TAUAOFIAGA A MATAGALUEGA A LE MALO MA TUSITALA
TANOA HOTEL: 27 Ianuari 2021
E faapopo ni aso ua, ae le tuua aso folau. O aso e tafitoelaua ai le vasa, ma aso o le susue fuefue o le tai. O ituaso e sufi ai le matagofie, ma ituaso e teva ai taga o lagi mālie. O ituaso e usu faafeiloai ai, ona faamua lea, ma vaitau e segia ai mauli ma ivā ai le so’oso’ofau, ina ua o tatou folau i le fetūleia’i. O aso ia o loo ta’avili ma faapunafanau e le o tatou soifuaga nei.
A o le afioga a le Atua, ‘ia o tatou olioli ma fiafia lava, aua o loo i le lagi lo tatou taui e tele. O le mea lea, ia o tatou faia mea uma i le olioli, faatoga, atoa ma le faafetai.
E tāua upu ma tala. O upu e fauina soo se fatuga, o se faiva, po o se faatufugaga. E momoli mai ai lagona o le fiafia, o le ata, po o le faanoanoa. O le mau a Samoa, ‘e fai vae o tala’. O tala e lealea, e taligatā ma faapaia fofoga; ae ā le tala i le vai ma le usuga. E autupulagā, aua e pala le ma’a ae le pala le tala.
E uiga lasi ma faitau eseese tala i le tatou gagana. O le tamaaiga lea o le tatou gagana na tuuina mai e le Atua i o tatou tuaa e faagaganaina ai Samoa. E tulaga ese ai Samoa mai isi atunuu, aua e iloa i lana gagana.
O tatou o Samoa, na tofia tatou e le Atua ae le’i faavaeina le lalolagi ina ia o tatou faia galuega lelei, na uluai faatulaga e le Atua anamuā, mo lona viiga.
O le galuega faatusitala e le o se galuega fou. O le galuega a Tusitala ua o tatou manuia ai i le Tusipaia, aua na faaosofia e le Agaga Paia le au tusitala e pei o Mose, le Tupu o Tavita ma Solomona, o le au Perofeta e pei o Isaia, Ieremia ma Esekielu, atoa ai ma Aposetolo o le Feagaiga Fou ina ia tusitusi mea na tutupu, o vavega o le Atua na o latou vaai iai, ma lona finagalo faasino mo le tagata soifua. Ae a talafaasolopito o le kelope, lea o loo faavae ai aoaoga a le fanau mo le poto salalau. O le galuega a tusitala.
Ua alagatatau ai le faafetai i le au tusitala. Faamalo mo lo outou fatuaigatausi. Faafetai i le Atua mo outou. Faafetai mo le taleni ua tuuina mai e le Atua e tautua ai Samoa.
E ao ona manatua, o tatou uma o tusitala. O tala e faamaumau nei, e tupu ai le feoeoea’i pe faatupu ai foi le fefulitua’i ma le feinoinoa’i. O upu e faamaumau nei, e tua iai tupulaga lalovaoa a Samoa, ma tupulaga uma e lei fananau mai. E autupulagā le galuega faatusitala. Tatou te o ifo i le tuugamau, pe afai e tuai mai le siitiaga o le Ekalesia, ae faaauau pea upu ma tala ua faamaumau.
Ua tele luitau ua tatou silafia uma i le tusia ma le faasoaina atu o faamatalaga. Ua pulepule isi faamatalaga, ua fetaa’i, ma ua taunapo isi tusitala i lo latou sao po o le mea o lilifa iai o latou manatu, pe ta’ina foi e le tupe. O se faamanatu ma le loto maulalo, o le tatou nafa faifaatasi, o le faamaumau ma tuuina atu faamatalaga tonu ma le moni. Ia aua na ona sao, a ia a’o. O la tatou anava tausi lena, o loo faatonufolau ai la tatou galuega faifaatasi. E le gata i le Malo ae faapena foi le aiga faasalalau atoa.
O le faamoemoe autu lena o lenei tauaofiaga. O le lona lua lenei o mafutaga fefaasoaa’i e tauala mai i le PACMAS o loo fesoasoani mai ai le Malo o Ausetalia. O lea tatou te iai i vaitau o faalavelave matuia. O loo feagai pea tatou ma le faamai oti – le COVID 19, a ua matalua ma le vaitau o afa ma timuga i le atunuu. I lou tulaga faataitaifono o le Komiti mo Faalavelave Faafuasei ma Faalavelave matuia, ou te tapa ai le faaauau o le tatou galuega soosootauau. E le ese ina, ese iinei. O le taafi faumau o le tatou auaunaga, ia ‘tuuina atu i le atunuu faamatalaga tonu, atoatoa ma ia vave ona faailoa (factual, accurate and timely release of information).
O la tatou galuega lena e lave i le manino, lave i le aava. E nofo silafia ai le atunuu, e tapena ai mo taimi faigata, ma muaau i le tuuina atu o galuega laveai. Afai e valetulima le tatou galuega o le tuuina atu o faamatalaga, ona oo lea o le atunuu i faigata, ma maua i le fememea’i i ituaso o faalavelave matuia ma tutupu faafuasei. Ia manatua i taimi o faalavelave tutupu faafuasei, ia to’a. Ae maua i fea le to’a, e maua i le nofosilafia o le atunuu i le faalavelave o loo tupu ma le tatou tali atu.
O polokalame o le a fa’agasolo mo lenei a’oa’oga, o le a unaia atili ai le lagolago malosi i ē o lo’o feagai ma galuega o le tu’ufa’atasia o fa’amatalaga mo feso’ota’iga, ina ia si’itia maualuga ai le tāua ma le anoa o fa’amalataga e fa’asoa atu e le Malo fa’atatau i le Koviti – 19 ma so’o se Fa’alavelave Matuia e ono tula’i mai. E le gata i lea, a o le saga fa’amausalī atili ai o le fetufaa’iga o tomai ma agava’a i auaunaga a le Malo ma ala o fa’asalalauga auā le tali atu i fa’ama’i mata’utia ma fa’alavelave tutupu fa’afuase’i o lo’o feagai pea ma i tatou i le taimi nei.
E tāua tele le femalamalamaa’i i le fa’agasologa o le tu’ufa’atasia o feso’ota’iga ma fa’amatalaga e fa’alagolago lea i ta’iala ua fa’ata’oto, o le vave o le tu’ufa’atasia o fa’amatalaga ma le fa’asoaina po’o le fa’alauiloaina atu o ia fa’amatalaga mo le silafia e le atunuu e aofia ai ma Ofisa Fa’asalalau.
Ou te taofi, o le a saga matimati le tatou galuega fefaasoaa’i, e si’itia ma fa’amalosia le faigapa’aga ma le malamalama’aga i le fa’agasologa o auaunaga tau feso’ota’iga ma fa’amatalaga a le Malo i taimi o fa’alavelave fa’afuase’i, ma fa’amalosia atili ai le galulue fa’atasi i le va o le Malo ma auaunaga tau fa’asalalauga aemaise o le fa’amalosia o le malamalamaga i matafaioi autu o lo’o feagai pea ma le Ofisa o Fa’alavelave Tutupu Fa’afuase’i ma ana pa’aga totino.
Ia manuia lenei tauaofiaga, ia tupu tele lo tatou galulue faatasi, ma ia tatou fealofani, ina ia mu le tatou taulaga ma logomalie le tatou auaunaga i luma o le Atua, aemaise si o tatou atunuu o taputapua’i mai.
SOIFUA.
