FAUTUAGA MO E TOE FO’I MAI SAMOA
Tusia: Tusiga Taofiga
E silia i le 20 tagata matutua, sa malaga mai i le malaga fa’apitoa togipau i le fa’ai’uga o le vaiaso, o le pine fa’amau lea, o le leai o se manatu mamafa o tatou tagata i le saogālemu ma le soifua maloloina lelei o nai matua tausi.
E ui i fautuaga a le Malo, ina ia nonofo pea i fanau ma aiga i atunuu i fafo, seia mae’a lelei le pepesi o le Koviti – 19, ae le’o taofia ai le naunau lava ina ia vave malaga mai Samoa.
O le popolega, i avea le naunau e vave malaga mai, ma ala e ono a’afia ai i se siama o le Koviti – 19, ma ma’imau ai le soifua.
O le 60 tausaga aga’i luga, o le va i tausaga lea, e poia gofie i lea fa’ama’i, o le mafua’aga lea, o le taulogologo a le Komiti o Fa’alavelave Tutupu Fa’afuase’i (NEOC) i o tatou aiga ma fanau o i ai o latou matua tausi o fuafua e malaga mai, ina ia to’a pea le tai, ma tausi lelei mātua auā o lo’o lelei le auaunaga a le soifua maloloina i ia atunuu mo le soifua maloloina o tuaā.
O le isi lu’itau tele o feagai pea ma le Malo, o nisi o tagatanu’u Samoa o lo’o nofomau ma sitiseni i Niu Sila po’o Ausetalia, ae ua fa’aāoga tusi folau Samoa e malaga mai ai mo ni fa’alavelave po’o ni tafaoga, ae toe fa’aāoga tusi folau Niu Sila po’o Ausetalia e toe malaga ‘ese ai.
I le Poloa’iga o Fa’alavelave Tutupu Fa’afuase’i ma Matuiā, o lo’o manino ai ua na’o i latou o lo’o nofomau i Samoa nei, o lo’o mafai ona malaga mai i malaga fa’apitoa togipau o lo’o fa’agasolo.
Peita’i fa’ailoa e le Komiti, e to’a 10 i latou o lo’o i Samoa nei, sa malaga mai mo fa’alavelave ma tafaoga ae o lo’o nofomau i atunuu i fafo.
O i latou nei, o le a aga’i i ai le malosi’aga o le Poloa’iga mo se fa’asalaga, auā ua lē usitaia aiaiga sa tu’uina atu.
Mo nisi o matua tausi sa malaga mai i nei malaga fa’apitoa, ua maitauina e le Komiti, o le to’atele o i latou e leai ni fanau po’o nisi o aiga, o lo’o latou malaga fa’atasi mai.
Peita’i e i ai o latou manaoga tumau, e tatau ai ona i ai lava se tasi o le fanau po’o le aiga sa tatau ona malaga mai ma i latou.
Ina ua o’o mai Samoa nei, na talosaga fo’i nisi o fanau o lo’o i Samoa nei, mo se avanoa e aga’i atu ai fanau e vaaia o latou mātua peita’i e le’o taliaina lea tulaga, ona o le popolega i le mafua’aga tonu na afua ai ona fa’anofoesea i latou nei mo le 14 Aso.
O le autu tonu lea, ua avatu fa’apitoa ai nei matua tausi i le Falema’i Fa’apitoa i Faleolo, auā o lo’o i ai tausi soifua a le Matagaluega, e tausia lelei i latou nei.
O le manatu laualuga lea i le Malo, na afua ai ona talosagaina le tofā i le atunuu, ina ia ‘aua ne’i toe fe’aveaia nai matua tausi, seia mae’a lelei lenei fa’ama’i o lo’o pepesi i le lalolagi.
