TUMAU LE LEAI O SE KOVITI – 19 I SAMOA
Tusia: Tusiga Taofiga
E 2,976 tagata sa malaga mai i malaga fa’apitoa togipau e 15, talu mai ona tapunia faigamalaga fa’avaomalo ona o le Koviti – 19.
I le malaga fa’apitoa i le fa’ai’uga o le vaiaso, Aso 13 Novema 2020, ua fa’amauina ai e 274 le aofa’i o le pasese, e aofia ai fanauiti e to’afa ma tagata matutua e 270.
E to’a 18 i latou sa fuafua e malaga mai i le fa’ai’uga o le vaiaso, peita’i sa taofia, ona e le’i fa’amalieina aiaiga o tulafono fa’alesoifua maloloina e ala i siaki fa’apitoa fa’atasi ai ma le lipoti a se foma’i e mausalī ai, o lea tagata e le’o a’afia i ni āuga o lea siama.
O le fa’ai’uga fo’i o le vaiaso, na mae’a ai le 14 Aso sa fa’anofoesea ai le aumalaga e to’a 294 sa malaga mai i le isi malaga fa’apitoa i tua atu.
Ua fa’amauina ma le agaga fa’afetai e le Komiti o Fa’alavelave Tutupu Fa’afuase’i (NEOC), e leai se tasi mai i ‘ai latou sa fa’anofo va’ava’aia, o a’afia i le siama o le Koviti – 19, po’o ni āuga fo’i e ono masalomia ai ua a’afia.
Mo le silafia e i ai le isi malaga fa’apitoa i le fa’ai’uga o le tausaga nei, e 300 le pasese o le a mafai ona aumaia ai i lea va’alele tele, peita’i fa’ailoa e le Komiti, ua silia i le 400 tagata ua talosaga atu e toe fia taliu mai Samoa.
O lo’o fa’agasolo pea fe’utana’iga mo isi malaga fa’apitoa togipau o totoe, e ui i le tele o malaga fa’apitoa ua mae’a fa’ataunu’u, ae le’o taofia ai le mo’omia pea e o tatou tagata o nisi malaga fa’aopoopo i le lumana’i.
Fa’ailoa fo’i e le Palemia i lana polokalame ma le Leitio 2AP, afai ae fa’atupulaia pea le pepesi o lenei fa’ama’i i le lalolagi i le tausaga fou, e aunoa ma se togafitiga, o lona uiga, o le a fa’aauau pea tapu o la tatou Poloa’iga fa’atasi ai ma nisi malaga fa’aopoopo fa’apitoa togipau, mo le toe fa’afo’i mai o tagatanu’u Samoa, o lo’o taofia i isi atunuu ona o le Koviti – 19.
