PEPA O FAAMATALAGA:
Matagaluega o Leoleo ma Falepuipui & Matagaluega o Tupe Maua ma Tiute.
MAUA E LEOLEO MA LE OFISA O LE TIUTE MARIUANA MA CRYSTAL METH E SILIA ILE $600,000 TALA LE TAU
I le Aso Lua 22 Tesema 2020, na maua ai fualaau faasaina o le mariuana e ova ma le 2000 kalama ma le aisa e ova ma le 500 kalama I ni faamomoli eseese e lua na auina mai I Amerika. O nei fualaau faasaina na aumai faa’nana i totonu o ni pusa faamomoli e lua (2).
O le galulue faatasi o le Vaega Tuufatasi a le Matagluega o Tiute ma Tupe Maua ma le Matagaluega o Leoleo ma Falepuipui (Joint Samoa Police and Customs K9 Unit) faatasi ma le Vaega e Puipuia Tuaoi a le Ofisa o Tiute na mafua ai ona maua nei fualaau faasaina.
E ova atu ma le sefulufa itula na faatino ai le galuega na maua ai mariuana sa nana mai I totonu o pusa pauta faitagamea e fitu (7) ma le tasi (1) le apa Stax, ae o le aisa na nana mai I totonu o le pusa cereal.
O le Aso Lulu 23 Tesema na faatinoina ai le tuuina atu aloaia o nei fualaau faasaina I le Komesina o Leoleo e le Ofisa Sili o le Matagaluega o Tiute ma Tupe Maua, mo a latou suesuega fa’aauau.
E toe fautuaina ai le mamalu o le atunuu, a’o alo atu i Aso Fiafia o le Kerisimasi ma le Tausaga Fou, aemaise tapu o loo faamamaluina mo puipuiga o le Koviti, ina ia tausisia ma usitaia tulafono ma aiaiga o le puipuiga o Samoa ma ona tagata mai solitulafaono faapenei.
O loo faaauau pea le galulue faatasi o le Matagaluega o Leoleo ma le Ofisa o Tiute I le puipuiga o tatou tuaoi faa-va-i-fafo ma lo tatou lotoifale ina ia tumau pea le puipuia o o tatou tagata mai aafiaga o nei fualaau Faasaina.
