TALA LATA MAI O LE PEPESI AI TUA O LE KOVITI – 19
Ua lipotia mai e le Matāgaluega o le Soifua Mālōlōina le pesia ai o i latou fou e to’a 302 i le fa’amai o le KOVITI-19 i totonu o lenei 48 itula mai le 2:00 i le aoauli o le Aso 22 Me 2022 i le 2:00 i le aoauli o le Aso 24 Me 2022. E to’a 301 i latou fou ua a’afia mai tua i le mamalu lautele o le atunu’u ma le to’atasi (1) na malaga mai fafo ua fa’amauina o lo’o pesia i le taimi nei.
Ua si’itia ai le aofaiga oi latou (community & border cases) ua a’afia i le siama o le Koviti – 19 i le 13,145. E to’alima e o lo’o taofia i le taimi nei i nofoaga fa’apitoa i le Falema’i i Moto’otua.
E fautuaina pea le mamalu o le atunu’u ina ia usitā’ia ma tausisia fautuaga fa’alesoifua mālōlōina mai lo tatou Mālō e ala i le tutū ma le nofo vāvā mo le lua mita mai le isi tagata, fai lou tali fofoga ma ia aga’i e fai lou tui puipui auā o le puipuiga sili lea mo le lalolagi atoa e tete’e atu ai i lenei fa’ama’i mata’utia.
Afai ua masalomia lou a’afia i āuga o le Koviti – 19, fa’amolemole fa’anofoesea lelei i se vaega fa’apitoa o lou fale, ma faia puipuiga masani ua fa’ailoa atu e le Soifua Mālōlōina.
O le Aotelega lea o le tulaga o lo’o i ai le pepesi o le Koviti – 19 i totonu o Samoa, ua fa’amauina mai i totonu o le 48 itula mai le 2:00 i le aoauli o le Aso 22 Me 2022 se’ia o’o mai i le Aso 24 Me 2022.
