Matagaluega o Tiute ma Tupe Maua;
Ua māua e le Matagaluega ua iai fa’amaumauga puipuia tau tiute ma lafoga ua fa’asalalauina fa’alaua’itele i luga o upega tafa’ilagi e pei o le Facebook i le aso Toonai 12 Iuni, po’o le Aso Sa 13 Iuni 2021.
O nei pepa o fa’amaumauga ua avea ma lapisi puipuia (confidential rubbish) a le Matagaluega ina ua maea galuega eseese sa fa’aaogaina ai nei pepa e pei;
1. ni lomiga (printing)
2. ni ripoti ua sese
3. lomiga o se pepa lafoga ua sese
4. lomiga o se kopi o pepa lafoga ma fa’amaumauga a se tagata lafoga e faatino ai suesuega i luga o kesi
5. lomiga o se tusi ua leaga ma lē sao ona fai
6. kopi o se tusi po’o se pepa lafoga ua sese ona fai
7. faataitaiga o se tusi po’o se ripoti ao lei avea ma se faamaumauga mautu ma faamaonia
8. faataitaiga o se faasalalauga ao lei faamautu ma faamaonia e avea ma se faamaumauga aloaia
9. ma isi lava galuega na fa’aaoga ai nei pepa e le Matagaluega.
Ona ua avea ma lapisi, e le manaomia ai ona teuina i faila o faamaumauga a le Matagaluega nei pepa leaga ma fa’aigoaina ai o le ‘lapisi puipuia’. O nei ‘lapisi puipuia’ a le Matagaluega, e tumau pea lona malupuipuia mai le fa’alauiloaina fa’alaua’itele i lalo o le Tulafono Fa’afoega o Lafoga 2012, ma ua faapitoa foi se faiga faavae e lima taitaina ai le Matagaluega mo le tia’iina ma le fa’aleaogaina o nei lapisi puipuia.
O se vaega o lapisi puipuia na lafoia ma tanuina e le Matagaluega i le nofoaga mo lapisi i Tafaigata, sa māua ua fa’asalalauina fa’alaua’itele i luga o le Facebook. Sa auai atu ni sui o le Matagaluega i le Aso Tofi 10 Iuni 2021, e tia’i ma molimauina le tanuina o taga lapisi puipuia e sefulu (10) a le Matagaluega faatoa tu’umuli ai le aufaigaluega mai lea nofoaga i Tafaigata. O le tulaga e faʻanoanoa ai, o nisi o nei lapisi puipuia ua masalomia na toe eliina ma ave’esea faʻasoli-tulafono mai Tafaigata, le nofoaga na tanu ai, e se tasi ma faapena ai ona tu’uina atu ata i luga o le Facebook. O nei lapisi puipuia, e leʻi mauaina i tafatafa o le auala e pei ona lipotia mai luga o le Facebook ma e lē moni ma lē sa’o lena fa’amatalaga.
O le faʻaauauina o le puipuia ma le mausali o faʻamatalaga ma fa’amaumauga a tagata totogi lafoga o se tasi lenei vaega e taua tele i le Matagaluega aua o ‘faʻamatalaga puipuia’ i lalo o le vaega 9 o le Tulafono Fa’afoega o Lafoga 2012. O le solia o lenei vaega o le Tulafono e ono a’afia ai se tasi i se fa’asalaga tau tupe po’o le nofo sala foi i le falepuipui. Ona o le matuiã o le gaioiga o le aveesea faasoli-tulafonoina o lapisi puipuia mai le nofoaga e lafoai ai, ua tu’uina atu nei se tagi aloaia, i le Matagaluega o Leoleo mo le faia o suesuega e uiga i lenei mataupu.
O lea e talosagaina ai le lagolago, aemaise o le galulue fa’atasi a le mamalu a le atunu’u, ina ia aua nei toe fa’asalalauina ni ata o pepa, ripoti, ma fa’amaumauga puipuia tau tiute ma lafoga, ma igoa o loʻo tusia ai mai nei lapisi puipuia, e aveʻese mai le Facebook e ala i le taofi o le fa’alauiloaina o nei fa’amatalaga puipuia pe lipoti foi i le ofisa o Leoleo.
Ma le fa’aaloalo tele lava,
(Matafeo Avalisa Viali-Fautua’alii)
OFISA SILI O PULEGA
