$1.3 MILIONA TALA FAAMAMA AVEGA UA FAASAFUA ATU E LE MALO I KOMITI A TINA MA TAMAITAI I NU’U MA AFIOAGA E FESOASOANI AI I GALUEGA FAI E FAAGASOLO AI GALUEGA TAPENA INA NEI MEA ANE UA AAFIA SAMOA ILE KOVITI19
Saunoaga autu a le Minisita o le Matagaluega o Tina ma Tama’ita’i, Atina’e o Nu’u ma Afioaga ma Agafeso’ota’i, Tuitama Dr. Leao Talalelei Tuitama i le Tufatufaina o Tupe Komiti Tina: Aso 22 Tesema 2020
Susuga i le Osi Taulaga
Afioga i le Minista o le Matagaluega o Tupe, Sili Epa Tuioti
E muamua ona ou fa’atulou i o’u paia Samoa ua taoto ao se ala o’o. Ou paia Fa’a-le-talalelei, ou sā Fa’aleaganu’u, tainane mamalu o le Tafatolu fefa’atauagai o le Malo Tutotasi o Samoa, tulou lava.
Oute fa’atalofa atu i le paia ua sasao nei. I a outou Afioga i Peresetene ma Laulau-a-fono a Komiti a Tina tainane a tou Susuga i Sui Tamaitai o Nu’u o Samoa.
Malo le soifua, fa’amalo le folau.
O le asō ma le tatou feiloaiga, e le o se fa’amoemoe na fa’afuaveta, ao le aso na loloma ma le taeao ua leva ona taupoina. Aua ua asoa ona tatou feiloai i maota ma laoa o o otou afioaga e fa’amaopopo Komiti a Tina ma Tama’ita’i ona o le talitonuga o le Malo, o o outou faiva fa’atinā e tua iai aiga, nu’u, ekalesia e oo lava foi i le Malo ma lona atinae. E moni ai le upu a le atunuu “ E au le inailau a Tina”
O le asō la ma le fa’amoemoe, e ui lava ina o lo’o vesia lagona ma manatu ona o le taufa’afefe o le Fa’ama’i o le Koviti-19, fa’apea suiga o le tau, ae ua le tu’ua ai le tatau ona tatou feiloai. “E fa’apōpō o ni aso ua, ae le tu’ua aso folau”.
E ui o le fa’amoemoe o le Malo ina ia tu’uina atu fesoasoani lavea’i, ona ua a’afia i tatou i fa’afitauli ona o a’afiaga o le Koviti-19, ae e iai le manatu, o avanoa lava ua tapena e le Atua e mafai ai ona toe fa’amaopopo ai Komiti a Tina i afioaga uma o Samoa ina ia mautinoa ia malu le soifua o tagata uma.
Aua o outou e fa’afailele ai fanau o lalovaoa, o ou faiva e tua iai le galala o le aiga, o lau fautua e auli le fevaevaeai o le nuu ma le ekalesia.
O le tufatufaina o siaki tupe e pei ona tatou feiloai ai nei, ina ia fesoasoani i a outou Komiti e fa’aleleia ai a outou pokalame o lo’o fa’aauau, ina ia mautinoa le soifua maloloina lautele o aso uma, ia taofia le sauaina o tinā ma fanau, ia lava ma paleni taumafa o aso uma.
E ao pea ona ou faamanatu atu, o nei tupe o le a tuuina atu, e le fa’atagaina ona tufatufa i a outou Komiti aua o le a agai atu le tatou Matagaluega fa’atasi ma le Matagaluega o Tupe a lo tatou Malo i se taimi o i luma e asia atinae ma polokalame uma o le a fa’aaoga ma le tatau iai ia nei tupe.
Ou te manatu ua manino lo outou mamalu ua afifio mai i lenei aso i le faamoemoe o nei tupe ma le faaogaina.
O nei, ua na o se amataga o la tatou galuega fa’apaaga, ma le fa’amoemoe o le a fa’aauau pea I le lumanai. Ma ia outou mautinoa, o lr anavatau a le Malo, e tasi lava le auala o soo se polokalame e manaomia ai le galulue o tina ma tamaitai i o outou afioaga, ua na o lo outou Komiti e ona lesitala mai.
E matala lava faitotoa o Ofisa o la tatou Matagaluega e afifio ma iai pe a nisi mataupu e fia maua iai se fesoasoani.
Ua ou mautinoa lava le tele o le vesia ai o outou finagalo I lenei vaitau ona o le tele o leo eseese o loo faafagogo tagi ao i la outou faafofoga I le mau folafolaga eseese.
Ao si tuumusumusu a le Malo aua le tei, aua le tee le uluga, aua foi le polepole vale o outou finagalo, o loo au lava le Atua ma i tatou. “Aua o au le Atua ma i tatou o ai se faasagatau mau”. E tasi lava le Fono Aoao na o le Fono Aoao a Komiti a Tina ma Tamaitai o Samoa lea o loo faamaopopo e le tatou Matagaluega a Tina ma Tamaitai, tinae o Nuu ma Aga Fesootau.
O nisi Fono Aoao o saua i le tou fa’afofoga e leo se mea a le Malo. O fa’alapotopotoga lava a le tagata ta’ito’atasi e saili ai o latou lava manuia ae le lagolagoina e lo tatou Malo.
O le tumama o se vaega lava lea o tiute a Komiti a Tina ma Tamaitai ae na le o toe aloai’a ni Komiti Tumama e ese mai i le Komiti a Tina ma Tama’ita’i.
Ia tatou tutumau pea ile onosa’i, le fa’apalepale ma ia outou lototele, i o outou tiute ma faiva alofilima mo le manuia o Samoa mo nei ma le lumanai. Tatou savavali pea ma le fa’atuatua I le Atua o ia lava lo tatou fesoasoani sili. O la le fai salamo, “ E fa’asaga ae ou mata I mauga e oo mai ai lo’u fesoasoani. O lo’u fesoasoani e mai le Atua lea, o le na faia le lagi atoa ma le lalolagi.”
E avea foi lenei avanoa e momoli atu ai mo’omo’oga alofa o lo tatou Malo mo Komiti uma a Tina o Samoa. Ia outou maua se kerisimasi manuia ma se Tausaga Fou fiafia.
Soifua
