(OFISA SOOUPU); Ua toe fa’amanatu e le Komiti Faufautua mo Fa’alavelave Tutupu Fa’afuase’i ma Matuia (DAC) i le mamalu o le atunu’u ia aiaiga mo Malae vaalele ma Uafu i lalo o Poloaiga o Fa’alavelave Fa’afuase’i o le KOVITI-19.
Na saunoa le Taitaifono, Agafili Tomaimano Shem Leo, o lo’o va’aia pea le mamalu o le atunu’u o lo’o tumutumu i le malae vaalele faavaomalo i Faleolo mo fa’ae’ega va’a, ma sa ia toe faamanatu i le atunu’u o lo’o tumau pea aiaiga mo puipuiga i lalo o Poloaiga mo Samoa.
“O lea foi ua feiloai ma le Komesina o Leoleo, mo le puipuiga o le malae vaalele ina ia fesoasoani i le tatou galuega lenei. Ae o galuega uma nei i le faafofoga mai o Samoa, o gaoioiga lava mo le puipuiga ma ia mautinoa lava e laititi po o le leai o se avanoa e ono mafai ai ona aafia tatou i le faama’i.”
Sa saunoa fo’i Agafili, o nei galuega e le gata i le matimatiga o aiaiga o le malu puipuia o tua’oi faavaomalo o Samoa i le malae vaalele, ae o lo’o faapea foi i le uafu faavaomalo i Matautu.
O lo’o tumau pea Samoa i le vaega numera tasi o puipuiga (Level 1) i le lanu samasama lea o lo’o fa’aauau ai pea ona fa’amalosia le faia o tali fofoga, tumama lautele aemaise feso’ota’iga vavamamao.
O lo’o fa’atulaga i lalo o Poloaiga mo Faalavelave Fa’afuase’i ia aiaiga atoa mo lenei tapu mo potopotoga ma le tumutumu o tagata i nofoaga faitele:
- Ua tapu nei ona toe tumutumu tagata i nofoaga o femalagaiga e pei o malae vaalele ma uafu, se’i vagana o tagata e Malaga.
O lo’o tumau pea fa’asalaga mo i latou e solia Poloaiga o lo’o ta’ua i luga mo Faalavelave Tutupu Faafuasei mo le Faama’i o le KOVITI-19:
- Tagata ta’ito’atasi – $200 mo le solitulafono muamua, ma le $500 i aso ta’itasi e fa’aauau ai lea solitulafono
- Mo fa’alapotopotoga fa’atulafono e $5,000 mo le solitulafono muamua, ma le $7,000 i aso ta’itasi e faaauau ai lea solitulafono
Mo le aotelega o Poloaiga aemaise fa’asalaga mo solitulafono, asiasi i le Upega o Fa’amatalaga mo le Malo o Samoa – https://www.samoagovt.ws/category/novel-coronavirus-covid-19/
Mo fa’amatalaga fa’atatau i Poloaiga ma nisi fa’afesili, fa’afeso’ota’i le Ofisa mo Fa’alavelave Fa’afuase’i (NEOC) i le 997/32759. Mo fa’amatalaga fa’ale-soifua maloloina, vala’au i le 8006440.
