TUUMALO O LE AFIOGA, VA’ELE PA’IAAUA IONA PA’IAAUA SEKUINI, 07 Aperila 2022
Ou te muai faatulou i le paia o le Malumalu o le Atua, vaeatu paia o le Faapotopotoga ua sasao nei,
Susu lau Susuga i le Taitai o le Sauniga,
Rev. Muao Fagasua aemaise lou auva’a le aufaigaluega paia a le Atua.
Fa’atulou atu fo’i i paia fa’aleAtua¸ le aufaigaluega totofi a le Atua i so’o se fata faitaulaga. Ou te fa’atulou atu fo’i i paia fa’aleMalo, le afio mai le afioga i le Sui Palemia, se taimi tatou feiloa’i ma le afioga i le Palemia i toe sauniga o Va’ele i lona oliolisaga. Le fo’i e afio mai le afioga i le Minisita o le Matagaluega o Fa’ato’aga ma Faigafaiva, o le afioga fo’i i le Ta’ita’ifono o le Vaega Fa’a’upufai o le Fa’atuatua i le Atua Samoa Tasi.
Le paia lava lea aua le afio o Lana afioga i le Ao Mamalu o le tatou Malo ma lana Masiofo, afio fo’i le afioga i le Sui Tofia ma lona faletua, afio le afioga i le Palemia o le Ta’ita’i o le tatou Malo aemaise fo’i le mamalu ma le paia o le Kapeneta aemaise fo’i le Sui Fofoga Fetalai ma le mamalu o Sui Usufono uma o le tatou Fono Aoao
Faitulafono, le Palemene.
Ou te fa’atulou atu fo’i aua le Gasetoto o le Masina ma le Taape o Papa
Ua lagia fo’i le Malae nei,
E Susu ai Mataiá o le Tama a le Fale,
Afio Galumalemana (o le Aloalii) ma Tupuola,
Alalata’i le Ala i le Pule, lau Tofa Toī, Tulaga ma Pula
Ma le mamalu ia te oe Faleata ma Ituau
Susu foi lau Susuga i le Faafeagaiga Tau i le lagi a le EFKS i Vaitele – Uta nei,
ma le mamalu o le Ekalesia i ona tulaga fa’alupe,
Auā ua tuua le Malo e le Susuga i le Aoao Fesoasoani, le Susuga Va’ele Pa’iaaua Iona Pa’iaaua Sekuini.
Ou te faatulou atu fo’i auā ua Taatiu ma ua Matagitogaina le Malae i Faletagaloa, o le falesa o Pule, e teu ai manu fou ma ona popo, o le to’aiga o Tumua. O le tuua lava lea o le Malo e le alii o le nu’u, usuia fo’i o le fono e le to’afia o Tulafale ma le la to’alua ma i laua Safune o le malu o Faletagaloa.
Ua gasolosolo fo’i ao, ta’ape papa, tafea le tau’ofe i malae sa’ili,
E afio ai le Toafa o Alii,
Alalata’i lau Tofa Tu’umatāvai,
Lau Fetalaiga Pa’iaaua o Le na ituala ése,
Le Aiga Sa-‘Afa’ese,
Ma le mamalu i le Nofo Ituaiga i le Faleupolu o Safune,
Auā ua tuua le Malo e le Afioga i le Sui Usufono o le Palemene mo le Itumalo Palota o Gagaifomauga Nu. 2,
A’o le Afioga fo’i i le Minisita Lagolago o le Matagaluega o Faatoaga ma Faiga Faiva,
Le Afioga ia VA’ELE Pa’iaaua Iona Pa’iaaua Sekuini,
Ou te faatulou foi i le paia o aiga e fia, Suli ma Feoi,
Le paia o le afioga ma le Itumalo, Aemaise o le Faletua ma le Nofo-a-alo.
Ou te faatalofa atu foi i le paia maualuga o le Sauniga i lenei taeao.
O sa ma faigā i le afua mai i le Matasaua seia paia le siú o le fanua,
O le a nuunuu atu ia faatini o Tausala.
