Saini Maliega mo le faamatuuina atu o le Vaega 1 – $200,000.00 mo le Poloketi, Atinae o Itumalo, Aso 27 Me 2022
Lau susuga i le Tiakono Toeaina, lau Susuga i le Aoao Fesoasoani. Lau Afioga i le Minisita Lagolago o le Matagaluega o Tina ma Tamaitai. Lau Tofa Seuamuli Fasi Toma – o le paia o le afifio o Sa Peseta ma lo outou maopu, le afio o Suisala, afifio o Lilo ma Lemaveve. Alalatai le Faleiva ma lou tino o Lepulu ma le mamalu ia Matautu. Faafetai timai, manatu o lea ua fofoga le lagi i le taulaga ua siitia, ua e toto foi le niu i le tuaoi aua lo tatou va nonofo ma le Mataisau o le Foafoaga. O lea ua e faataoto le manavaga faaleagaga e taitai ai o tatou faiva ae o le tomatauina o la tatou feiloaiga i lenei taeao.
O le tatalo ia maua lau lauga, faafulu e le agaga lau utu faaleagaga maua foi lou soifua maloloina aua tofiga faalemalo.
I le Afio o lau Afioga i le Tamaitai Palemia, Lau Afioga Hon. Fiame Naomi Mataafa, aemaise alii ma tamaitai Minisita o le Kapeneta.
I le afio o lau Afioga i le Fofoga Fetalai o le Maota. Afifio Sui Mamalu o le Fono Aoao Faitulafono o le Palemene o Samoa.
Afifio le paia maualuga o Tapaau ma Aiga, ae a le paia maualuga i Faleupolu ma Failauga, Faletua ma Tausi ae a Samoa ua potopoto.
O le paia lava aua Aiga ma Tama, tama ma aiga, le usoga a Pule ma Tumua, Ituau ma Alataua, Aiga i le Tai ma le Vaa o Fonoti.
E fai au ma fofoga o le Afioga i le Minisita o le Matagaluega o Tina ma Tamaitai, Atinae o Afioaga ma Agafesootai, ua le mafai ona auai mai e ofo alofa atu ma faatalofa atu i lenei taeao.
Ua faamalo le folau, malo le soifua.
Ae o lenei taeao, e ia te au le mitamitaga tele e avea ai au e fai ma sui o le Malo e faaleoina ma faalauiloa se tasi o Atinae Autu o loo ave iai le faamuamua a le Malo i lana Taiala mo le Lumanai Manuia o Samoa 2021-2026.
Mo lo outou silafia, o le tapenaina o le Poloketi lenei o le Atinae mo Itumalo sa lei faigofie ona fuafua mai aemaise o le tulaga e tatau ai ona faamalieina faiga faavae a le Malo, aemaise ia faafaigofie le faatinoina o atinae a itumalo faapalota e 51. O le Sini Autu, o lenei poloketi ia faaleleia le atinaega o le soifuaga lautele mo le manuia o tatou tagata, ma e amata mai lea i le atinaeina o itumalo e faaaogaina ai lava o latou aao, taimi, malosi, tomai poo le agavaa ae le gata i lea, o le faaaogaina o le oa faalenatura ma le siosiomaga e pei o laufanua, vaitafe ma le sami ua foai e le Atua i lea itumalo ma lea itumalo. O le faamoemoe o le Malo, e pei ona maioio i lana Taitala mo le Lumanai Manuia o Samoa:
- Ia faaitiitia le mativa ma le le tagolima
- Ia faaleleia le soifua maloloina mo le lautele
- Ia lelei aoaoga
- Ia faaaupegaina tagata i avanoa mo le soifua maloloina
- Ia unaia atinae i totonu o nuu ma afioaga e pei o faatoaga, faiga faiva ma faasao, atinae o tagata tafafao mai fafo faapea atinae o pisinisi laiti.
