Tusia: Tusiga Taofiga
O lo’o i ai le fuafuaga a le Mālō mo le faia o tui puipui mo fanauiti ei le 5 – 12 tausaga le mātutua pe a maua mai le vailā’au.
E le’o moemoenoa le Komiti N.E.O.C. i le mata’ituina pea o auala ‘ese’ese e atili malupuipuia ai si o tatou atunu’u mai le ono a’afia i le Koviti – 19.
Saunoa le Fa’atonu Sili Aoao o le Matāgaluega o le Soifua Mālōlōina, Afioga ia Leausa Samau Dr. Take Naseri, pe afai ae mautū ma uma ona faia tui puipui o i latou nei, o le atili fa’amalosia ai i ‘āoga ia pepa tui o fanau ona fa’atoā talia lea mo le a’oa’oina i ‘āoga o le a ulufale ai.
O lo’o o gatasi fo’i lea fuafuaga ma le silasila mamao a le Mālō i le toe fa’agasolo ai o se isi tuiga tele e toe tatao ai le tui e lua ua mae’a mo i latou ua mae’a uma ona faia tui puipui o le Koviti – 19.
O le auala fo’i lea e atili fa’amautū ai, le maua’a ma le mausalī o a tatou tapenaga e tete’e atu ai i lea fa’ama’i mata’utia.
I le taimi nei, o lo’o fa’afaigatā pea i nai tagata ona aga’i ane lava latou e fa’atino o latou tui puipui, ma o se popolega lea e tupu pea i le Mālō auā o lea to’aitiiti e ono fa’atuputeleina ai se siama e ono a’afia ai latou nei, ma ono pepesi ai i le atunu’u ma ma’imau ai le soifua.
Mo le taimi nei ua ausia le 86.1% o tagatanu’u Samoa e agava’a mo le tui puipui o tagata mātutua ua mae’a faia o latou tui uma e lua, ae mo fanau ua 17,982 i latou ua faia o latou fa’atusatusa i le 24,734 ua mae’a faia ulua’i tui puipui o le Pfizer.
Saunoa Leausa o le taimi nei, ua tele nisi o vailā’au e tu’uina mai ma toe fa’afo’i ua lē aogā ona ua pasi taimi fa’atulagaina e tatau ona fa’aaogā ai, ma o lo’o auaua’i mai pea nei tui auā le mamalu o le atunu’u e le’i faia tui puipui muamua ma le lona lua mo tagata mātutua e fa’apea fo’i i le fanau.
O lona uiga, o lo’o tatala pea le avanoa mo nai fanau ma tagata mātutua o lo’o fa’alotolotolua pea ma fa’afaigatā ona aga’i e fai o latou tui, mo le fa’ataunu’uina o latou tuiga i le Ofisa Autū o le Matāgaluega o le Soifua Mālōlōina i Moto’otua.