I le ava tele, ou te tulai ai i loú tulaga o le Fofoga Fetalai o le Palemene o Samoa,
E fai ai a’u ma Sui o le Palemene ma le Malo,
Ou te faaleoina se molimau o le soifua tautua o le Afioga ia VA’ELE Pa’iaaua Iona Pa’iaaua Sekuini, a’o avea ai o ia ma Sui Usufono o le Palemene mo le Itumalo Palota o Gagaifomauga Nu. 2. Na filifilia aloaia le Afioga VA’ÉLE Pa’iaaua Iona Pa’iaaua Sekuini i le Palemene o le atunuu i le Paeaiga Lona XVII o lo’o faagasolo nei, i le Aso 9 Aperila 2021 ma
faatautoina i le aso 24 Me 2021, ma o ia o se Sui o le Vaega Faaupufai a le Faatuatua i le Atua Samoa ua Tasi (F.A.S.T.)
A fua i ai i le aso na faatauto ai le Afioga VA’ELE, e faamanava e le Atua ana feau, ua tusa ma le 10 masina talu ona aloaia lona tofiga o le Sui Usufono o le Palemene, ae atoa i le Aso To’ona’i, 09 Aperila 2022, le tasi le tausaga talu ona filifilia ma tu’uina mai ia te ia le fa’atuatuaga o lona Itumalo o Gagaifomauga Nu. 2.
Na faamaonia e le Fono Aoao Faitulafono i le aso 14 Tesema 2021 le tofia ma le filifilia o ia e avea ma Sui Usufono o nisi o Komiti Faa-Palemene, ma e tolu Komiti a le Palemene na tofia ai o ia:-
- Komiti o Tulafono Tumau, Mataupu Tau Faiga Palota, Talosaga ma Tofiga
Faale-Faavae; - Komiti o Tupe Maua ma Tupe Totogi; ma le
- Komiti o le Vaega Tau le Tamaoaiaga
E tu’umalo le Afioga VA’ELE, o lo’o avea ma Taitaifono o le Komiti o Tupe Maua ma Tupe Totogi, ma o lana folasaga muamua fa’aleTaitaifono na fa’afetaia ai e le Palemene aemaise o lana Komiti, ma le Taitai o le Itu Agai, o le Sui Taitaifono lana taitaiga o lea Komiti taua a le Palemene.
O lo’o fa’apea fo’i ona avea ma Sui Usufono o le Komiti Suesue Faapitoa a le Palemene, o lo’o nafa ma le iloiloina o se mataupu tutoa a le Palemene i le taimi nei. E faamanava e le Atua ana feau, ua lata ina maea lenei galuega tele o lo’o feagai ma la latou Komiti.
Suesue Faapitoa.
O le uluai fonotaga a le Palemene i le Paeaiga lenei Lona XVII i le masina o Setema 2021, na tagofia ai le uluai Tala Faatatau o Tupe a le Malo Filifilia ua i ai nei, ma o le aso 21 Setema 2021 i lea lava fonotaga, na uluai saunoa ai le Afioga VA’ELE Pa’iaaua Iona Pa’iaaua Sekuini i lana Saunoaga Faa – Taupou i totonu o le Maota Fono o le
Palemene.
E anoanoa’i mataupu taua sa ia finauina mo si ona itumalo i lana Saunoaga Faa -Taupou:- - O auala e agai i uta o lona itumalo e fia faaleleia. Na ia saunoa, ua toatele aiga ua agai i uta, ae o lo o faaletonu auala. O lana molimau, e i ai nisi o auala ua silia ma le 20 tausaga e le i faia lava iai se galuega toe faaleleia.
