Mo le Mamalu Lautele ole Atunuu olo’o pāpā aao i Savaii ma le au Tautai
E fa’asilasila atu ma le faaaloalo tele o le a faaitiitia gaioiga uma o loo faatino i le itu i mātū o le Uafu i Salelologa, poo le pito i tua o le fale ole Samoa Shipping Corporation, e amata atu i le 12 ile vaeluaga ole po ole aso Lua, aso 7 o Setema 2021, ona o le a fa’aaogaina e feoa’i ai masini mamafa, ma faaaogaina ai mea faigaluega mo galuega laveai o lo o faauaua mo le Vaa o le Nafanua II. E na o le aufaigaluega togia o le a mafai ona faaaogaina lea vaega o le Uafu a o faagaioi le galuega mo le taimi nei.
O lenei nofoaga oloo i lalo o le vaavaaiga a Alii Malu ole Malo ma e fautuaina le mamalu lautele ole atunuu ina ia faaavanoa lenei vaega o le uafu e iai le paka o taavale, pe fagota ai foi, mo le puipuiga o le saogalemu lautele o le atunuu fegasoloai.
E fautuaina foi va’a uma olo’o taula ma feoa’i ile va o Apolima ma Manono, faapea le au tautai i talafatai o Manono ma nofoaga latalata ane, ina ia fa’avanoa nofoaga nei e faatino ai galuega moomia mo le Nafanua II.
Faamolemole o le a tapu soo se va’a fagota e latalata mai i le 200mita mai le vaega o le a faatinoina ai lenei galuega. Matou te tatalo atu i le mamalu o le atunuu ina ia alofagia tatou galulue faatasi mo le puipuiga o le saogalemu lautele, a o faatino le galuega mo le Nafanua II.
Ma le faaaloalo tele,
Agafili Tomaimano Shem Leo
Taitaifono
Komiti mo le Fa’afoeina o Fa’alavelave Faafuasei
