Ua fa’amaonia e le Matāgaluega o le Soifua Mālōlōina le fa’aopoopo ai oi latou fou e to’a 427 ua pesia i le siama o le Koviti – 19. E to’a 12 i latou o lo’o taofia i le Maota Gasegase i Moto’otua ma le to’atolu (3) o lo’o i le Potu Tigāina talu mai le 48 itula i le itula e 2:00 i le aoauli o le Aso 08 Aperila 2022 se’ia o’o mai le 2:00 i le aoauli o le Aso 10 Aperila 2022.
E fautuaina le mamalu o le atunu’u, fa’amolemole ia utagia ma usitā’ia fautuaga fa’alesoifua mālōlōina o lo’o tu’uina atu pea e le Matāgaluega o le Soifua Mālōlōina ma le Ofisa o Fa’alavelave Fa’afuase’i (N.E.O.C.) ina ia nofo lelei i ‘āiga ma taofi le alu i le galuega pe afai ua māua ni āuga ua fa’alogoina ai ua fa’ama’ima’i ma ua lē atoatoa ai le malosi o le tino.
O le faia o lou tui puipui, o le puipuiga sili lea mo tatou uma e tete’e atu ai i le Koviti – 19.
AOFA’IGA O E UA MĀLILIU
Ua fa’amaonia fo’i le māliliu ai o nisi fou e to’alua (2) ona o āuga o le Koviti – 19 i totonu o lenei 48 itula ma ua si’itia ai le aofa’i oi latou ua māliliu i le to’aiva (9) talu ona sao i tua le fa’ama’i i le Aso 17 Mati 2022. O i lāua ua fa’amauina ua māliliu, o ni tina e 90 tausaga ma le 63 tausaga le matutua.
O le amanaia ma le fa’aaloalogia o ‘āiga o e ua māliliu, o le a lē i ai ai nisi fa’amatalaga fa’aopoopo e tu’uina atu.
O lenei lipoti sa tu’ufa’atasia e le Matāgaluega o le Soifua Mālōlōina mai le itula e 2:00 i le aoauli o le Aso 08 Aperila aga’i le Aso 10 Aperila 2022.
