E o’o mai le asō, Aso Sa 23 Ianuari 2022 talu ona tapunia atoa le atunu’u mai le 6:00 i le afiafi ananafi (Aso To’ona’i 22 Ianuari 2022), o lo’o tumau pea le numera o i ua aafia i le siama o le Koviti – 19 i le 15. E pei ona mua’i fa’ailoa atu i le atunu’u, o i latou uma nei ua a’afia sa malaga mai i le va’alele mai Ausetalia i le Aso Lulu, 19 Inauari 2022. O lo’o fa’anofoesea i latou uma nei ma e le’o i ai lava se tasi ua alia’e mai ai ni āuga o le fa’ama’i.
O lo’o fa’anofoesea fo’i le isi vaega o le pasese mai i lea faigāmalaga, ma o a latou su’ega lata mai na fa’atino i le Aso Faraile na te’a nei, na maua ai e le’o a’afia se tasi i le siama o le Koviti – 19. Ua fa’anofoesea fo’i le aufaigaulega sa muāau i galuega i le taunu’u mai o le va’alele. O ā latou su’ega sa fa’atino i le Aso Faraile na te’a nei, na maua ai e le’o i ai se tasi ua pesia i le siama o le Koviti – 19.
O lo’o fa’aauau pea ona i ai Samoa i le La’asaga lona 3 o le Puipuiga mai le fa’ama’i (Alert Level 3). E tusa ai ma aiaiga o Poloa’iga mo Fa’alavelave Tutupu Fa’afuase’i (S.O.E. Order) Numera 62, e fa’aauau lenei tulaga se’ia aulia le 6:00 i le afiafi o le Aso Gafua, 24 Ianuari 2022.
O lo’o fa’atino galuega mo le puipuiga o le saogālēmū lautele e le Malu o le Mālō, e aofia ai ma le va’avaaiga o le Taulaga o Apia.
E talosagaina pea le lagolago a le atunu’u i le tau’aveina fa’atasi o lenei fa’amoemoe, mo le puipuiga o si o tatou atunu’u. Fa’amolemole talimau i aiga mo le saogālēmū.
