KALENA FA’ALEA’OA’OGA MO FANAU A SAMOA 2022
Tusia: Tusiga Taofiga
Fanau ‘āoga i le ‘Āoga Tulagalua a Safotu, Savai’i.
I le mae’a o aso fiafia o lenei vaitau, ua fa’alauiloa aloā’ia ai e le Matāgaluega o ‘Āoga, Ta’aloga ma Aganu’u (M.E.S.C.) le Kalena ua mae’a tapenaina e mulimulitu’i ai le fa’agasologa o tausaga fa’alea’oa’oga mo le fanau i ‘Āoga uma a le Mālō.
Mo le kuata muamua fa’alea’oa’oga, o le a’e uma fai’āoga i le Aso 17 o Ianuari 2022 ae fa’atoā a’e le fanau i le Aso 31 o Ianuari 2022 ona fa’agasolo ai lea o a’oa’oga mo le 10 vaiaso se’ia mae’a i le Aso 08 Aperila 2022 ona mālōlō ai lea mo le na’o le tasi le vaiaso.
I le kuata lua, o le a amatalia a’oa’oga i le Aso 18 o Aperila 2022 mo le isi fo’i 10 vaiaso se’ia tū’ua i le Aso 24 o Iuni 2022 mo le lua vaiaso. Ae mo le kuata tolu, e amatalia i le Aso 11 Iulai mo le isi fo’i 10 vaiaso se’ia tuua i le Aso 16 Setema mo le lua vaiaso.
Ma le kuata fa’ai’u o lenei tausaga fa’alea’oa’oga, o le a toe a’e i le Aso 03 Oketopa 2022 se’ia tū’ua i le Aso 09 Tesema 2022 ma mālōlō ai mo le malologa umi e aofia ai ma aso fiafia mo le 7 vaiaso.
Mo aso mālōlō fa’ailogaina o tausaga ta’itasi, ua fa’ailoa mai e le Ofisa o ‘Āoga i lana kalena fa’alea’oa’oga, o le Aso 15 Aperila ma le Aso 18 Aperila o aso mālōlō ia mo le Eseta.
O le Aso 09 o Me le aso mālōlō mo le Aso Sa o Tinā, o le Aso 01 o Iuni le Tuto’atasi o lo tatou Mālō o Samoa.
Mo le aso mālōlō mo le Aso Sa o Tamā o le Aso 15 o Aokuso, ae Aso 10 o Oketopa le aso Mālōlō mo le Aso Sa Pa’epa’e o le Fanau, fa’atasi ai ma le Aso 25 o Tesema mo le Kerisimasi.
I lea lava kalena ua fa’amanino mai ai, pe a tū’ua fanau mo le 7 vaiaso o le tu’uaga umi, o le a toe a’e faiaoga i le Aso 16 Ianuari 2023 ae fa’atoā a’e fanau i le Aso 30 o Ianuari lava o lea lava masina.
O le isi lea galuega tele o le a feagai ma le mamalu o le atunu’u i le fa’ai’uga o lenei masina ma le masina fou, o le tapenaga mo le toe a’e o fanau i a’oa’oga, aemaise lava i fanau ua fa’atoā a’e i ‘āoga amata, o nisi ua mae’a vasega valu i ‘āoga tulagalua ma nisi ua i’u mai vasega 13 i Kolisi ‘ese’ese i le atunu’u, po’o fanau fo’i o le a a’e i Iunivesite ma Matātā ‘Ese’ese i totonu o le atunu’u.
O le mau tau’ave a Samoa, o fanau o le lumana’i lea o Samoa mo nei ma taeao, e tāua ai le fa’afailele ma aputiputi ina ia atamamai ma popoto auā se Samoa ola fiafia ma ola manuia ma tupu lona tamāoā’iga.