- O faamanuiaga mo tagata e i ai a’afiaga tumau o le soifua e pei ona amanaia e le Malo, na ia faafetaia le Malo ona o le fuafuaga mo le faamanuiaga mo i latou;
- O pasese o vaa i le va o Upolu ma Savai’i, na afea i lana faafetai ona ua leva na tatau ona i ai se pa’ū i pasese o le mamalu o le atunuu e femalagaaí i le va o Mulifanua ma Salelologa;
- O le suavai ma le eletise mo lona itumalo na ia finauina e fia faaleleia;
- O le faasao e fia faia i totonu o vaituloto o le itumalo;
- O polokalame e faaaoga ai Sui o le Malo ma Sui Tamaitai o Nuu;
- O le 1,600 eka o eleele i Ologogo pe mafai ona toe faafoi atu i le itumalo mo le galueaina aua le tamaoaiga o le atunuu;
- E fia siitia le ánofale o le Falemai o lo o agai iai lona itumalo, aemaise le Falemai Tele i Tuasivi;
- E moomia le fesoasoani a le Malo mo le toe lalagaina o faatoaga i so’o se ituaiga i totonu o le Itumalo, malamalama lelei lona Itumalo tasi lenei Faipule fai fa’ato’aga, o le fa’ato’aga ‘ava ma le fa’ato’aga talo.
- O le fia faaleleia o tulaga tau fesootaiga mo aoga.
O aga masani lava ia o le faiva faa-Sui Usufono o le Palemene, o le lagalaga i mea lelei mo le agai i luma o le itumalo.
Talofa, o lea ua afe moe le folauga, ae e le i tau lau o lona faamoemoe mo ni manuia o
lona itumalo, na filifilia o ia i lenei Paeaiga. O nisi o upu tomua o lana Saunoaga Faa-Taupou, e fai pea ma molimau i ona uiga a’o ia nofoia le Nofoa o le Itumalo, e faapea, “…… o le ánofale o le Maota o Samoa, e anagatā, o lona fausaga e mamanu i le aga tausili ma le agaalofa, ae salani mea uma i le faamaoni ma le amiotonu”.
O se tamalii e faaaloalo ma tauagafau. E to’afilemu, agamalu, ma laufofoga fiafia E iloa i ona uiga, o ia o se tagata finau ma manatunatu i mea lelei i lona tauaveina o le Nofoa o le itumalo.
E le soona sii so’o lana tōfā, pe a tauaofia le Palemene. O se tamalii foi e ese le faaaloalo i isi Sui Usufono o le Palemene e aofia uma ai lana Vaega Faaupufai faapea foi i Sui o le Itu Agai.
O uiga moomia ia i so’o se Sui Usufono o le Palemene, ia faaaloalo i isi Sui Usufono o e Palemene.
O uiga ia e faagalo-gata ai pea o ia i le mafutaga i Galuega Fai a le Palemene.
O se tagata aoga mo le Palemene ma le atunuu.
O se avanoa foi tatou te faafetaia ai le Atua ona o VA’ELE.
Tatou te taufai faafetaia le Atua ona o lenei tagata aogā na IA saunia ma aumaia mo le Palemene ma le atunuu.
E momoli atu fo’i le faafetai i le Faletua ma le Nofo-a-alo.
Aiga ma le Itumalo, ona o la outou tatalo na mafai ai ona manuia le alofaiva o lana auauna nei, ma ta’u-āogaina ai mo le Palemene ma le Malo.
E le gata i lea, a o nai ana Faafeagaiga Tau i le Lagi ma ana Ekalesia, i la outou foi tatalo ma le tapuaiga, na manuia ai le galuega sa o matou militino faatasi ai ma lana auauna nei, a’o le’i amia e Lona Matai Sili.
Lau Afioga VA’ELE. Pa’iaaua Iona Paa’iaaua Sekuini, ua fa’afetai mo mea uma, Fa’afetai tautua Mālō, fa’afetai fa’aea atunu’u. Ua malie lau tautua, ma e le’o auaoa fo’i le lagi.
E ui ina mou lou tino, ae e manatua pea galuega lelei uma sa e faia mo le Palemene ma le Malo, ma lou atunuu.
Sau ia oe ia ina alu. Tatou te toe feiloai foi i se aso. Ia tafimala lau faigamalaga.
Manuia lau Susuga i le Taitai o le Sauniga, Faamanuia le Atua i le paia o le tatou Faapotopotoga, Ia i ai le Faamaisega ma le Faamafanafanaga a le Atua i le Faletua & Nofo-a-alo aemaise aiga e fia ma le Itumalo.
Ona o Iesu, Soifua ma ia Manuia.
