lea va’a sa faia uma ofu faapitoa mo le puipuiga (PPE), ma sa mata’itu lelei foi foliga vaaia o le auva’a, ma na saogalemu foi mea uma.
“A o le tulaga foi lea na o le unload (aveese mai o pusa oloa mai le va’a) ma toe foi, e leai se tulaga o le a fai ai ni tests (suesuega) mo le auva’a.”
E tele foi tulaga o le silasila a le Soifua Maloloina i le tau faasoaina o meafaigaluega mo suesuega, o le faatinoina o le galuega ma le auaunaga, ma le saogalemu mo tagata uma e pei ona saunoa Leausa.
“O tagata Samoa uma malaga mai, o lo o faatino uma siaki faafomai i atunuu e malaga mai ai, ma aumai pepa faamaonia, ma e vave faia lava tests pe afai e vaai atu le soifua maloloina, e i ai ni tulaga masalomia o le faama’i.”
Na faamanatu foi e Leausa tulaga o le faanofoesea o tagata Samoa malaga mai fafo, lea e tatau ona faia siaki faafomai i totonu o le tolu aso a o le i malaga mai, ma e 14 aso e faanofoeasea ai i Samoa nei faatoa taape ai i tua i aiga pe afai e leai se aafiaga i le faama’i.
