TALA LATA MAI O LE PEPESI AI TUA O LE KOVITI – 19
Ua fa’amaonia mai e le Matāgaluega o le Soifua Mālōlōina le pesia ai o i latou fou e to’a 119 i le fa’ama’i o le Koviti – 19 i totonu o lenei 48 itula e amata mai i le 2:00 i le aoauli o le Aso 26 Me 2022 i le 2:00 i le aoauli o le Aso 28 Me 2022.
Peita’i e to’alima (5) i latou ua a’afia o lo’o taofia nei i le Falema’i i Moto’otua, ma ua si’itia ai le aofa’i o e ua pesia i lenei siama i totonu o Samoa talu ona mama i tua le fa’ama’i i le Aso 17 Mati 2022 i le to’a 13,499.
TAGATA UA MĀLILIU ONA O LE KOVITI – 19
Ua fa’amauina fo’i e le Matāgaluega o le Soifua Mālōlōina se maliu fou ona o āuga o le Koviti – 19, ma ua si’itia ai i le to’a 26 e ua māliliu i le fa’ama’i i totonu o Samoa. O le ua maliu o se tamā 71 tausaga o le soifua, e i ai ona gasegase tumau ma ua mae’a uma ona tui puipui e lua o le Koviti – 19.
E momoli atu ai pea fa’amaisega ma fa’amafanafanaga mai lo tatou Mālō mo nai ‘āiga ma fanau pele o e ua māliliu ona o le Koviti – 19. I le fa’aaloalogia ma le amanaia o ‘āiga o e ua māliliu, o le a leai ai se isi fa’amatalaga fa’aopoopo e tu’uina atu mai lo tatou Mālō.
O fautuaga e tumau pea i le mamalu o le atunu’u, auā le puipuiga o le soifua mālōlōina lautele, ina ia faia tali fofoga i taimi uma, tausisia le nofo ma le tutū vāvā i nofoaga faitele ma ia faia lou tui puipui auā o le puipuiga sili lea mo tagata uma e tete’e atu ai i le sosolo fa’aafi o le fa’ama’i.
Afai ua masalomia le a’afia i āuga o le fa’ama’i, fa’amolemole nofo lelei i ‘āiga ma fa’anofoesea i se nofoaga fa’apitoa e tau mamao mai i latou e pele iā te oe, seia toe mautinoa ua saogalemu ma ua toe fa’afoisia le malosi o le tino. O le puipuiga o tatou aiga, uo, ma e pele ia i tatou o le tatou galuega fai fa’atasi lea.
O le Aotelega lea o le tulaga o lo’o i ai le pepesi o le Koviti – 19 i totonu o Samoa, ua fa’amauina mai i totonu o le 48 itula mai le 2:00 i le aoauli o le Aso 26 Me 2022 se’ia o’o mai i le Aso 28 Me 2022. Mo nisi fa’amatalaga e fia malamalama atili ai, fa’amolemole asiasi i le ‘upega tafa’ilagi a le Matāgaluega o le Soifua Mālōlōina: https://www.health.gov.ws/
