Fa’amalosia pepa tui o le Koviti – 19 mo le aufaigaluega a le Mālō
Tusia: Tusiga Taofiga
Fa’ailoa e le Komiti N.E.O.C. le amata fa’amamaluina ma fa’amalosia i le masina fou – Fepuari 2022, le fa’aaliali o pepa tui o le Koviti – 19 mo le aufaigaluega uma a le Mālō pe ulufale i fale faigaluega.
Ua fa’ailoa e le Komiti o Fa’alavelave Tutupu Fa’afuase’i ma Fa’alavelave Matuiā (N.E.O.C.) o le masina fou o le a amata fa’amamaluina ma fa’amalosia ai le fa’aaliali o pepa tui o le Koviti – 19 mo le aufaigaluega uma a le Mālō ona fa’atoā talia lea i o latou Ofisa.
O lea pepa tui, e fa’ailoa ai ua mae’a uma tui puipui e lua, ma e lē taliaina fo’i se tagata faigaluega pe afai e na’o le tasi lou tui o le Koviti – 19 ua mae’a faia.
I fa’amaumauga a le Ofisa o le Komisi e Pulega Galuega a le Mālō, o lo’o fa’amauina ai mai le Tausaga e 2020 – 2021, e 2,290 ali’i faigaluega i auaunaga ‘ese’ese i le Mālō tusa lea ma le 40.7% ae 3,332 tama’ita’i tusa lea ma le 59.3% ma o i latou ia o lo’o tautuaina Samoa e ala i Matāgaluega ma Pisinisi Tumā’oti ‘ese’ese uma a le Mālō o lo’o i ai nei.
O le fa’amalosia o pepa tui mo le aufaigaluega a le Mālō, o se fa’atomuaga lea ma fa’ata’ita’iga lelei mo le atunu’u atoa ina ia tutūfa’atasi e puipui Samoa mai lenei fa’ama’i.
Saunoa fo’i le Fa’atonu Sili Aoao o le Matāgaluega o le Soifua Mālōlōina ia Leausa Samau Dr. Take Naseri, o le a amatalia fo’i lea fuafuaga i ‘āoga uma i le atunu’u, auā lava le malu puipuia o fanau mai le toe ono a’afia i se fa’ama’i i le lumana’i.
O lona uiga o le a fa’aopoopo lea pepa tui i isi pepa tui masani o fanau e pei ona sa sau a’i i tausaga ua mavae.
Na manino fo’i i le finagalo o le Ta’ita’ifono o le N.E.O.C. ia Agafili Tomaimanō Shem Leo, le naunautā’iga o le Mālō ma le fa’atuatuaga ua tu’uina atu i Pisinisi Tumā’oti ina ia o gatasi lelei le fuafuaga ua fa’ata’oto mo le aufaigaluega a pisinisi tumā’oti, o le tali fa’aaliali fo’i lea o le galulue feoeoea’i o le Mālō ma tagata uma e tete’e atu i le Koviti – 19.
Afai ae fa’atino lea faiga, o se itu lelei lea e aga’i ai nisi e le’i faia tui puipui o le Koviti – 19, e fa’atino o latou tui auā afai e lē faia, o lona uiga e ono lē taliaina fo’i i totonu o Ofisa faigaluega pe afai e fa’amalosia.
