Ou te faatalofa atu i si o tatou atunuu a o feagai ai ma faiga malologa o le afiafi. Faafetai i le Atua i lona agalelei ia Samoa. O loo tatou iai pea i taimi faigata ma le maaleale ona o le Koviti 19.
O lea faatoa maea ona feiloai le Kapeneta i le po nei, ina ua maua mai le faaaliga mai le Matagaluega o le Soifua Maloloina, i le faamaonia ai o le aafia o se tasi i tua mai o nofoaga faanofoesea i le siama o le Koviti 19. O lenei tagata sa faatino ana suega o le Koviti i le aoauli nei e tapena ai mo le tuua o le atunuu, peitai sa maua ai ua pisia i le siama.
O loo faatino nei e le Matagaluega o le Soifua Maloloina tulaga uma e saili ai le mafuaaga o le pisia o lenei tagata, atoa ai ma le sailia o i latou uma sa fesootai i ai ma latalata i ai. O se galuega tele lenei galuega, peitai e ao ona faatino ina ia vave ona maua i latou uma ua masalomia ua aafia, ma fai a latou suega, ma faatino galuega faasoifua maloloina e moomia mo latou.
E tusa ma le faatulagaina o a tatou laasaga mo le puipuiga o si o tatou atunuu mai le faamai, ua ou faasilasila aloaia atu ai, e afua atu i le ta o le 12 i le vaeluaga o le po nanei o le a se’e atu ai le atunuu atoa i le Laasaga 2 (Lanu moli) o le tatou puipuiga mai le Koviti 19. I lalo o le Laasaga Lua, o le a;
- Toe faamalosia ai le faaali o tatou pepa tui i soo se nofoaga e agai mai iai.
- Le faia o talifofoga i taimi uma
- Tapunia uma o aoga i le atunuu
- Tapunia o falekalapu, faleava, fale koleni ma taaloga uma.
E faaauau ona tatala faleoloa ma isi auaunaga e pei o maketi, faletalavai ma pamu penisini i taimi faatulagaina.
E afua atu i le vaeluaga o le po taeao, Aso Toonai, 19 Mati 2022, o le a see atu ai le atunuu atoa i le laasaga 3 (Lanu mumu) seia aulia le vaeluaga o le po o le Aso Lua, 22 Mati 2022.
I lalo o le laasaga tolu o le a tapunia atoa le atunuu, ma e faapena foi ma aoga, galuega, femalagaiga a vaa ma vaalele i le totonu o le atunuu ma malaga faavaomalo. Sei vagana ai auaunaga ua faatulaga mo le tuuina atu o auaunaga moomia mo le atunuu atoa.
A o iai le atunuu i le suiga o laasaga, o le a galulue le Komiti o Faalavelave Faafuasei e taimua ai le Matgaluega o le Soifua Maloloina e faatino vaega uma moomia mo le sailia o i latou sa iai ni fesootaiga pe latalata i le ua aafia, ma faagasolo galuega faasoifua maloloina mo le puipuiga o le atunuu.
O le mea lea le atunuu e, e fautuaina le tapena o mea e moomia e o tatou aiga taeao, e fasauni ai i le tapunia atoa o le atunuu i le vaeluaga o le po a taeao.
O le faalauteleina o aiaiga o vavao o le a faailoa atu i faamatalaga e tuuina atu e lo tatou Malo.
Samoa e, ia tatou lototetele pea ma faamoemoe i le Atua aua o Ia lava e tu taumua i aso faigata faapenei. O le tatalo ia mau pea le toovae, ma lava papale pea si o tatou atunuu a o taumafai lenei galuega mo lo tatou puipuiga.
Faafetai tele i lo outou faitatalo ma le tapuaiga mau i si o tatou atunuu.
SOIFUA
