TALA LATA MAI O LE PEPESI AI TUA O LE KOVITI – 19
I le lipoti o lenei fitu aso po’o lenei vaiaso atoa mai le 2:00 i le aoauli o le Aso 15 Me 2022 i le 2:00 i le aoauli o le Aso 22 Me 2022, ua fa’amauina ai e 792 latou fou ua pesia i le siama o le Koviti – 19 ma ua si’itia ai i le 12,757 le mamalu o le atunu’u ua a’afia i lenei fa’ama’i.
O le aofa’i o e ua pesia, o lo’o mafuli lava i Upolu nei tusa lea ma le 10,792, e to’a 1,949 o lo’o aumau i Savai’i ma le to’a 16 mai Manono – Tai. O e na malaga mai fafo ua a’afia i le Koviti – 19 e to’a 86 e aofia ai ma le to’alua (2) o gasegase fou. E to’aono (6) e ua pesia o lo’o taofia nei i le Falema’i i Moto’otua ae leai se tasi oi le Potu Tigāina (I.C.U.).
E fautuaina pea le mamalu o le atunu’u, ina ia tausisia fautuaga fa’alesoifua mālōlōina mo le soifua manuia o tagata uma, e ala i le faia o punifofoga, tausisia le nonofo ma le tutū vāvā mo le lua mita mai le isi tagata, fufulu mamā lima i taimi uma. Mo e ua masalomia le a’afia i āuga o le fa’ama’i, fa’amolemole fa’anofoesea lelei i ‘āiga i se nofoaga fa’apitoa tau mamao mai isi tagata aemaise e pele iā te oe.
O lo’o fa’aauau pea tuiga i le taimi nei i Moto’ota ma falema’i uma fa’aitumālō. Mo e e le’i mae’a po’o le le’i faia fo’i o tui puipui o le Koviti – 19, fa’amolemole e talosagaina lo outou mamalu, ina ia faia o outou tui puipui, auā na’o le pau lea o le puipuiga sili mo tagata uma e tete’e atu ai i lenei fa’ama’i.
I LATOU UA MĀLILIU
Ua fa’amaonia fo’i le i ai o le maliu fou i totonu o lenei fitu aso e pei ona lipotia muamua atu, ona o āuga o le Koviti – 19 ma ua si’itia ai i le to’a 25 e ua māliliu. O le ua maliu o se tamā matua 64 tausaga o le soifua, e i ai ona gasegase tumau peita’i ua mae’a uma ona faia ona tui puipui e lua o le Koviti – 19 fa’atasi ai ma le tui fa’aopoopo.
O le fa’aaloalogia ma le amanaia o ‘āiga o e ua māliliu, o le a leai ai se isi fa’amatalaga fa’aopoopo e tu’uina atu mai lo tatou Mālō.
Aotelega o le Lipoti mo le tala lata mai o le Koviti – 19 sa tapenaina e le Matāgaluega o le Soifua Mālōlōina i le ta tonu o le 2:00 i le aoauli o le Aso 15 o Me e agai atu ile itula e 2:00 ole aoauli o le Aso 22 Me 2022, ma ua au’ili’ili atu e fa’apea:
Ua lenei lipoti ua saunia e le Matagaluega o le Soifua Maloloina ua fa’amauina ai se lipoti lata mai i totonu o aso e fitu (7), e auiliili ai le tulaga o le KOVITI-19 i totonu o Samoa mai ile Aso 15 Me mai i le itula e 2:00 ile afiafi e oo ile Aso 22 Me i le 2:00 i le afiafi, 2022. O lenei lipoti o loo tu’ufa’atasia ma auiliili ai fa’amaumauga o le fa’amai talu mai le Aso 17 o Mati ina ua fa’amaonia le pepesi ai o le fa’amai i tua ile mamalu lautele o le atunu’u. Ua fa’amauina foi fa’amaumauga mo tui puipui ua maea fa’atinoina mo le mamalu o le atunuu. Silasila i le lipoti ua saunia e le Matagaluega o le Soifua Maloloina ua tu’uina atu mo nisi fa’amatalaga.
—-MA’EA—
