O le a taoto pea ia sa ma faigā a o paia ma mamalu faaifo-gatā o Samoa i ona tulaga faalupelupeina. I ou paia faale-Talalelei, o ou paia faale-atunuu ma ou paia faale-Malo, e afua mai i le si’u i Sasae seia paia le si’u i Sisifo.
O paia ma mamalu e le toe tau tapu’eina. Ua soofue le pua ma le laau, ua taoto foi a o se alaoo. A o le faafogafoga tapuai mai a lo tatou atunuu,
O paia lava ia aua Aiga ma a latou Tama,
O Tama ma Aiga,
Le Usoga a Tumua ma Pule, Ituau ma Alataua,
Aiga i le Tai ma le Vaa o Fonoti
Ae a le Aufaigaluega Totofi o le Talalelei.
I le ava tele, ou te faasilasila atu ai e faapea:-
Ua atofaina nei le Aso Lua 14 Setema 2021 mo le tauaofiaga masani a lau Palemene Lona XVII. Peitai, o lo o māua pea i ala o fesootaiga faaonapo nei ni faasalalauga ou te manatu, e le maua ai se to’afilemu ma le saogalemu o le atunuu.
Ua iai le taofi o le Fofoga Fetalai, e ao ona ave le faamuamua i le saogalemu o tatou tagatanuu aemaise o le Palemene i le aso o le a tauaofia ai.
Ua taoto Tulafono Tumau e faatonu folau ai taualumaga a le Palemene aemaise o le Pule a le Fono Aoao ua tuuina mai i le Fofoga Fetalai.
Ona o lea, ou te faasilasila atu ai i le mamalu o le atunuu e faapea:
• E tusa ai ma Tulafono Tumau 176(1) a le Palemene, o le a lē faatagaina ni isi e ulufale i le Maota Fono i taimi o taualumaga a le Palemene i lana fonotaga ua atofa e amatalia i le Aso Lua, 14 Setema 2021 seia vagana ai Sui Usufono o le Palemene ua logoina aloaia mo lana fonotaga ua atofa mo lea aso, e mafai ona auai i lea fonotaga;
• E na o Ofisa Sili foi o Pulega o Matagaluega ma Faalapotopotoga Tumaoti uma a le Malo, o le a faatagaina e auai i taualumaga o le fonotaga a le Palemene;
• E tusa ai ma Tulafono Tumau 191(1)(e), e le faatagaina le solia o malae o le Fono Aoao e so’o se isi, a o tauaofia le Palemene a le atunuu;
• Mo Sui o le Vaega o le Au faasalalau, o le a faailoa atu e le Ofisa o le Failautusi o le Fono Aoao Faitulafono ia aiaiga masani la outou auaunaga faifaipea a o tauaofia le Palemene;
Samoa e, ma lau faafofoga tapuai mai, e momoo pea le loto i le nofo filemu ma le saoloto o tatou tagatanuu. O le naunautaiga, ia saili le auala talafeagai e faasaoina mai ai le soifua o nai o tatou tagata mai le vevesi ma le fefulituaa’i ona o faiga faapolokiki.
E faaauau pea le faasalalauina tuusao o taualumaga a le Palemene i le Televise, Leitio ma fesootaiga faaonapo nei le Facebook mo le maimoa faafofoga a lo tatou atunuu i taualumaga uma a le palemene
E tatalo atu ma le agaga maualalo i lo tatou atunuu ina ia o tatou galulue faatasi mo le puipuiga o le saogalemu o Samoa lo ta atunuu pele.
Alofa faamagalo se gagana ua sala i lau faafofoga.
Ia iai pea le filemu o le Atua i lo tatou atunuu.
Ma le faaaloalo tele
Hon. PAPALII Lio Oloipola Taeu Masipau
FOFOGA FETALAI
