TALI ATU I TU’UA’IGA A LE VAEGA FAAUPUFAI A LE FAST:
(O le Pepa o Faamatalaga lenei ua tuufaatasia e le Failautusi ole Fono Aoao Faitulafono e faasao ai ni manatu a le lomiga a le nusipepa ole Samoa Observer, Aso Faraile 08 Ianuari 2021 I le Vaega o Manatu o le Faatonu (EDITORIAL BOARD) e faatatau I tulafono o Fanua ma Suafa 2020 ua maea ona faatulafonoina ele Palemene ma le Ao Mamalu ole Malo I le masina Tesema ole tausaga ua mavae.)
E fia faamanino mo le silafia e le mamalu o le atunuu e tusa ai ma tu’ua’iga a le afioga i le Sui Usufono, Hon Fiame Naomi e pei ona faasalalauina i le Nusipepa ale Samoa Observer i le aso 8 Ianuari 2021 (itulau-4), e faatatau i le lē taulimaina o ni kopi o Tulafono e 3 e pei ona ua faamaonia e le afioga i le Ao o le Malo. E ao pea ona manino mo le silafia e le atunuu, o le a mafai ona maua se kopi o so o se tulafono e pasia e le Palemene, pe a maea ona tuuina atu le Maliega a le Ao o le Malo i se Tulafono e tusa ai ma aiaiga o Tulafono Tumau a le Palemene (. 110 & 111) :-
1. Ina ua pasia se Tulafono Tau Faaofi mo le tuuina atu iai o le maliega a le Ao o le Malo, e ao ona lomia sagatonu teuteuga sa fautuaina e se Komiti Faa-Palemene ma faamaonia e le Fono Aoao ina ua faasee atu le Fono Aoao mo le Iloiloga Auiliili ma le Faitauga Faatolu, o ia teuteuga uma e ao ona faitauina faatasi ma vaega o le Tulafono e pei ona faaofi atu i le Fono Aoao i le Faitauga Muamua;
2. I le saunia ai o se Tulafono Tau Faaofi mo le maliega a le Ao o le Malo, e mafai e le Failautusi ona lomia teuteuga tusitusia ma faasa’o ni lomiga ua sesē na faamauina i so o se vaega o le Tulafono Tau Faaofi;
3. I le maea ai ona tuuina atu le Maliega a le Ao o le Malo i se Tulafono Tau Faaofi, ua avea loa ma Tulafono a le Palemene, ma o le a lomia ma faatauina atu e le Ofisa o le Failautusi o le Fono Aoao i le atunuu lautele, e aofia ai ma Sui Usufono o le Palemene.
O Tulafono e 3 e pei ona tautalagia, na faamaonia e le Palemene i le aso 15 Tesema 2020, ma ua maea ona tuuina atu i lana afioga mamalu Le Ao o le Malo mo lana Maliega.
Ua maea foi ona tuuina atu ata o nei Tulafono e 3 e tusa ai ma Tulafono Tumau 112 i le (Failautusi a Le Ao o le Malo, Loia Sili a le Malo, Resitara o Faamasinoga, ma le Minisita e fitoitonu ma le Tulafono Tau Faaofi). O le a mafai ona maua kopi o nei Tulafono e 3 i le Ofisa o le Failautusi a le Fono Aoao i Mulinu’u, i le vaiaso fou ma o le avanoa foi kopi faa-eleteroni i le upega tafa’ilagi a le Ofisa o le Fono Aoao.
