Asosi o Tausitusi a Samoa Sauniga Fa’ale-tausaga mo le fa’aulufaleina o Sui fou 2022
Aso Lulu, 25 Me 2022, Taumeasina Island Resort @ 6:30 i le afiafi
Lau Susuga Patele Iosefo Vili
Lau Susuga i le Peresetene ma le Pulega o le Asosi o Tausitusi a Samoa
Susū Sui o le Asosi o Tausitusi a Samoa
Le au Valā’aulia, Ali’i ma Tama’ita’i,
Talitonu ua tatou i ai i le taulaumea o feau ma galuega o lenei aso. O pāia ma mamalu o lenei afiafi, o le a ta’oto auā o pāia o Samoa ua uma na tofi. Ae o le a ou tautala i le fa’amoemoe ua tatou fesilafa’i ai.
O lenei afiafi ma lona fa’amoemoe, ua fa’atino ai le sauniga fa’ale-tausaga e fa’aulufale ai Sui fou i le Asosi Tausitusi a Samoa. O le Asosi Tausitusi o se tasi o Fa’alapotopotoga e maoa’e ma mauāluga se fa’ava’a o lo’o fa’atonutonu ai ana matāfaioi. E atagia i lenei fa’ava’a le tulaga mausalī e ta’iala ai amioga tauāloa (‘code of conduct’) a ona Sui aemaise o le tulaga mauāluga i le fa’atinoina o le galuega i se tulaga atoatoa (‘professional standard’).
Mo Sui fou, i le avea ai o outou ma Sui o le Asosi Tausitusi, o se moemoe fou lea i le fa’agasologa o le olaga galue. O le i ai fo’i o lou suafa e avea o se Sui ua fa’aulufale i le Asosi, ua fai lea ma fa’asinomaga fou.
TA’ITA’IGA (LEADERSHIP)
A toe to manatu i le savaliga sa asa mai, e i ai nai a’oa’oga e mafai ona fa’atepa i ai le tatou Asosi aemaise i tulaga fa’a-ta’ita’i. Ua tatou folau i vasa o fesuiā’iga ma molimau i nisi o mea e le’i tutupu muamua i lo tatou olaga. Ua tatou feagai ma le tele o lu’itau e pei ona i ai le fesuiā’iga o le tau ma ona a’afiaga, o mala fa’alenatura, o fa’ama’i pepesi ma tulaga o pulega ua manunu ma fevaevaea’i ai Mālō ma tagata lautele.
I vaitau fa’apenei, tatou te tepa taula’i i ni Ta’ita’i e i ai le ‘amio tauāloa’ e gafatia le folau i taimi souā o le ola. E mo’omia fo’i le fetu’utu’una’i o le tōfā ma le moe i taimi ua lē mautonu. E i ai fo’i taimi ua lafotūina ai le fa’amoemoe o le tagata, ma e tāua le i ai o Ta’ita’i e tu i matagi ‘olo i taimi faigatā. O se fa’amalosi auā le fa’asinomaga fou o Sui ua fa’aulafale. Ia fai outou ma poutū o le galuega tausitusi ma ‘aua le malolo gofie i taimi souā.
VAAIGA TAULAI (VISION)
O oe le Sui o le Asosi, ua i ai lou fa’asinomaga ma e ao ona e to manatu i se va’aiga taula’i (‘vision’) e fai ma fetū ta’iala o lenei moemoe fou. I la’u savaliga umi, sa fai ma va’aiga taula’i mo a’u – “le avea o Samoa ma nofoaga po’o se atunu’u e ola sa’oloto ma fiafia ona tagata.” O lo’o sosolo fo’i lea fa’amoemoe i le Ta’iala mo le Lumana’i o Samoa 2021/2026 o lo’o tautalagia ai le “tausia le nofo fealofani, le saogālēmū, ma le sa’olotoga mo tagata uma.” Ou te talitonu, po’o le a lava lou fa’asinomaga, e i ai lou sao i le va’aiga taula’i lenei mo Samoa.
GAFA TAUSI A TAUSITUSI I TOTONU O LE MALO
I totonu o le Ta’iala mo le Lumana’i o Samoa 2021/2026, o lo’o ta’oto ai ni ta’iala autū e lima (5). O se tasi o ta’iala e fitoitonu ma le “fa’alauteleina o le tamāo’āiga ma gafataulimaina” (“diversified and sustainable economy”) ma e feso’ota’i tonu ma le ‘āano o matāfaioi a le Asosi Tausitusi.
I le taimi nei, o lo’o feagai le tamāo’āiga o le lalolagi ma tulaga lē mautonu. Ona o lea, e lē mafai ona tu’uitiitia le tāua o le galuega a le Asosi i lana gafa o le fa’atino o tulaga mauāluga i galuega tausitusi ma le su’etusi e taulogologo ai ni fa’ai’uga a le Mālō, pisinisi ma isi pa’aga. E lē fa’aitiitia fo’i le sao o le Asosi i isi ta’iala autū a le Mālō.
A’o tapena atu i lo outou fa’asinomaga fou, o nai manatu ia e taoso ai le savaliga:
- Tapena e finau i le mea e te talitonu i ai ma ‘aua nei fetu’utu’una’i gofie lou talitonuga aemaise pe a faitioina oe;
- Taofi mau i aga tausili ma amio tauāloa (‘values and conduct’) e mausalī ai tulaga mauāluga e fa’atonuina lau matāfaioi (‘professional standard’);
- ‘Onosa’i’ – pei o le ‘upu masani, e leai se mea e maua ma le fīlēmū!
E avatu le fa’afetai tele i le Susuga i le Tama’ita’i Peresetene ma le Pulega o le Asosi o Tausitusi a Samoa mo lenei fa’amoemoe ua sao ma uli. Mo Sui ua fa’aulufaleina, saga’i ane ‘ai o le tai i ō outou faiva alofilima! Talitonu sa outou gāpātia i sa’ili’iliga ia tou ofi mai i totonu o le Asosi aemaise o tulaga mauāluluga e tatau ona ausia e saofagā ai e avea ma Sui. Ua tino mai i lenei aso lo outou tautigā.
Ia manuia le Asosi o Tausitusi a Samoa i la’asaga uma o lenei tausaga ma e fa’ailoa atu, ua tatalaina le fa’amoemoe o le fa’aulufale o Sui fou mo le 2022.
Soifua ma ia manuia.
