OFISA O LE LOIA SILI: FAAALIGA FA’ALAUAITELE – FAAGASOLOGA O TEUTEUGA O LE FAAVAE
(08 IANUARI 2021); O Lenei Faaaliga Faalauaitele o loo auiliili atu ai le Faagasologa o suiga o le Faavae; ma fa’aata atu ai tulaga e ono mana’omia ai le faatinoina o se Palota Lautele (‘referendum’) ae lei faia ni suiga i le Faavae.
1.Faagasologa o Teuteuga o le Faavae o le Malo Tuto’atasi o Samoa
O le MATAUPU 109 o le Faavae o loo iai le taatiaga manino o le faagasologa o teuteuga o le aveesea ma le faaopoopoina o ni Mataupu fou i le Faavae- tulafono Aupito Maualuga o Samoa.:
O se Tulafono Taufa’aofi1 o loo aiaia ai ni Teuteuga o le Fa’avae, e ao ona faamalieina muamua aiaiga nei fa’aletulafono:
(a) ia i totonu o se piriota e lē lalo ifo o le 90 aso e vā ai le faitauga faalua ma le toe faitauina fa’atolu o le tulafono taufa’aofi; MA
(e) i lona faitauga fa’atolu, e ao ina lagolagoina e ni palota e lē lalo ifo o le lua vaetolu (2/3) o le fuainumera o Sui usufono uma o le Palemene (aofia ai ma nofoa o avanoa/vacancies)
O lenei faagasologa na lima taitaina ai le faagasologa ma faatinoina o le Tulafono o le Teuteuga o le Faavae 2020- lea na pasiaina e 2/3 o Sui o le Palemene i le Aso 15 o Tesema 2020.
2. Sailia o finagalo mo le Teuteuina o le Faavae e ala i Palota Lautele (‘referendum’)
E fa’atoa alagatatau le faia o se palota lautele mo se Tulafono taufa’aofi o se teuteuga o le Faavae pe’a aiāia e sea Tulafono Taufaaofi ni teuteuga, e suia ma faia ai ni faaopoopoga i mataupu nei o le Faavae:
• 1 O se Tulafono Taufa’aofi ua na se ata faataitai o se Tulafono. Ma e fa’atoa taua lava o se Tulafono pe’a maea ona pasiaina e le Palemene (lagolagoina e le 2/3 o sui usufono o le Fono Faitulafono ma sainia e lana afioga i le Ao o le Malo).
• 2 I le taimai nei, e 51 Sui o le Palemene. 3 O palota lautele, ua faauigaina o palota ia e saili ai finagalo o sui palota pe tetee, pe lagolagoina foi i se lafo ina ua maea ona tuuina atu se fesili faatatau i se Tulafono Taufa’aofi.
(a) Mataupu 102 (E lē faaliliueseina atu eleele tau le aganuu) o le Faavae; poo
(e) se faamatalaga (proviso) i totonu o le Mataupu 109 (Toe teuteuina o le Faavae) o le Faavae.
E na’o Mataupu lava nei e lua, e tatau ai, i lalo ole Faavae, ona faatinoina se Palota Lautele ao lei pasia se tulafono taufaaofi. E faatoa avea aloaia se Tulafono Taufaaofi ma Tulafono a le Palemene a Samoa pea lagolagoina e le luavaetolu (2/3) o palota tuuina atu i le Vaega o Palota. Afai loa ua lagolagoina e le luavaetolu (2/3) o le aofaiga o palota le Tulafono Taufa’aofi ona sainia loa lea e le Fofoga Fetalai o le Tusi aloaia e faamaonia ai le faamalieina o nei fa’atinoga faaletulafono ma tuuina atu loa i le Ao o le Malo mo le sainia ole Tulafono Taufa’aofi.
O se manaomiaga mo le faatinoina o se palota lautele faatatau i le Tulafono o Teuteuga o le Faavae 2020, e le’i alagatatau lea ONA E LE’O IAI SE AIAIGA I TOTONU O LENEI TULAFONO e suia, aveesea pe faaopoopo foi i se vaega o le Mataupu 102 ole Faavae poo se Faamatalaga (proviso) i lalo o le Mataupu 109 o le Faavae.
