O le a lelepa ia fa’a-va’atiu o ā’au mamao ou sā ma faigā Samoa, e le gafataulimaina e sa matou fa’amatalaga.
I le ava ma le fa’aaloalo, e fofogaina ai le mamalu o le atunuu, o le a faia i le Aso Faraile 19 o Novema 2021 le tuiga tele o le KOVITI-19, mo le atunu’u e tuliloaina ai i latou e le’i mae’a fa’atinoina o latou tui puipui.
O lenei galuega ua fuafua e amata i le itula e 8 i le taeao seia o’o i le 6 i le afiafi.
E fa’ailoa atu i le atunu’u, e lē o se Aso Mālōlō lea aso. O le a tatala galuega uma i le atunu’u, fa’apea ma femalagaiga lautele i luga o ala tetele, peita’i, e ono i ai ni siaki a Malu o le Mālō i luga o ala tetele, e ono moomia ai le fa’aalia o pepa tui o le KOVITI-19 mo i latou o le a femalagaa’i i lea aso.
Fa’amolemole nonoa se faailoilo lanu mūmū i lumā maota o aiga, fa’alapotopotoga po o pisinisi, pe afai o i ai se tagata e mo’omia ona tui. O le a faafaigofie ai le galuega a le aufaigaluega o le a aga’i e faatino lenei faamoemoe.
E talosagaina le atunu’u fegasoloa’i ina ia tau’ave le pepa tui o le KOVITI-19. Afai ua leiloa le pepa tui na muai tuuina atu, ae ua tatau ona fai le tui lona lua, e fautuaina le o’o ane pea e faailoa i le aufaigaluega ina ia mafai ona faatino le tui.
O le agaga atoa o lenei galuega, ina ia saga matimati le puipuiga o le atunuu mai le KOVITI-19.
Ia tumau pea le puipuiga ma le alofa tunoa o le Atua ia Samoa.
Ma le fa’aaloalo,
Agafili Tomaimano Shem Leo
Taitaifono Komiti Faufautua o Faalavelave Matuiā ma Faafuasei
