(Aso Faraile 11 Tesema 2020 – FMFM 11; Fale o le Malo; Eleele Fou)
O lea ua ‘apefoetasi le sā o Samoa e faatili foe mo le a’e, aua ua malama i ulugalu ataata o tauleleia. Ua gafoa foi le ata manino ma ua suluia faga o malama e le fetu taiala, o le Atua lava lea o lo’o foemua i la tatou folauga i le souā o afā fo’epapa o lo tatou soifuaga nei. Ua tatou aofaga potopoto ai i lenei uluai Fa’aaliga o Moli fe’emo’emoa’i, felanulanua’i e avea o se mafaufauga fa’ama’ite mea lelei ua tatau ma onomea i nei vaitau o le fa’amalumalu fa’aloaloa o le ao pogisa o lo’o ufitia ai Samoa – e fa’atupu ai le loto popole, le fememeai, le lē mautonu, ma le lu’iina ai o lo tatou ola fa’atuatua. E malamalama gofie foi le agaga lelei o lenei fa’amoemoe o lo’o molimoli e nei taupega moli emoemo – auā o le taunu’uga lelei, o le fa’amalamalamaina ai o le si’osi’omaga pogisa.
Tua atu o ia mea e foliga fa’atauvaa lava, o lo’o molimoli mai ai uiga loloto o le tatou soifuaga puleesea. E fa’amanatu mai ai pea lava pea iā i tatou uma lo tatou valaauina mai le vavau e o’o lava i le fa’avavau – o tatou o tausi mea o le foafoaga ma lona si’osi’omaga tatou te ola fiafia ai.
Tatou te lē olaola noa, e pei o meaola e leai ni agaga e leai foi ni mafaufau ola. Anoano le mau feau fa’amanatu lapatai mai i le tusi taiala o le ola e faavavau mo tatou uma o tagata kerisiano peā tatou saili iai.
A lea ua tatou iloa sa so’ona nunumi ma pogisa le lalolagi. Ona fetalai lea o le Atua ia malamalama ona malamalama ai lea.
Ua ia faia foi le lā e susulu i le ao a’o le masina ma fetu e susulu i le pō. Ua vaaia foi e nisi o vaai fetu faapitoa i le matau o fetu o le vanimonimo po’o le Au Makoi e pei ona faalupe ai inā ona pō o lo’o alala i vaega eseese o le kelope e eseese foi gagana. Ae ua faate’ia i latou ina ua latou vaaia le fetu e fou toe pito mao’ae le susulu i le vanimonimo e lele lele mai i le lalolagi.
Sa o latou metitasio ma iloa ai, o le igoa o le fetu o le Mesia, o le Atua, o lo’o fa’ata’alise mai i le lalolagi.
Ona latou fa’ata’alise atu ai foi lea o latou i kamela saosaoa auā sa leai ni vaalele e femalaga’ai ai i nā ona aso e fia feiloai i le Mesia. Ua tatou iloa uma le tala i nei Au Makoi ma a latou foi meaalofa na tapena ma taitai ane e le fetu pupula agai i Peteleema.
Fetalai lo tatou Alii i le tusi a le aposetolo o Ioane 8:12, “O a’u nei o le malamalama o le lalolagi. O lē e mulimuli mai ia te a’u e lē savali o ia i le pouliuli”.
O upu filifilia ua fa’aigoa ai nei lenei fa’aaliga i lenei afiafi e faapea: “Ua o’o mai le malamalama’’.
Ua ogatasi lelei ma le talitonuga o le au Kerisiano – ana le seanoa le malamalama o le talalelei ia Iesu Keriso, semanū tatou te fano fa’atasi i galuega leaga a le malo o le pogisa.
A’o tatou iai i aso fiafia nei o le Kilisimasi, o aga foi ia o atunuu uma kerisiano – e fa’amumu moli emoemo ma fai meaalofa ai e pei ona fai e le Au Makoi e fa’amanatu ai le fanau mai o le Mesia o lō tatou Fa’aola, o le malamalama o le talalelei na suluia ai le lalolagi ma Samoa sa ufitia i le pogisa i uiga fa’a tevolo.
Ou te fa’afetai ai i Fa’auluuluga o Ekalesia, o Kamupani, o Fa’alapotopotoga, Matagaluega ma aiga ua latou fa’atāua lenei fa’amoemoe i le teuteuina fa’amatagofie o latou atufālega i moli felanulanuai eseese – ua matuā fa’a-aulelei ai lo tatou taulaga ma faoaai.
O ata ma foliga foi ia o uiga fiafia o tatou fanau laiti o au o tatou o matua, ae ā le ola fa’atuatua o tatou tagata tatou te vivii a’e ai e pei foi ona vivii a’e ai ma le olioli o agelu na fa’afuasei ona li’oli’oina le ‘au leoleo mamoe i le susulu tele o le malamalama ma o latou pepese ai i le 2020 tausaga talu ai i upu nei tatou te faalogoina pea i pesepesega o le Kilisimasi. “O le viiga i le Atua i mea aupito ā luga ma le manuia i le lalolagi i tagata ua alofagia e ia”.
Ia manuia tele lo tatou alo atu i aso fiafia o le Kilisimasi ma le Tausaga fou. Ua tatala aloaia nei le tatou Fa’aaliga Moli emoemo.
Soifua
