IUGAFONO A LE KAPENETA, Aso 22 Mati 2022.

I lana Fonotaga FK(22) Faapitoa 15 o le Aso Lua 22 Mati 2022, na talanoaina ai e le Kapeneta le Pepa PK(22)246 ma faamaonia ai e faapea:

1. Le fa’aauau ona iai pea o Samoa i le Laasaga 3 mo lapataiga o le faama’i o le Koviti19, mo le isi 2 vaiaso e afua atu i le vaeluaga o le po o le Aso Lua, 22 Mati seia aulia le vaeluaga o le po o le Aso Lua, 5 Aperila 2022. E toe iloilo e le Kapeneta lenei fuafuaga i le maea ai o le vaiaso muamua o le iai o le atunuu i le Laasaga 3.

O aiaiga o le faaauauina o le iai o le atunuu i le Laasaga 3 ua faailoa atu i lalo:

1. Aso e tatala ai auaunaga moomia e pei ona faailoa atu i lalo:
2. Aso Lulu 23 Mati 2022
3. Aso Toonai 26 Mati 2022
4. Aso Lua 29 Mati 2022
5. Aso Toonai 2 Aperila 2022
6. Aso Lua 5 Aperila
7. Le faatumauina pea o itula e tatala ai auaunaga moomia mo le atunuu lautele mai le 8:00 i le taeao i le 2:00 i le aoauli mo aso ua taua i le Puipui (i);
8. Le faaauau pea o malaga a vaalele mo le aumaia o uta faapea le malaga ese atu o tagata i le masina o Mati 2022;
9. Le faapafala o malaga a vaalele i le Aso 24 Aperila, Aso 15 Me ma le Aso 5 Iuni 2022 faapea malaga o loo talosagaina e le Malo o Ausetalia mo le taimi nei;
10. O le malaga o le Aso 29 Mati 2022 o le a amata faanofoesea ai pasese e taunuu mai i le atunuu mo le fitu(7) aso ma o le a iloilo lenei tulaga i le agai atu i le lumanai;
11. Le faatinoina o tui puipui mo le fanau laiti a o iai le atunuu i le Laasaga 3 mo Savaii;
12. Le faaauau pea o tulaga lelei i le va ma Paaga mai Fafo i le aumaia o vailaau aemaise o le fesoasoani tele ua mafai ai ona oo tuiga i le fanau laiti. Ia tapena e le Matagaluega o le Va i Fafo ma Fefaatauaiga tulaga masani o le tuuina atu o le faafetai a le Malo i a tatou Paaga alolofa mai;
13. Le faatulagaga o le fuafuaga mo suega o le Koviti19 (Rapid Antigen Tests) i falemai, nofoaga ua fuafua e faatino ai ma le faaaoga o tāfāala e faagaioi ai suega (tests) ma tuiga (vaccination) mo le atunuu;
14. Le faaauau ona tatala o pamu penisini a le Malo mo taavale a le Malo o loo faaaoga e faatino ai galuega moomia mo le tali atu i le faamai a o iai le atunuu i le Laasaga 3;
15. Le faataga o sauniga i luga o tuugamau (burial services) mo maliu mo nā o le sefulu (10) tagata o le aiga e nonofo faatasi (same house hold) ma le failotu e toatasi (1).  E nā o aso o loo tatala ai auaunaga moomia e faataga ai nei sauniga.

E faatumauina pea isi aiaiga o Poloaiga o Faalavelave Tutupu Faafuase’i na mua’i tuuina atu.

O lenei faaiuga na faia i lona tulaga faanatinati e tusa ai ma le Vaega 38(1)© o le Faavae o le Malo Tutoatasi o Samoa.