Ua faailo le matagofie ma le tafa felofelo o si’ulagi, ma le lanulauava o ulufanua o le atunuu, ina ua tatou aulia mai le amataga o lenei masina fou. O le lona lima lenei o masina o la tatou folauga i lenei tausaga. Faamalo le folau, ma le soifua laulelei i le paia o le atunuu; e ui ina tatou fetaia’i pea ma to’atugā o la tatou savaliga. Tatou te faafetaia pea le Atua i lona aao lavea’i, ma ana faamanuiaga mo Samoa.
Talu mai le Aso 17 Mati 2022, o le lona fitu (7) lenei o vaiaso talu ona o tatou pesia i le faamai. E oo mai i le asō, ua faamauina ua 9,592 le aofai o i latou ua aafia i le faamai. E 73 i latou na malaga mai i totonu o le atunuu ma māua ai i suesuega ua aafia i le faamai, ae 9,519 i latou ua aafia i totonu o le atunuu, talu ona sao i tua le faama’i.
Mai le luaselau ma le lua (202) o i latou na gasegase ma taofia i nofoaga faanofoesea, ma le potu tigaina i le falemai i Motootua, o le toatele o i latou ua toe tea i tua. I le taimi nei, e sefulu tasi (11) o loo i nofoaga faanofoesea, ma le toatasi (1) o loo i le potu tigaina i Motootua.
E 65,949 suega ua maea ona faatino mo le atunuu e iloa ai pe ua aafia pe leai i le faama’i. Ua faamauina foi, ua 19 i latou ua maliliu ona o auga ogaoga o le faamai.Mai lena 19 ua maliliu, e toatolu na maliliu i le 48 itula talu ai nei.
O le tulaga o a tatou tui puipui, o loo matauina pea le siitia o pasene o i latou ua maea o latou tui i vasega o tausaga ua faatulagaina ai. Ua faailoa mai e le Matagaluega o le Soifua Maloloina, ua 92.6% i latou e 18 tausaga ma luga atu le matutua, ua maea o latou tui puipui. Mo le vasega o le 12-17 tausaga le matutua, ua 86.8% ua maea o latou tui puipui e lua. Mo le fanau iti mai le 5-11 tausaga le matutua ua 58.7% ua maea o latou tui e lua. Mo i latou e agavaa i le tui lona tolu (booster) ua 70,439 ua maea ona faatino o latou tui.
O ananafi na taunuu mai ai leisi uta o a tatou vailaau mo tui o le fanau iti, ma ua fuafuaina le faatinoina o le tui lona lua mo fanau iti mai i le 5-11 tausaga le matutua mo Savaii i le vaiaso nei. E oo mai i le asō, e lei faamautuina mai lava se tui mo nai fanau iti e i lalo ifo o le 5 tausaga le matutua.
Samoa e, o aafiaga o le faamai sa o tatou molimauina ma faafofoga iai i le tele o atunuu o le lalolagi na aafia muamua, aemaise lava i le faataotolia i falemai, ma iu ai ina maliliu nisi, lea ua matauina i lo tatou atunuu. E maualuga ia te au nei ma le Kapeneta i latou ua maliliu ona o auga o le faamai. Ou te molimoli atu faamaisega i aiga ma fanau pele ua tatala mafutaga pelē ma mamaē, ona o le maliu ma le oti, e mafua ona o aafiaga ogaoga o le faamai. E tatalo pea le tatou Malo, i le pa’i mai o aao alofa o lo tatou Atua, e faamafanafana ma lave i manino le faavauvau ma le loifofoga o le faanoanoa, ma ia faamaise lona Agaga Paia i aiga, ma fanau pele, aemaise ē o tagi mai ala.
O le aoauli nei na iloilo ai e le Kapeneta isi laasaga mo poloaiga o vavao mo le atunuu, e pei ona tuualalo mai ai le Komiti o Faalavelave Faafuasei. O a tatou vavao o loo iai nei, e maea i le vaeluaga o le po a taeao.
E tele vala taua o lenei iloiloga. E le gata i le faataoto mai o le tulaga o iai a tatou taumafaiga uma mo le puipuiga o le atunuu e pei ona taimua ai le Soifua Maloloina, o le tulaga i galuega ma pisinisi, ae faapea foi i le silasila i tulaga o aoaoga, ma isi auaunaga mo le atunuu, aemaise le fuafuaga mo le tatalaina o o tatou tuaoi faavaomalo i le agai atu i le lumanai.
Ua atagia mai i le tulaga o iai le pepesi o le faamai ma le vaai toto’a a le Matagaluega o le Soifua Maloloina, e foliga mai o le faaiuga o le masina nei e faaono vaaia ai se ata o le taunuu o le pepesi o le faamai i lona tumutumuga; ma amata ai ona toe foi ifo i lalo. E faapea foi i le tulaga ua iai nei a tatou tui puipui. Ua manino mai foi le tatala ai o tuaoi faavaomalo o isi atunuu e pei o Fiti ma Ausetalia i le taimi nei mo atunuu e lavea ai ma Samoa, e faapea foi Niusila i le tau faaiuga o le tausaga.
