O le a taoto pea ia le fiso ma ona lau, aua lau faafofogaaga Samoa le atunuu tofi. Faamalo le folau, aua o lenei ua o tatou taunuu i le faaiuga o lenei masina, a o loo tumau pea le tausiga alofa a le Atua mo si o tatou atunuu.
Talu mai le pesia o le atunuu i le faamai i le aso 17 Mati 2022, o loo faaauau pea la tatou galuega muaau i vala uma o lo tatou puipuiga, o loo taimua ai pea le Matagaluega o le Soifua Maloloina ma le Komiti o Faalavelave Faafuasei, atoa ai ma le lagolago mai a tatou paaga mai fafo. E faapea foi i le sao taua o afioaga ma alalafaga i le u’unaia o puipuiga faalesoifua maloloina e taofiofi ai le pipisi o le faamai.
O faamaumauga lata mai o tulaga ua iai nei le faamai, ua faamauina ai ua 13,499 le aofai o i latou ua aafia i le atunuu. Mai lenei aofaiga, e 13,405 i latou na pesia i le atunuu, ae 94 i latou na malaga mai fafo na maua i a latou suega ua aafia. Peitai, ua maitauina le faaitiitia o i latou e aafia i aso taitasi, ua atagia ai le ausia o le tumutumu o le faamai, ma ua toe faasolo ifo i lalo. O vaaiga ia sa muai vaaia i isi atunuu uma o le lalolagi na pesia muamua, lea foi ua atagia i Samoa nei.
E toalima (5) gasegase o loo i nofoaga faanofoesea i Motootua i le taimi nei. E leai se isi o i le potu tigaina. O le toatele o i latou sa faanofoesea i nofoaga i Motootua ua toe te’a i tua.
E toatasi (1) le maliu ua faaopoopo, ma ua se’e atu ai i le 26 i latou ua maliliu ona o auga ogaoga o le faamai
O loo faaauau ona tulituli a tatou tuiga mo le Koviti 19 i falemai uma i le atunuu, mo i latou uma e agavaa iai e afua atu i le 5 tausaga agai i luga. O le taimi nei ua 93.1% o i latou e 18 tausaga ma luga atu le matutua, ua maea tui puipui e lua; ua 89.7% i latou e i le va o le 12 – 17 tausaga ua opo o latou tui; ae ua 87.6% o i latou e i le va o le 5 – 11 tausaga ua maea o latou tui. E 74,882 i latou ua maea o latou tui lona tolu – booster. O le fagufagu ma le faamanatu mo i latou uma e le’i faia ni tui, pe le’i maea foi o latou tui, ia asiasi i se falemai lata ane, e faatino tui puipui o le Koviti 19, ina ia atili maopo lo tatou puipuiga.
O loo maitauina foi le faaopoopoina o malaga a vaalele talu mai ona talatala a tatou vavao. Ua iai le fuafuaga e siitia numera o malaga e agai mai i le atunuu i le masina fou ma faasolo atu ai lava i le tatalaina atoa o le atunuu i le aso 1 o Aukuso. O le a amata i le malaga mai o vaalele mai Amerika Samoa i aso taitasi o le vaiaso.
E faapea foi i aiaiga mo le faanofoesea i aiga e pei ona muai faatino i le lua vaiaso talu ai. E ui ina iai nai luitau ua aliae mai, ae o le feau tupito e ao ona faataua e i latou uma e malaga mai i le atunuu, ia tausisia aiaiga faale soifua maloloina moomia, ina ia saogalemu o latou aiga o loo agai i ai ae maise o tatou matua ma e ua loa le soifua faapea fanau iti e i lalo ifo ole 5 tausaga le matutua.
O loo faasolosolo le toe a’e o aoga e pei ona muai faamaonia e le Kapeneta. O le vaiaso nei ua toe a’e ai aoga tulaga lua, ae o le amataga o le masina o Iulai e toe ae ai aoga amata.
O nei vaega togia uma ia sa iloilo toto’a e le Kapeneta, ma faaiugafonoina ai le se’e mai o le atunuu i le laasaga muamua (lanu samasama) mo le puipuiga mai le faamai mo le fa (4) vaiaso, e afua atu i le vaeluaga o le po taeao Aso Lua, 31 Me 2022 seia oo atu i le vaeluaga o le Aso Lua, 28 Iuni 2022.
O vaega ua toe fetuunai i lalo o le laasaga muamua e aofia ai le;
- tatalaina o pisinisi ma faleoloa uma i itula tatala masani i aso taitasi o le vaiaso e aofia ai ma le Aso Sa;
- Le faataga o le feoai o tamaiti e i lalo ifo o le 5 tausaga le matutua i nofoaga faitele a ia mulimulitaia puipuiga faalesoifua maloloina;
- Le fetuunaiga o aiaiga mo vaa fagota e pipii i le uafu i Matautu e mafai ai ona agai ese mai auva’a i le pa’umatu mo sina taimi, a o lau eseina uta a vaa ma toe tapena mo le toe agai atu i fagotaga, pe afai e faamalieina aiaiga faalesoifua maloloina.
- Le amatalia o faiga malaga i aso taitasi o le vaiaso i le va Samoa e lua.
- Le faaauau ona faatino suega mo le faamai mo i latou uma e taunuu mai i le atunuu, ma tatala loa i o latou aiga.
- Le uunaia pea o puipuiga faalesoifua maloloina mo le puipuiga lautele e pei o le faia o talifofoga, tutu vava ma le tausia lelei o le soifua maloloina.
Samoa e, o lenei ua tatou agai malie atu e talatala vavao uma, atoa ai ma o tatou tuaoi faavaomalo. Ua silia ma le lua tausaga o tau napa pea le tatou Malo e apo lo tatou puipuiga malu. O lea foi ua maitauina le faasolosolo pea i lalo o le numera o i latou e pesia. Peitai, o le talosaga, ia faaauau pea ona o tatou faaeteete ma tausisia pea aiaiga faasoifua maloloina, ina ia tatou saga fesoasoani pea i le tuuititia o le pepesi o le faamai, aemaise le faia o o tatou tui puipui.
O lenei ua o tatou aga atu i le faamanatuina o le 60 tausaga o lo tatou Malo tutoatasi. O le talosaga i le paia o le atunuu, ia atagia pea la tatou faataua o puipuiga o le faamai i a tatou tapenaga ua fuafua i afioaga ma alalafaga.
O le faalauteleina o aiaiga o a tatou vavao o le a faailoa faalauaitele atu i faasalalauga mai le tatou Malo.
Ia faamaise pea le Agaga o le Atua i aiga ma fanau pele ai latou ua maliliu ona o auga faigata o le faamai.
Ia faamanuia le Atua i lau tapuaiga Samoa.
SOIFUA.
