AOGA LE LAU KUAVA I LE GASEGASE O LE SUKA
Tusia: Asenati Taugasolo Semu
O le lau kuava ua mafai ona faailoa mai lona aoga mo le gasegase o le suka.
O lea tulaga na faailoa mai e le Faalapotopotoga o Suesuega Faasaienisi a Samoa (SROS) i se faatalanoaga ma le Savali i le vaiaso ua te’a.
Na saunoa le faauluuluga o le Vaega o le Siosiomaga ma Malosiaga Faafouina a le SROS, Annie Tuisuga, o le lau kuava ua iloa i suesuega le mafai ona fesoasoani i le fetuutuunaiga o le maualuga o le suka mo tagata o lo o maua i lea gasegase.
Ma o nei suesuega ua faia lea i le Nofoaga Autu mo Suesuega Faasaienisi a le SROS, o se ofisa mo suesuega faasaienisi muamua lenei mo ituaiga suesuega faapenei ua faatuina i totonu o le Pasefika.
“O lo o lagolagoina i le aotelega o se tasi o suesuega na faatinoina i totonu o Iapani lea sailiiliga a le SROS,” na saunoa ai Tuisuga.
“Ua faaaogaina lea tomai fou e le faalapotopotoga (SROS) e gaosia ai lauti mai lau kuava e faaaogaina i se falemai tuma’oti mo sailiiliga amata. O ia sailiiliga o lo o taimua ai le afioga i le alii foma’i Polofesa Asiata Satupaitea Viali.”
Ua silia ma le 100 lau laau eseese o laau e maua i totonu o Samoa ua uma na faia i ai suesuega, ina ia mafai ona maua se vailaau po o se fualaau mo le ma’i suka mai laau Samoa.
“O lo o faaauauina pea sailiiliga o laau Samoa mai i le vao ma le gataifale aua ni isi vailaau e ono tetee atu ai i le ma’i suka.
“Mo le agai i luma, o lo o tepa taula’i ina ia faalauteleina le malamalama, ina ia mafai ona tuu eseeseina le vailaau mai i sua o nei laau ma le faamoemoe ia mafai ai ona fausia ni fualaau e mafai ona fesoasoani ai i tagata o lo o aafia i le ma’i suka.”
E tolu ituaiga suesuega faapitoa o lo o faatino i le taimi nei i le Ofisa Suesue Faapitoa a le SROS.
O lo o suesue ai laau e faaaoga mo fofo ma isi oloa faalenatura mo le faamoemoe ia maua mai ai ni vailaau aoga e fofo ai le gasegase o le kanesa; suesue ai ni fofo o faama’i e mafua mai i siama nini’i ua le toe pepē i fualaau tui;ma suesuega mo vailaau e fesoasoani i le gasegase o le suka.
“O nei faama’i ua avea ma faafitauli ogaoga e le gata i Samoa ae faapea le lalolagi atoa,” na saunoa ai Tuisuga.
O nei suesuega o lo o gafa ma saienitisi o le SROS, ma na amata faia mai i le tausaga 2018.
O le Ofisa Suesue Faapitoa lenei na tatala aloaia ia Setema 2019, ma o le nofoaga autu mo suesuega faasaienisi mo vailaau e maua mai i laau e faaaoga i fofo ma meaola nini’i o le sami o si o tatou lava atunuu (Samoa Biodiscovery Centre).
Na taua e Tuisuga le maualuga o le lagolago a le Malo i lenei faamoemoe ona o le naunautaiga ia mafai ona maua ni vailaau e gaosia i laau e maua i totonu o Samoa, e togafitia ma foia ai faafitali o lo o aafia ai le soifua maloloina o le mamalu o le atunuu.
