23 Iulai 2021
PEPA O FA’AMATALAGA
Ua ma’ea sainia se feagaiga fa’apa’ga mo le teufa’afaigalueina o tupe a le Fa’aputugātupe mo le Lumanai Manuia o Tagata (SNPF) ma le Fa’aputugātupe Teufa’afaigaluega o Mavaega Tausi a Samoa (UTOS) ina ia mafai ai ona galulue fa’atasi ma le kamupani a le ATH International Ventures (ATHIV). O le ATHIV o se Kamupani o lo’o resitala i totonu o Singapore ma o lo’o gafa nei m le fa’atupeina o se atina’e tele mo feso’ota’iga tau telefoni feavea’i i totonu ole atunu’u o Papua New Guinea (PNG), e fa’aigoaina o le Vodafone PNG. O le ATHIV o se kamupani ei lalo o le fa’amalumaluga a le ATH Group, ma o lea kamupani o lo’o taimua i auaunaga tau telefoni feavea’i i totonu o le malo o Fiti, ma ua mafai foi ona o’o atu lenei auaunaga mo feso’otaiga tau telefoni a lenei Kamupani i isi motu o le Pasefika, e pei ona i ai nei le Vodafone Samoa (Samoa), Vodafone Cook Islands (Atu Kuki), Vodafone Vanuatu (Vanuatu), Vodafone Kiritbati (Kiripati) ma le Bluesky American Samoa (Amerika Samoa).
O le sainia o lenei faegaiga fa’apaʻaga mo tupe teufa’afaigaluega a le SNPF ma le UTOS e mulimulita’i i le feagaiga ua maea sainia i va o le ATH ma le Faletupe o Atinae o Asia (ADB) mo lenei atina’e tele. O le ADB o lo’o avea ma pa’aga fa’a ma’a-tulimanu (cornerstone investor) o lenei atina’e, o lo’o lelei lona tulaga i totonu o maketi mo tupe teufa’afaigaluega, ma lo’o tele atunu’u o le Pasefika o lo’o avea ma sui-auai o le ADB, ma o le talitonuga, o le auai ai o le ADB i lenei atina’e o le faitotoa lea ua tatala mai mo fa’alapotopotoga fa’ateugātupe laiti i totonu o lenei fa’aitulagi, e avea ai ma pa’aga aloaia mo tupe teufa’afaigaluega i le ATHIV.
O le resitalaina o le ATHIV i totonu o Singapore, o se fuafuaga talafeagai e fa’atulaga ai avanoa e ono mafai ona teufa’afaigaluega tupe a le SNPF ma le UTOS i le maketi i Asia, i se taimi o lumanai.
O le mafai ona galulue fa’atasi o le SNPF ma le UTOS mo lenei faiga-fa’apaga, ua avea ma faitotoa o Samoa e mafai ai ona teufa’afaigaluega nisi o ana aseta,i nei e atina’e tetele, e lē mafai ese fa’alapotopotoga tau tupe toatasi ona agava’a ai, ona o tualaga tau tupe mo’omia e fai sina mauāluluga, ua nao fa’alapotopotoga tau tupe malolosi a Pasefika latou te gafatia. Ae peitai, o lenei faiga fa’apāʻaga, o se amataga lea oni avanoa se tele e mafai o galulue fa’atasi ai pea le SNPF ma le UTOS, ma ia ausia ai pea a latou sini autu fa’apisinisi.
O le ā fa’aauau pea e le SNPF ma le UTOS ona saili’ili isi auala ese’ese e talafegai, e pei o atinae tetele o le tamaoaiga ma meatotino (fanua ma fale tetele), e atina’e ina ia siitia ai tupe maua mo sui fai saofaga ma le aufaiunite. O nei fuafuaga, e mafai ona ausia pe ā lelei se faiga fa’apāʻaga, e iai tomai fa’apitoa ma e agava’a e fa’afoeina teugatupe teufa’afaigaluega i atina’e tetele, ma ua silafia lelei foi fa’amoemoega autū a le SNPF ma le UTOS, o le fa’atupulaia lea o tau aogā o ā latou aseta. O le fa’anaunauga lautele lava o lenei fa’amoemoe, o le saili’ili ma tapu’e ni avanoa e maua, fa’ailoa ma fa’aiti’itia tulaga lamatia, ma o le tatou faiga pāʻaga ma le ADB ma le ATH group, o fa’alapotopotoga ua iloga i tomai ma le fa’afoeina o atina’e tetele tau fesootaiga, o le pinefamau lea o le saili malo a le SNPF ma le UTOS.
O lenei feagaiga fa’apaga, ua molimau ai i le mafai ona galulue fa’atasi o le SNPF ma le UTOS, o Fa’aputugātupe mo tupe teufa’afaigaluega. Ua talitonuina ma mautinoa e nei Fa’aputugātupe e lua, o lenei avanoa o se lumanai manuia ma siitia ai tupe maua mo a latou sui-faisaofaga ma sui-faiunite.