O se faiga foi lenei faiga, o le faamatuu sao atu e le Malo o le fesoasoani tau tupe ma le Maliega e faatino e itumalo atinae e pei ona malilie ai, ma o le aso, o le a sainia ai le Maliega i le va o le itumalo ma le Malo o Samoa, mo le faamatuuina atu ai e le Malo le $200,000.00, mo itumalo taitasi poo le aofaiga e $10.2miliona Tala mo itumalo e 51. O lenei fesoasoani, o le Vaega 1 lea o le poloketi lenei. E 18 itumalo ua mae’a ona latou tuuina mai vaega manaomia i le Matagaluega o Tina ma Tamaitai, ma o le a sainia a latou maliega i le aso, mo le faamatuuina atu o le $200,000.00. E ese le maliega e toe sainia foi mo le $1miliona Tala, pe a oo atu i le taimi e faamatuu atu ai foi le Vaega 2 o le tatou fesoasoani mo itumalo.
O lenei maliega e mo le $200,000.00. O le a tuuina atu le faatuatuaga a le Malo i Komiti o Itumalo taitasi ina ia latou tausisia aiaiga o lenei maliega. Ua faafaigofieina e le Malo vaega uma, mo le faamatuuina atu o lenei $200,000.00, ina ia mafai loa ona faatino le faatuina o le Komiti Faaitumalo poo District Councils, ma le Ofisa Tutotonu o le Itumalo faatasi ai ma le faafaigaluegaina o tagata faigaluega tumau i nei Ofisa mo le faagaioiina o le poloketi ma atinae a itumalo taitasi. E iai le talitonuga, o lenei faiga o le a mafai ona faigofie le fesootai atu o le Malo i itumalo taitasi e uiga i le poloketi, o le $1miliona Tala mo Atinae o Itumalo aemaise atinae ma polokalame o le a faatinoina e le Malo i totonu o itumalo taitasi i le lumanai.
O le faamoemoe o le Malo, e tatau ona tuuina mai le ripoti ma faamaumauga o le faaaogaina o le $200,000.00, ae lei ma’ea le aso 31 Iulai 2022, e komiti ma itumalo taitasi. O le a amata foi talanoaga ma itumalo taitasi i le faaaogaina o le $1miliona Tala a le itumalo pe a mae’a ona faatino aiaiga o le $200,000.00, e aofia ai ma le asiasia e le Malo ma ua faamalieina tulaga uma. O le fua foi lea o le faamatuuina atu o le $1miliona Tala. E talosagaina foi tatou itumalo, ina ia amata faatalanoaina ma le Matagaluega o Tina ma Tamaitai la outou Fuafuaga poo le Taiala mo Atinae o Itumalo. O le a faatuina se vaega faapitoa latou te mataituina lenei poloketi e galulue soosoo tauau ma le aufaigaluega a le Malo, ina ia maua pea e tatou itumalo le fesootaiga vava lalata aemaise le mataituina o le faaitnoga o le atinae, e finagalo ai le itumalo ma faamaonia e le Malo, o se atinae e manuia ai le itumalo atoa.
E iai le naunautaiga a le Malo, o lenei faiga fou o le avanoa faaauro lenei u a maua e tatou itumalo, e atinae ai e le gata mo le manuia i le taimi lenei, ae faapea foi i le lumanai. Tatalo atu le Malo, ia avev iai la outou faamuamua aemaise le fai mea lelei, ina ia ola le fatu ma faatupulaia, aua le manuia o tatou aiga, nuu ma le atunuu.
E valuvalusia aa o le laau, ina ia lagolagoina lenei faamoemoe e o tatou itumalo uma o le a faamanuiaina. Ia sosoo lelei le faatinoga ma ia o gatasi ma alafua ua faataoto i le tatou Maliega.
Faamanuia mai le Atua i le amataina o le Poloketi o Atinae mo Itumalo, ia avea lenei atinae ma auala e ui mai ai ana faamanuiaga ia Samoa ma ona tagata.
Manuia tele le faamoemoe o lenei aso aemaise o le faamanatuina o le 60 Tausaga o le Tutoatasi o Samoa – Folau ma le Faatuatua.
Soifua ma ia Manuia.
