Ua fa’amaonia e le Matāgaluega o le Soifua Mālōlōina le fa’aopoopo ai oi latou fou e to’a 701 ua pesia i le siama o le Koviti – 19. E to’a 17 i latou o lo’o taofia i le Maota Gasegase i Moto’otua ma le to’alua (2) o lo’o i le Potu Tigāina talu mai le 48 itula i le itula e 2:00 i le aoauli o le Aso 10 Aperila 2022 se’ia o’o mai le 2:00 i le aoauli o le Aso 12 Aperila 2022.
E fautuaina le mamalu o le atunu’u, fa’amolemole ia utagia ma usitā’ia fautuaga fa’alesoifua mālōlōina o lo’o tu’uina atu pea e le Matāgaluega o le Soifua Mālōlōina ma le Ofisa o Fa’alavelave Fa’afuase’i (N.E.O.C.) ina ia nofo lelei i ‘āiga pe afai ua māua ni āuga ua fa’alogoina ai ua fa’ama’ima’i ma ua lē atoatoa ai le malosi o le tino, ma o loo fa’amalosia pea le faia o talifofoga. E fa’amanatu atu foi i le mamalu o le atunuu ina ia fa’atinoina tui puipui aua lava le malu puipuia o tagata lautele. O le faia o lou tui puipui, o le puipuiga sili lea mo tatou uma e tete’e atu ai i le Koviti – 19.
AOFA’IGA O E UA MĀLILIU
Ua lipotia mai fo’i e le Matagaluega o le Soifua Maloloina le fa’aopoopo ai o se tasi (1) ua maliu ona o āuga o le Koviti – 19 i totonu o lenei 48 itula ma ua si’itia ai le aofa’i oi latou ua māliliu i le to’asefulu (10) talu ona sao i tua le fa’ama’i i le Aso 17 Mati 2022. O le ua fa’amauina ua māliu, o se tama e 70 tausaga le matua.
O le amanaia ma le fa’aaloalogia o ‘āiga o e ua māliliu, o le a lē i ai ai nisi fa’amatalaga fa’aopoopo e tu’uina atu.
O lenei lipoti sa tu’ufa’atasia e le Matāgaluega o le Soifua Mālōlōina mai le itula e 2:00 i le aoauli o le Aso 10 Aperila aga’i le Aso 12 Aperila 2022.
