TULAGA UA I AI LE PEPESI I TUA O LE KOVITI – 19
Ua fa’amaonia e le Matāgaluega o le Soifua Mālōlōina le pesia ai o i latou fou e to’a 119 mai le mamalu lautele o le atunu’u fa’atasi ai ma le to’alima (5) o gasegase o lo’o taofia i nofoaga fa’apitoa i le Falema’i i Moto’otua i totonu o 48 itula mai le 2:00 i le aoauli o le Aso 06 Me 2022 i le 2:00 i le aoauli o le Aso 08 Me 2022. Ma ua si’itia ai le aofa’i o e ua a’afia i le 10,969. O le to’atele o le mamalu o le atunu’u ua pesia o lo’o aumau i Upolu ma e to’a 9,646 a’o le 1,308 o lo’o i Savai’i fa’atasi ai ma le to’a 15 mai Manono – Tai.
TAGATA UA MĀLILIU ONA O LE KOVITI – 19
I totonu o lenei 48 itula ua lipotia ai e to’atasi (1) le tagata ua maliu ona oāuga o le Koviti – 19 ma si’itia ai i le to’a 23 i latou ua māliliu i le fa’ama’i. O le ua maliu o se tamā 80 tausaga o le soifua e i ai ona gasegase tumau ma e le’i faia fo’i ni ona tui puipui o le Koviti – 19.
O talosaga molipo, o fa’amaisega ma fa’amafanafanaga e tumau pea i luga o nai ‘āiga ma fanau o i latou ua māliliu ona o lenei fa’ama’i.
I le fa’aaloalogia ma le amanaia o tau ‘āiga o e ua fai lagi le folauga, o le ala lea, o le a leai ai nisi fa’amatalaga fa’aopoopo e tu’uina atu i lo tatou Mālō.
O fautuaga e tumau pea i le mamalu o le atunu’u, auā le puipuiga o le soifua mālōlōina lautele, ina ia faia tali fofoga i taimi uma, tausisia le nofo ma le tutū vāvā i nofoaga faitele ma ia faia lou tui puipui auā o le puipuiga sili lea mo tagata uma e tete’e atu ai i le sosolo fa’aafi o le Koviti – 19. Mo i latou ua masalomia le a’afia i āuga o le fa’ama’i, fa’amolemole nofo lelei i ‘āiga ma fa’anofoesea i se nofoaga fa’apitoa e tau mamao mai i latou e pele iā te oe.
Aotelega o le Lipoti mo le tala lata mai o le Koviti – 19 sa tapenaina e le Matāgaluega o le Soifua Mālōlōina i le ta tonu o le 2:00 i le aoauli o le Aso 06 o Me e agai atu ile itula e 2:00 ole aoauli o le Aso 08 Me 2022, ma ua au’ili’ili atu e fa’apea:
Ua saunia foi e le Matagaluega o le Soifua Maloloina se lipoti lata mai ua fa’amauina i totonu o aso e fitu (7) talu ai, e auiliili ai le tulaga o le KOVITI-19 i totonu o Samoa mai ile Aso 06 Me mai i le itula e 2:00 ile afiafi e oo ile Aso 08 Me i le 2:00 i le afiafi, 2022. O lenei lipoti o loo tu’ufa’atasia ma auiliili ai fa’amaumauga o le fa’amai talu mai le Aso 17 o Mati ina ua fa’amaonia le pepesi ai o le fa’amai i tua ile mamalu lautele o le atunu’u. Ua fa’amauina foi fa’amaumauga mo tui puipui ua maea fa’atinoina mo le mamalu o le atunuu. Silasila i le lipoti ua saunia e le Matagaluega o le Soifua Maloloina i le mo nisi fa’amatalaga.
—-MA’EA—
