MALAGA FA’APITOA TOGIPAU MAI FITI
Tusia: Tusiga Taofiga
O lo’o fa’agasolo fe’utana’iga ma soālaupulega a le Komiti Fa’apitoa o Fa’alavelave Tutupu Fa’afuase’i (NEOC) mo le fa’amautuina o se malaga fa’apitoa togipau mai Fiti mo Samoa, aemaise o se ioega a Am. Samoa mo le tatalaina o faigamalaga i le va o Malo e lua.
Mo le malaga i Fiti, ua fuafua e auina mai ai tagatanu’u Samoa, o nisi o lo’o galulue i lea atunuu, o nisi o Misionare aemaise fanau ua mae’a a’oa’oga fa’asikolasipi i le Iunivesite Aoao a le Pasefika (USP).
Fa’ailoa e le Ta’ita’ifono o le Komiti o le NEOC, Agafili Tomaimanō Shem Leo, ua fuafua lea tapenaga, ina ia mafai ona fa’ataunu’uina se faigamalaga fa’apitoa togipau mai Fiti i le Aso 08 po’o le Aso 09 o Tesema, pe a mae’a malaga fa’apitoa ua fa’ata’oto, i le Aso 28 Novema 2020, ma le Aso 04 po’o le Aso 07 o Tesema 2020.
Fa’ailoa e Agafili, ua mae’a tu’uina atu le tusi talosaga a le Palemia o Samoa, Tuila’epa Dr Sa’ilele Malielegaoi i le Kovana, mo se maliega e tatala ai faigamalaga a va’alele ma va’aalalo mo le toe fa’afo’i mai ma le auina atu o tagatanu’u o Malo e lua, sa taofia ona o le Koviti – 19.
Peita’i o lo’o tumau pea le finagalo o le Kovana o lea Malo, i le talitonuga, e sili le puipuia i lo le tautogafitia, e ui e le’o a’afia nisi o Malo e lua, i lenei fa’ama’i oti.
Mo fanau e le’i mae’a a’oa’oga sa sikolasipi ai Fiti, ae ua fia asiasi mai i aiga i Samoa nei, ua fautuaina malosi e le Komiti, ina ia malōlo lelei, ma fa’amae’a a latou a’oa’oga sa malaga atu ai, ona o lo’o fa’a’ete’ete pea i le tulaga ogaoga o i ai lenei fa’ama’i oti.
Ae mo i latou ua fa’au’uina ma mae’a a latou a’oa’oga, o le a tatala ai le avanoa i lea malaga fa’apitoa togipau, ina ia mafai ona vave malaga mai e sa’ili galuega i Samoa nei, e tautua ai aiga, nu’u, ekalesia aemaise le atunuu atoa.
Ua afua ona fuafua lea malaga fa’apitoa ia Tesema i lona Aso 08 po’o le Aso 09 fo’i, ina ia mafai ona fetaui tonu le mae’a o le 14 Aso e fa’anofoesea ai (Quarantine), ona aga’i lea i tua i aiga, e fa’amanatu fa’atasi le Kerisimasi o lenei tausaga ma le tausaga fou 2021.
Fa’ailoa e le Komiti a le NEOC, ua leva ona tatala le avanoa mo a tatou faigamalaga ma Tutuila, peita’i e leai so tatou malosi’aga e aiāina ai fa’ai’uga ma tonu fai a Ta’ita’i a nai o tatou uso i Amerika Samoa ma o le latou lena faitalia.
