FEILOAIGA MA LE AIGA O MASE DR. FETUAO TOIA FITI ALAMA
Maota Tofilau Eti Alesana (MTEA) i Mulinuu
Aso Lua, 17 Me 2022
O le a taoto ia paia o le Malae i Ti’afau nei,
O le malae o le faautugatagi a le atunuu,
O le malae o le saolotoga o Samoa,
O le malae o le atoaga o malae,
I le afua mai le Oneone le utufia, seia paia le Oneone sisina i le si’u fanua.
O le malae e atoa iai paia sauoo o Samoa
A o mamalu foi e samasama-fafau ma tausi vaatele e Tulatoa ma Tootoo-uli, e pale feagai:-
Aiga ma tama, o tama foi ma Aiga
Le Usoga a Tumua ma Pule,
Ituau ma Alataua,
Aiga i le Tai ma le Vaa o Fonoti
O le a taoto ia faa-si’u o le tapu’olo, ia sā ma faigā o lenei afiafi,
Le paia maualuga i le afifio mai o suli ma feoi a o paolo foi ma gafa o le Tofa Mase Dr, Fetuao Toia Alama, …
Se i vaeatu le Gauolosa’a ma le Taape o Papa i le malae i Vaituutuu,
E afifio ai Aiga e lua,
Afifio Maopu ma le Aiga Sa-Peseta
Susu Usoalii
Alalatai le mamalu ia Sale’aula ma lau faatufugaga ma lou faletufuga
O le Tufuga Pule
O le Tufuga To’atama’i,
O le Tufuga alofa,
Ma upu ia te oe le Pule
Auā ua usu le fono i le Fetalaiga ia Mase Dr. Fetuao Toia Alama
Ua po le nuu,
Ua mafuli le La ma le Masina
Auā ua lagia Malaefono ma Matautu-Aai
O le afioaga o le Tuiatua Faanofonofo,
Le Tofa i le Matua ia Fuataga
Afifio Tapaau,
Mamalu i le To’afā,
Ma upu ia Saleaaumua.
Auā ua tuumalo Le sa tausi-Alii, a o le Masiofo a le Tuiatua Faanofonofo.
O le ala lava lea e tasi ua saunia e lo tatou Atua,
Tatou te ui ai, ma faatalitali ai i le aso o Lona Toe Afio mai.
Tau ina o tatou faatuatua ia te IA,
O ia tatou te manumalo ai.
Tau ina ia faamaise ma saga faamafanafana le Agaga o le Atua i le paia i Aiga aemaise o le Nofo-a-alo.
E ui lava ua maea faaee le malaga a le tofa Mase, peitai, o se laolao lelei ua saunia e le Atua lenei afiafi, tatou te feiloai ai.
E fai ai lo’u leo ma Sui o le Palemene ma le Malo,
Ina sei faaleo se faafetai ona o le tautua atunuu a le Tofa Mase Dr. Fetuao Toia Alama, o Le sa avea ma Failautusi o le Fono Aoao Faitulafono.
O ia foi o se tasi o le mamalu o le atunuu, na faaee atu iai e lo tatou Malo le faailoga e aloaia ai lana tautua e ala i Galuega Maoa’e ma le Tauleleia mo Samoa.
E le toe tau faailo le faaeaea a le Atua ia Mase Dr. Toia Alama, e ala i le tofi Failautusi o le Fono Aoao Faitulafono.
E pei foi ona silafia, o le Tofiga o le Failautusi o le Fono Aoao Faitulafono, o se tofiga faale-Faavae, ma o ia le uluai Tamaitai, na tofia iai.
Sa galue ai Mase ma tautua i le Palemene ma le atunuu mo le umi e 20 tausaga, i le afua mai i le tausaga e 1988, seia oo i le aso 31 o Iulai, 2008.
E le o se taimi puupuu sa ia umia ai lenei tofiga, ma e tu maualuga foi le faatinoga o le tofi sa ia tauaveina, i lona filigā ma lona sailiili i auala e siitia maualuga ai le faatinoga o matafaioi ma galuega fai a le Palemene, e ala i ona faiva ma matafaioi faa-Failautusi o le Fono Aoao Faitulafono.
O le umi o lona tauaveina o lenei tofiga, o se molimau ola lea e faamaonia ai, o ia o se auauna faatuatuaina ma faamaoni i lona valaauina.
O le tausaga 2017, na faaee atu ai e lo tatou Malo le Faailoga o le Poloaiga mo Galuega Maoa’e ma le Tauleleia (Order of Merits) ia Mase. O se tasi lea o faailoga taualoa e mafai ona tuuina atu:-
- i se tagata na ia tuuina atu se tautua tu maualuga ma le maoa’e mo le atunuu e le gata i totonu o Samoa ae faapea foi i tulaga faava-o-Malo;
O se faailoga foi e amanaia ai se:-
- tagata na ia tuuina atu ni saofaga maoa’e i le alualu i luma o so o se taumafaiga aemaise lava le tuuina atu o le faamamafa i luga o le poto salalau, aoaoina, tausia o tusi, faa-saienisi ma mataupu faale-lotu, i mataupu i totonu o le atunuu ma faava-o-Malo ma isi tulaga e faamanuiaina ai Samoa pe i se faiga tuusao po o le faaalatua.
O faamanuiaga ia a le Atua sa tauala mai i lana auauna, sa mafai ai foi ona fai o ia ma faamanuiaga i le Palemene ma le Malo.
O le tatou faafetai foi lea i le Atua, ona o Mase o se auauna aogā, sa ia topule mo galuega sa tautua ai mo Samoa
A o se faafetai foi lea a le Palemene ma lo tatou Malo, i lau tapuaiga ma lau tatalo, sa mafai ai ona tau i le manuia le auaunaga a Mase, a o feagai ai ma le Palemene ma lo tatou Malo.
Tau ina ia alofagia e le Atua lana faigamalaga, ina ia saunia e lo tatou Matai Sili, sona nofoaga i Lona Malo e faavavau.
Ia iai foi le Faamafanafanaga a le Atua i aiga, ma le Nofo-a-alo.
E tusa ai o tulaga aloaia i le amanaia ai e le Palemene ma le Malo o le tautua a le Tofa Mase Dr. Fetuao Toia Alama ia Samoa, e pei ona ia umia ai se tasi o Faailoga Taualoa a lo tatou Malo, ou te tuuina atu ai le Tagavai o le Malo Tutoatasi o Samoa, i lau Fetalaiga Maumalo Ioane Alama, o se tasi o alo e faasino tonu ia Mase mo le teu-maluina, e fai ma faailoga o le faafetai a le Palemene ma le Malo e manatua ai le tautua tu maualuga ma le maoa’e a lana auauna i lo tatou atunuu.
Pe a o tatou taumavae i lenei afiafi, ia iai le agalelei o le Alii i le paia auā mamalu e faasino tonu i Vaituutuu ma MalAefono & Matautu-Aai.
Manuia tele lenei afiafi
SOIFUA.