Ua toe faatulaga ai foi ma aiaiga mo le faanofoesea o i latou e malaga mai i le atunuu i le aiaia i le fitu (7) aso mo i latou o loo faanofoesea i le taimi nei. Mo isi malaga uma ua fuafua mai i le masina nei ma le agai atu i le lumanai, o le a faanofoesea na o i latou o le a postive o latou suega i le taunuu mai ai i Samoa nei. Peitai, mo i latou uma e faatino atu a latou suega o loo manuia o le a faatea uma i tua i o latou aiga e faanofoesea ai. E iai aiaiga o le a faatulaga mo i latou uma o le a faatea i tua mo le lipoti mai o a latou suega i le Matagaluega o le Soifua Maloloina i taimi faatulagaina.
O itu ia ua vaavaai mamao iai le Kapeneta, i le tatalaina o a tatou tuaoi faavaomalo i le vaitau o Aukuso ia Setema o le tausaga nei. Ae mo le taimi nei, e iai vaega o le a amata ona talatala.
I le iloiloga toto’a a le Kapeneta o nei vaega taua, ua taunuu ai i le faaiuga e faapea; Ia faaauau ona iai pea le atunuu i le laasaga lua (lanu moli) o le puipuiga mai le faamai mo le isi lua (2) vaiaso e afua atu i le vaeluaga o le po taeao Aso Lua, 3 Me 2022 e oo atu i le vaeluaga o le Aso 17 Me, 2022.
Peitai, ua iai fetuunaiga talafeagai ua faataoto i lalo o poloaiga o vavao, mo leisi lua vaiaso. O nei fetuunaiga e aofia ai;
- Le toe ae o fanau o loo aoaoga i le Iunivesete Aoao o Samoa e pei ona faatulaga ina i le amataga o lenei masina. Mo aoga amata, tulaga lua ma Kolisi ua iai le fuafuaga e amata talatala i lenei Masina peitai ua tapa le Vaega maoti o Aoga ina ia faataoto mai le fuafuaga mo le toe ae uma o aoga i totonu o le masina o Me.
- Le tatalaina o itula mo pisinisi mai i le 6 i le taeao e oo atu i le 10 i le po, ma amata ai le vavao mai i le 11 i le po e oo atu i le 6 i le taeao o le isi aso.
- Tatala le Aso Sa mai i le 12 i le aoauli i le 10 i le po.
- Le tatala o potopotoga uma e aofia ai ma tapuaiga i totonu o maota ma fafo, ae ia tausisia pea le tutu ma le nonofo vava, faia o puni fofoga, ma le faaalia o pepa tui.
- Le tatala o femalagaiga mai i Samoa mo so’o se mafuaaga mo tagataanuu o Samoa, ae mulimulitaia pea aiaiga faasoifua maloloina;
- Le tatala o avanoa mo tagata mai fafo e galulue i konekarate faavaomalo i Samoa nei, ae ia usitaia aiaiga faasoifua maloloina.
- Le tatalaina o tuaoi faavaomalo o le atunuu i soo se tasi i le vaitau o Aukuso ia Setema o le tausaga nei.
O le faalauteleina o a tatou poloaiga o vavao, o le a faailoa atu i tulaga masani o faasalalauga mai lo tatou Malo.
Ou te faafetaia le sao o le atunuu atoa i a tatou taumafaiga uma o loo faatino nei mo lo tatou puipuiga. I le afua mai i le pulega mamalu a alii ma faipule, o le aufaigaluega paia a le Atua, o le aufaigaluega mua’au a le Malo ma ana paaga uma, aemaise le Matagaluega o le Soifua Maloloina, faafetai ma faamalo le fai o le faiva. O lo o silasila fofoga alofa o le Atua i galuega uma o loo faatino mo si o tatou atunuu.
Samoa e, e ui ina tatou lailoa faatasi i le tele o faigata ua aliae mai ona o le faamai, ou te taofi o aga masani ia o lo tatou soifuaga faaletagata. E iai aso e taugalemū ai, ma aso e le taugalēmu ai le folauga e pei ona molimau mai ai afioga a le Atua. Peitai, o le Atua o lo tatou maluapapa, o le olo maualuga, ma lo tatou ala i malo. Ou te tapa ai pea ma le faaaloalo le atunuu ina ia to’a pea le tai, ma ia tatou faatuatua ma talitonu pea o loo soifua lo tatou Alii o Iesu Keriso, aua o Ia e faalologo uma iai le foafoaga. O ona faalavalava foi, tatou te malolo ai.
Ia manuia lau faafofogaaga ma lau tapuaiga Samoa.
SOIFUA
