TALA LATA MAI O LE PEPESI AI TUA O LE KOVITI – 19
LATOU UA A’AFIA I LE KOVITI – 19
Ua lipotia e le Matāgaluega o le Soifua Mālōlōina le fa’aopoopo ai oi latou fou e to’a 342 ua a’afia i le siama o le Koviti – 19 mai le mamalu o le atunu’u lautele ma le to’atolu (3) fou oi latou na malaga mai fafo ua a’afia fo’i i totonu o lenei 24 itula.
O le aofa’i atoa o e ua a’afia talu ona pepesi i tua le Koviti – 19 i le Aso 17 Mati, 2022 e to’a 3,602 ae lē aofia ai le to’a 63 oi latou sa pesia na malaga mai atunu’u i fafo.
E to’a 7 i latou o lo’o taofia i le Maota Gasegase i Moto’otua ma le to’atolu (3) o lo’o i le Potu Tigāina (ICU). E o’o mai le asō, e 31,435 su’ega ua fa’aāoga mo su’ega a le mamalu o le atunu’u.
LATOU UA MĀLILIU ONA O LE KOVITI – 19
Ua fa’amaonia e le Matāgaluega o le Soifua Mālōlōina e to’a 4 i latou fou ua māliliu ona o le Koviti – 19 i totonu o lenei 24 itula ma ua si’itia ai le aofa’i oi latou ua māliliu i Samoa i le to’a 7.
O le aotelega lea oi latou ua pesia i le siama o le Koviti – 19, o fa’amaumauga i su’ega ua fa’aāoga mo le atunu’u lautele fa’atasi ai ma i latou ua māliliu i le fa’ama’i ma mafua’aga ua afua ai: 2pm 07 Aperila -2pm 08 Aperila 2022.
