Malaga o Vaalele mo le Masina o Fepuari 2022
I lana Fonotaga FK(22) 03 o le Aso Lulu 2 Fepuari 2022 ma fa’aauau ai i le Aso Tofi 3 Fepuari 2022, na talanoaina ai e le Kapeneta le Pepa PK(22)80 ma faamaonia ai faigamalaga mo vaalele ua faailoa atu i lalo:
I. Aso 5 Fepuari 2022 – Malaga a le Air New Zealand e aumai ai uta mai Niu Sila ma toe ave ai na o uta (cargo only);
II. Aso 12 Fepuari 2022 – Malaga a le Air New Zealand e aumai ai uta ma pasese na toe toloa mai i le Aso 22 Ianuari 2022 ma e ave ai pasese faapea oloa e faatau atu i fafo (Cargo & passengers both ways);
III. Aso 16 Fepuari 2022 – Malaga togipau a le Air New Zealand e auina atu ai tagata faigaluega mo galuega faavaitaimi i Niu Sila ae tapu ona aumai ai ni pasese (Outbound RSE Charter);IV. Aso 19 Fepuari 2022 – Le malaga mai o vaalele e aumai uta ae ave ai pasese ma uta i le taimi e toe foi ai (Cargo in, cargo and passengers out);
V. Le faigamalaga i le va o Samoa e lua e toe faafoi ai tagata Amerika Samoa na malaga mai e talosaga mo visa i le Ofisa o Amerika faapea tagata faigaluega na malaga mai i Niu Sila ia Tesema 2021 ma o loo faatali avanoa ai lava iinei. E aumai ai foi o tatou tagata o loo toe fia foi mai Amerika Samoa;
VI. E fa’aauau pea le usitaia o aiaiga faale-soifua maloloina ua faataoto mo nei malaga.
O lenei faaiuga na faia i lona tulaga faanatinati e tusa ai ma le Vaega 38(1)© o le Faavae o le Malo Tutoatasi o Samoa.
